AŞPA həmməruzəçiləri Azərbaycanda görüşlər keçiriblər

Azərbaycan Respublikasının Prezidenti İlham Əliyev fevralın 10-da AŞPA-nın Monitorinq Komitəsinin Azərbaycan üzrə həmməruzəçiləri Andres Herkeli və Debona Qrexi qəbul edib. Görüşdə Azərbaycan ilə Avropa Şurası arasında əməkdaşlığın hazırkı vəziyyətinə və perspektivlərinə dair fikir mübadiləsi aparılıb. “Turan”ın məlumatına görə, AŞPA Monitorinq Komitəsinin məruzəçiləri ölkənin jurnalist təşkilatlarının və aparıcı qəzetlərinin rəhbərləri ilə də görüşüblər. Görüşdə “Ayna”-”Zerkalo” qəzetinin baş redaktoru və Azərbaycan Jurnalistlər Birliyinin sədri Elçin Şıxlı, “Azadlıq” qəzetinin direktoru Azər Əhmədov, İREX təşkilatının media sahəsində eksperti Ələsgər Məmmədli və Reporyorların Azadlıq və Təhlükəsizlik İnstitutunun direktoru Emin Hüseynov iştirak ediblər. E.Hüseynovun “Turan”a verdiyi məlumata görə, AŞPA nümayəndələrinə azad mətbuatın dururumu, jurnalistlər Qənimət Zahid və Eynulla Fətullayevin, habelə bloqqerlər Emin Milli və Adnan Hacızadənin həbsdə saxlanması faktları barədə məlumat verilib. E.Hüseynovun sözlərinə görə, AŞPA nümayəndələri bildiriblər ki, bu faktları öz məruzələrində əks etdirəcəklər. Müsavat Partiyasının başqanı İsa Qəmbərin AŞPA-nın Azərbaycan üzrə həmməruzəçilərilə görüşündə qarşıdakı parlament seçkiləri əsas müzakirə mövzusu olub. Bu barədə “Turan”a İsa Qəmbər bildirib. Milli Televiziya və Radio Şurasının (MTRŞ) sədri Nuşirəvan Məhərrəmli də fevralın 11-də Andres Herkel və Cozef Debona Qrexlə görüşüb. MTRŞ sədrinin köməkçisi Toğrul Məmmədovun verdiyi məlumata görə, N.Məhərrəmli Azərbaycanda televiziya və radio sahəsində görülmüş işlər, rəqəmsal yayıma keçid, yeni yaradılan teleradio yayımçılarının fəaliyyəti və parlament seçkisi ərəfəsində seçkiqabağı təbliğat və təşviqatın aparılması qaydaları haqqında məlumat verib. Şurası sədri qonaqları maraqlandıran sualları cavablandırıb. Görüşdə teleradio sahəsi ilə bağlı ətraflı fikir mübadiləsi aparılıb.

525-ci qəzet.- 2010.- 12 fevral.- S.3.