2010-un ilk “Ulduz”u
“Ulduz” jurnalının 2010-cu ildəki ilk sayı çap edilib. Dərgi Rüstəm Kamalın xalq yazıçısı Zəlimxan Yaqubun 60 illik yubileyinə həsr etdiyi “İnanc işığında” məqaləsi ilə açılır. Məqalədə xalq şairinin Azərbaycan ədəbiyyatındakı mövqeyindən söz açılıb: “Zəlimxan Yaqub yaradıcılığında ozan-aşıq sənəti ilə yazı mədəniyyətini mükəmməl surətdə birləşdirib müstəqil Azərbaycan dövlətinin romantik aurasını, energetikasını yaradan şairlərdən biridir. Milli-mənəvi dəyərlərimizin, etnik varlığımızın vəsfində və təbliğində danılmaz rolu var. Əslində Zəlimxan Yaqub poeziyası qutsal dəyərlər və inanc poeziyasıdır”.
Jurnalın bu nömrəsində Əbülfət Mədətoğlu, Osman Fərmanoğlu, Firuzə Məmmədli, Bəsti Əlibəyli, İbrahimxəlil, Elməddin, Rafiq Yusifoğlu, Zərəngiz Dəmirçi Qayalı, Eldar İsmayıl, Rəfail, Alim Məhərrəmli, Namiq Hacıheydərli, Şakir Xanhüseynli və Şahinə Könülün şeirləri dərc olunub.
Adil Mirseyidin dərgidəki “Güzgü metaforası” essesində güzgü haqqında abstrakt fikirləri öz əksini tapıb. Balayar Sadiqin “Bədii həqiqətin poetikası” yazısında şairə Firuzə Məmmədlinin yaradıcılığı araşdırılıb. Filoloq Yaşar Məmmədli “Yorğun ömrün akkordları” məqaləsində Saday Şəkərlinin “Ömrün yorğun kölgələri” kitabı haqqında qeydlərini qələmə alıb.
Vaqif Yusiflinin “Tənqid yarpaqları” başlığında toplanmış yazılarında Əyyub Qiyasın “Sonuncu büt”, Sevinc Mürvətqızının “Sən sevgidən yuxarısan” və Şəmşadın “Şəkillərin alın yazısı” kitabları haqqında fikir və düşüncələri yer alıb.
Professor Buludxan Xəlilovun “XI əsrin hikmət sahibi Əhməd Yəsəvi” məqaləsində adıçəkilən mütəfəkkirlə bağlı fikirlərini yazıya alıb. Nəsrsevərlər “Ulduz”da bu dəfə Mübariz Cəfərlinin hekayələri ilə tanış ola bilərlər.
Jurnalın ənənəvi “Anım” bölümündə Fərqanə Mehdiyevanın təqdimatında Ülvi Bünyadzadə haqqında düşüncələr və mərhum şairin şeirləri oxucuların ixtiyarına verilib.
Dərgidə keçən ilin ədəbiyyat üzrə Nobel mükafatçısı Herta Müllerlə bağlı yazı çap edilib.
Bilal Alarlının “Folklorda tekstoloji kilidlər və mətnaltı kodlar”, Günel Almazın “Sevgi və həyat duyğuları” yazıları, Ramiz Məmmədzadənin Qəşəm Nəcəfzadənin, Barat Vüsalın Bəsti Əlibəylinin yaradıcılığı haqqında rəyləri də bu sayda işıq üzü görüb.
SARA
525-ci qəzet.-
2010.- 19 fevral.- S.7.