Cəmilə Mənsurova – M FirAnın “Ruhən güclü” kitabı işıq üzü görüb

Bu yaxınlarda yazar Cəmilə Mənsurovanın “Ruhən güclü” kitabı nəşr edilib. Xatırladaq ki, romanın birinci hissəsi keçən il Dövlət Nəşriyyatında çap olunub. Yazıçılar Birliyinin üzvü C.Mənsurova 1972-ci ildən respublika mətbuatında çap olunur. Müəllifin hekayələrdən ibarət ilk kitabı 1978-ci ildə nəşr edilib. C. Mənsurova 1980-2000-ci illər ərzində çoxlu sayda novella və ədəbi yazılar qələmə alıb. 2004-cü ildən etibarən M FirA təxəllüsü ilə çap olunmağa başlayıb. Roman orada təsvir olunanların prototipləri, eləcə də onların yaxınlarının söylədikləri və sənədli materiallar əsasında qələmə alınıb. Əsərlə tanış olarkən oxucu XX əsr Azərbaycan ziyalılarının məişəti ilə yaxından tanış olmaq imkanı əldə edir. Romanda onların sevinc və kədəri, namus anlayışı, vətənə olan məhəbbəti, özlərinə və dostların bəslədikləri inamı işıqlandırılıb. Əsərin qəhrəmanları ölkədəki tarixi hadisələrlə bağlı çətinliklərlə üz-üzə qalırlar, amma bu çətinliklərdən mətinliklə keçməyi də bacarırlar. Onlar bu yolla nəsildən-nəsilə ötürülən ruhlarına güc verirlər. Bu qəhrəmanların əsas məziyyəti onların ağlı və səbridir. “Azərnəşr” işıq üzü görən eyniadlı ikinci kitabında isə müəllif zərif, gözəl, eyni zamanda dözümlü, güclü, kişi cəsarətinə malik, həyatın ağır yükünü öz çiyinlərinə götürən Azərbaycan qadınlarından söz açır. İkinci kitabdakı hadisələr 1925-ci ildən 1959-cu ilə qədərki dövrü əhatə edir.

S.MÜRVƏTQIZI

525-ci qəzet.- 2010.- 13 aprel.- S.7.