Bişkekdə ümummilli lider Heydər Əliyevin həyat və fəaliyyətindən bəhs edən fotosərgi açılmışdır

AzərTAc-ın xüsusi müxbiri xəbər verir ki, Bişkekdə Azərbaycan xalqının ümummilli lideri Heydər Əliyevin həyat və fəaliyyətindən bəhs edən fotosərgi açılmışdır. Sərgiyə gələnlər arasında dünya şöhrətli qırğız yazıçısı Çingiz Aytmatov da olmuşdur.
Bişkekdəki Türkdilli Ölkələrin Siyasətinə Dəstək İctimai Fondunun prezidenti Nüsrət Məmmədov bildirmişdir ki, türkdilli dövlətlərin əksəriyyətində 2008-ci il Heydər Əliyev ili elan olunmuşdur. Bu il həmin ölkələrdə Azərbaycan xalqının ümummilli lideri Heydər Əliyevin siyasi irsinin öyrənilməsi ilə bağlı silsilə tədbirlər keçirilməsi nəzərdə tutulmuşdur.
Yazıçı Çingiz Aytmatov da bu ideyanı dəstəkləyərək demişdir: "Mən Heydər Əliyevin xatirəsinə həsr olunmuş bir sıra elmi konfransların keçirilməsi təşəbbüsünü böyük məmnuniyyətlə dəstəkləyirəm. Bu böyük şəxsiyyət tərəqqi və yeni əsrin rəmzi olaraq qalır".
Çingiz Aytmatov və Azərbaycanın Qırğızıstandakı səfiri Arif Ağayev bütün türkdilli dövlətlərdə ulu öndər Heydər Əliyevin xatirəsinə həsr olunmuş elmi-praktik konfransların keçirilməsi ilə bağlı məsələləri müzakirə etmişlər.

Azərbaycan.- 2008.- 9 yanvar.- S. 1.