Günay

"Müstəqilliyimiz əbədidir" adlı tədbir keçirildi

Ötən gün Lətif Kərimov adına Azərbaycan Xalçası və Xalq Tətbiqi Sənəti Muzeyində "Müstəqilliyimiz əbədidir" adı altında 20 Yanvar faciəsiylə bağlı tədbir keçirildi. Tədbirdə həmin faciənin şahidləri, 200 saylı Bağça Məktəb, Lisey Kompleksinin (BMLK), 36 saylı məktəbin şagirdləri və Aytan İctimai Birliyinin üzvləri iştirak edib.

Tədbirdə çıxış edən BMLK-nin direktor müavini Xədicə Əliyeva bildirdi ki, uşaqlar keçmişlərini bilməlidirlər ki, gələcək həyatda özləri üçün düzgün istiqamət seçə bilsinlər: "Onun üçün də bu cür milli ruh üzərində köklənmiş tədbirlərin silsilə formasında keçirilməsi çox dəyərlidir".

Bu günlər qanlı tarixə həkk olunmuş 20 Yanvar faciəsiylə bağlı respublikamızın şəhər və rayonlarında bir sıra silsilə tədbirlər keçirildiyini deyən bu faciənin iştirakçısı Tofiq Seyidov qeyd etdi ki, bu faciədən 19 il keçməsinə baxmayaraq, o günkü dəhşətlər bu gündə onun gözləri önündə canlanır. O gün minlərlə oğul və qızlarımız canlarını qurban verdilər və şəhidlik zirvəsinə ucaldılar. Biz də hər il bu günü qeyd etməklə yanaşı,o faciəni xaric ölkələrdə və beynəlxalq qurumlarda yayılmasına çalışmalıyıq". Bu birliyin fəaliyyətində əsas istiqamətin maarifçilik üzərində qurulduğunu deyən Aytan ictimai Birlyinin rəhbəri Aygün Zamanlı bildirdi ki, hazırda müxtəlif orta ümumtəhsil məktəblərindən həmin birliyə üzv olan çoxsaylı şagirdlər var. İstəyirik ki, gələcəyimizin qurucuları olan uşaqlar vətənpərvər ruhda böyüsünlər. Sonda isə məktəblilər "Qanlı 20 Yanvar günü" adlı kompozisiya ilə çıxış etdilər.

Paritet.- 2009.- 20-21 yanvar.- S. 12.