Bakının “İslam mədəniyyəti paytaxtı” elan olunması təntənə ilə qeyd ediləcəkdir

Bakı Şəhər Mədəniyyət və Turizm İdarəsi cari ildə müxtəlif layihələrin gerçəkləşdirilməsini və tədbirlərin keçirilməsini nəzərdə tutur. Bunlardan ən əsası Bakı şəhərinin 2009-cu ildə “İslam mədəniyyəti paytaxtı” elan olunması ilə bağlı layihədir.

Qurumun mətbuat xidmətindən bildirmişlər ki, bu əlamətdar hadisə bütün mədəni-maarif müəssisələrinin tədbirlər planında öz əksini tapacaqdır. İslam mədəniyyətini tərənnüm edən, bir-birindən fərqli və rəngarəng tədbirlər paytaxt sakinlərinə və şəhərimizin qonaqlarına təqdim ediləcəkdir. 2009-cu ilin fevral ayından başlayaraq mədəni-kütləvi tədbirlərin yüksək səviyyədə keçirilməsi məqsədi ilə idarədə 12 nəfərdən ibarət işçi qrupu yaradılmışdır.

Xalq qəzeti.- 2009.- 23 yanvar.- S. 2.