Murad Kajlayev: Azərbaycan mənə musiqi yazmağı öyrətdi

İyunun 20-də Azərbaycan Mədəniyyət və Turizm Nazirliyinin təşəbbüsü ilə Rəşid Behbudov adına Mahnı Teatrında Dövlət mükafatı laureatı, SSRİ xalq artisti, professor, tanınmış dirijor və bəstəkar Murad Kajlayevin yaradıcılıq gecəsi keçirilmişdir.
AzərTAc xəbər verir ki, mədəniyyət və turizm nazirinin müavini Ədalət Vəliyev gecəni açaraq, nazir Əbülfəs Qarayevin təbrik məktubunu oxumuşdur.
Murad Kajlayev 1931-ci il yanvarın 15-də Bakıda anadan olmuş, musiqi təhsilini Bakı Konservatoriyasında almışdır. O, Mahaçqala Musiqi Məktəbində müəllim, Dağıstan radiosu simfonik orkestrinin baş dirijoru, Dağıstan Filarmoniyasının bədii rəhbəri işləmişdir. 1963-cü ildən Dağıstan Bəstəkarlar İttifaqı İdarə Heyətinin sədridir. Dirijor M.Kajlayev maestro Niyazinin yanında təcrübə keçmişdir.
Görkəmli bəstəkar bir çox əsərlərin, o cümlədən baletlərin, simfoniyaların, kinofilmlərə və teatr tamaşalarına musiqilərin müəllifidir. Onun caz əsərləri məşhur Dük Elinqtonun caz orkestrinin ifasında səslənmişdir.
M.Kajlayev Bakıya növbəti gəlişindən çox şad olduğunu bildirmişdir. O demişdir: “Artıq çoxdan idi ki, mənə mədəniyyət, ziyalı insan olmağı, musiqi yazmağı öyrətmiş doğma Azərbaycana gəlmək istəyirdim. Burada həyat və yaradıcılıq yolumun əvvəlində rastlaşdığım insanlarla görüşdüm”.
Konsertdə Bülbül adına ixtisaslaşdırılmış uşaq musiqi məktəbinin şagirdləri — prezident təqaüdçüsü Nərmin Nəcəfli, Toğrul Hüseynli (fortepiano), “Bəri bax” vokal ansamblı, xalq artisti Natəvan Şeyxova, əməkdar artist Rəşidə Behbudova, Rafiq Seyidzadə (saksofon) və başqaları iştirak etmişlər

Xalq qəzeti.2007.-21 iyun.-S.7.