Xalq yazıçısı Anar və xalq şairi Fikrət Qoca ilə Ağcabədidə görüş keçirilib

Bugünlərdə Ağcabədidə dahi bəstəkar Üzeyir Hacıbəyovun adını daşıyan Qarabağ Muğam Mərkəzində Azərbaycan Yazıçılar birliyinin sədri, xalq yazıçısı Anar və Yazıçılar Birliyinin I katibi, xalq şairi Fikrət Qoca ilə oxucuların görüşü olub. Görüşə adıçəkilən bölgənin ziyalıları, yazarlar, müəllim və tələbələr qatılıb. Yığıncağı giriş sözü ilə açan Ağcabədi rayon icra hakimiyyətinin başçısı Şahid Məmmədov qeyd edib ki, xalq yazıçısı Anar və xalq şairi Fikrət Qoca Azərbaycan ədəbiyyatının inkişafında xüsusi rola malik olan sənətkarlardır. Hər iki söz ustası eyni zamanda Yazıçılar Birliyinin rəhbəri kimi söz sahiblərinin problemlərinin həll edilməsində, gənc yazarların qayğı və diqqətlə əhatə olunmasında müstəsna xidmətlər göstərir. Onların diqqət və qayğısı sayəsində Yazıçılar Birliyi Qarabağ bölməsinin fəaliyyəti də xeyli canlanıb, yeni yaradıcı ədəbi mühit formalaşıb. Bu baxımdan, bugünkü görüş də mühüm əhəmiyyət kəsb edir. Yazıçılar Birliyi Qarabağ bölməsinin rəhbəri şair Ənvər Əhməd, Azərbaycan Müəllimlər İnstitutu Ağcabədi filialının müəllimi Qərənfil Rzayeva, gənc yazarlar Məshəti, Gündüz Sevindik, Ağcabədi şəhər 3 saylı oprta məktəbinin direktoru Tofiq Zeynalov çıxış edərək Anar və Fikrət Qoca yaradıcılığının dəyərlərindən söz açaraq öz fikir və mülahizələrini bildiriblər. Çıxışlarda bu cür görüşlərin tez-tez keçirilməsinin vacibliyi də vurğulanıb. Gənc şairlərin ifa etdikləri şeirlər iştirakçılar tərəfindən maraqla qarşılanıb. Sonra söz alan Fikrət Qoca və Anar son vaxtlar Ağcabədidə həyata keçirilən quruculuq və abadlıq işlərinin geniş vüsət aldığını qeyd edərək qeyd ediblər ki, rayon icra hakimiyyəti tərəfindən digər sahələrdə olduğu kimi, bədii yaradıcılığa, şair və yazıçılara, xüsusilə də gənc yaradıcılara diqqət və qayğı artırılıb. Bildirilib ki, rayon icra hakimiyətinin başçısı Şahin Məmmədovun dəstəyi ilə bir neçə gənc yazarın kitablarının işıq üzü görməsi təqdirəlayiq hadisədir. Yazıçılar Birliyi də öz növbəsində bu istiqamətdə tədbirlərin həyata keçirilməsini nəzərdə tutub. Hörmətli qonaqlar böyük qayğı və məhəbbətlə qarşılandıqlarına görə rayon rəhbərliyinə, bütün ağcabədililərə öz minnətdarlıqlarını bildiriblər.

Görüş geniş konsert proqramı ilə başa çatıb.

Yəhya PAŞAZADƏ

525-ci qəzet.- 2010.- 14 dekabr.- S.7.