“Tahir Salahov” filmi təqdim olunub

Bakının 193 nömrəli orta məktəbində xalq rəssamı Tahir Salahovun ad günü münasibətilə rejissor Ziya Şıxlinskinin “Tahir Salahov” sənədli filmi təqdim edilib. Məktəbin direktoru Rəhim Hüseynov 1928-ci il noyabrın 29-da Bakıda anadan olmuş Tahir Salahovun həyat və yaradıcılığı haqqında məlumat verərək bildirib ki, Rusiya rəssamlıq akademiyasının vitse-prezidenti T.Salahov Sosialist Əməyi Qəhrəmanı, SSRİ-nin, Azərbaycanın və Rusiya Federasiyasının xalq rəssamı, SSRİ Dövlət mükafatı laureatı, dünyanın 20-dən artıq rəssamlıq akademiyasının və yaradıcılıq təşkilatının üzvüdür. Film rəssamın özü haqqında söhbəti ilə başlayır və onun söhbəti ilə də yekunlaşır. Rejissor diqqətə çatdırıb ki, filmin belə quruluşda çəkilməsini o, T.Salahovla birgə fikirləşib. Sənətkarın portret janrında yaratdığı bəstəkarlar Dmitri Şostakoviç, Qara Qarayev, Fikrət Əmirov, şairlər Rəsul Rza, Mirzə Ələkbər Sabir, violonçel ustası Mstislav Rostrapoviç və başqa mədəniyyət xadimlərinə həsr etdiyi əsərlər öz müəllifinə dünya şöhrəti gətirib. Qeyd edək ki, film Mədəniyyət və Turizm Nazirliyinin sifarişi ilə “Yaddaş” kinostudiyasında lentə alınıb. Ekran əsərinin ssenari müəllifi Toğrul Cuvarlı, operatoru Adil Abbasovdur.

HÜSNİYYƏ

525-ci qəzet.- 2010.- 1 dekabr.- S.7.