“Azərbaycan” jurnalının yeni sayı işıq üzü görüb

“Azərbaycan” jurnalının mart nömrəsində Vilayət Quliyevin ingilis dilindən tərcümə etdiyi “1984” romanının 2-ci hissəsi dərc olunub. Corc Oruielin bu məşhur romanının peşəkar ədəbiyyatşünas tərəfindən Azərbaycan dilinə tərcümə olunması son vaxtlar ədəbi dairələrdə müsbət qarşılanan hadisələrdən sayıla bilər. Tanınmış dramaturq Əli Əmirlinin “M.S.S – Mən səni sevirəm” ikihissəli dramı da jurnalın bu sayında işıq üzü görüb. Poeziya həvəskarları bu nömrədə Ramiz Qusarçaylı, İsgəndər Etibar, Məmməd Tahir, Sabir Alim, Şöhlət Abbas, Bəhram Basqallı, Əbülfət Mədətoğlu, Əli Vəkil, Vaqif Kəhrizli, Vaqif Vüqar, İlham İnam, Kəmalə Ağayeva, Narıngül və Xatirə Fərəclinin şeirlərini oxuya bilərlər.

“Azərbaycan” jurnalının bu sayında həmçinin gənc xanım yazarlara da yer ayırıb. Gənc nasir Ülviyyə Heydərovanın “Mələk” hekayəsi və Nəzmiyyə Hicranın şeirləri bu sayda dərc olunub. İstedadlı gənc yazar Pərvin Nurəliyevanın xalq yazıçısı Elçinin yaradıcılığına həsr olunmuş “Özünüdərk məqamı” məqaləsi jurnalın “Gənc tənqidçinin tribunası” bölümündə çap edilib.

Jurnalın yeni sayında İmamverdi Əbilovun Süleyman Rəhimovun 110 illiyilə bağlı “Ədəbiyyatımızın Dədə Qorqudu”, Vaqif Yusiflinin Sabit Rəhmanın 100 illiyinə həsr olunmuş “Müasir komediyamızın banisi” məqalələri də var. Xalq şairi Məmməd Arazın həyat yoldaşı Gülxanım Fətəliqızının “Ömürdən yarpaqlar” əsərinin davamıyla oxucular bu sayda tanış ola bilərlər. Publisistika bölməsində Qəşəm Nəcəfzadənin “Əyləşdiyim stul” essesi “Azərbaycan” jurnalının poeziya şöbəsinə indiyədək rəhbərlik etmiş şairlərimizdən bəhs edir. “Tənqid və ədəbiyyatşünaslıq” bölümündə Səadət Vahabovanın Cəlil Məmmədquluzadə nəsrində simvolik adlar yazısı işıq üzü görüb. Jurnalın təşkil etdiyi dəyirmi masadan hazırlanan materiallar da bu sayda verilib. “Tanımaq və tanınmaq” başlığı ilə dərc olunan bu söhbətdə jurnalın baş redaktoru İntiqam Qasımzadə, yazıçılar Yaşar, Saday Budaqlı, tərcüməçi Vilayət Hacıyev çağdaş ədəbiyyatımızın problemləri və tərcümə məsələləri barədə fikirlərini bölüşüblər.

Jurnalın ənənəvi “Kitab rəfi” bölməsində son vaxtlar nəşr olunan kitablar barədə bilgi almaq mümkündür.

525-ci qəzet.- 2010.- 17 aprel.- S.17.