Nəzakət

"Leyli və Məcnun" -100

Opera Teatrımızın möhtəşəm abidəsi

Azərbaycan Dövlət Akademik Opera və Balet Teatrının mətbuat xidmətindən qəzetimizə verilən məlumata görə, teatrda ilk milli muğam operamız - Üzeyir Hacıbəyovun "Leyli və Məcnun" operasının 100 illiyinə həsr olunmuş yubiley tamaşasının keçirilməsi operasevərlərin çox böyük fəallığı ilə müşayiət olunur. "Leyli və Məcnun"un yubiley tamaşasında iştirak etmək arzusunda olanların sayı həddən ziyadə çoxdur. Bunu teatra ardı-arası kəsilməyə telefon zəngləri, kassalara bilet əldə etmək üçün çoxsaylı müraciətlər sübut edir. Bu fakt opera sənətimizin ən dəyərli incilərindən biri olan "Leyli və Məcnun" operasına olan ümumxalq sevgisini bir daha sübut edir. Tamaşaçıların bu önəmli hadisəyə olan böyük marağını nəzərə alaraq, teatr rəhbərliyi yubiley tamaşasını iki dəfə yanvarın 25-I və 27-də gostərmək haqqında qərar qəbul etmişdir.

Qeyd etmək lazımdır ki, opera həvəskarları bu tamaşalarda hazırda "Leyli" rolunun ən parlaq və istedadlı ifaçıları Azərbaycanın xalq artisti Nəzakət Teymurova və Aygün Bayramovanın ifası ilə tanış olacaqlar. Hər iki tamaşada "Məcnun" partiyasını xalq artisti Mənsum İbrahimov ifa edəcəkdir. Heç şübhəsiz ki, yubiley çərçivəsində keçiriləcək tamaşalar paytaxtımızın mədəni həyatında əlamətdar bir hadisəyə çevriləcək, milli musiqi və teatr sənətimizin möhtəşəmliyini bir daha nümayiş etdirəcəkdir.

Səs.- 2008.- 17 yanvar.- S. 12.