Bəstəkar Sevda İbrahimovanın 70 illiyi qeyd olunub

Azərbaycan Bəstəkarlar İttifaqında xalq artisti, Üzeyir Hacıbəyli adına Bakı Musiqi Akademiyasının professoru, bəstəkar Sevda İbrahimovanın 70 illik yubileyilə bağlı tədbir təşkil edilib. APA-nın məlumatına görə, yubiley mərasimində çıxış edən Azərbaycan Bəstəkarlar İttifaqının sədri, xalq artisti Firəngiz Əlizadə yubilyarın həyat və yaradıcılığından danışıb. İttifaq sədri bildirib ki, Sevda İbrahimova dəyərli sənətkar olmaqla yanaşı, gözəl insan və yaxşı dostdur: “70 illik fəaliyyəti dövründə Sevda xanım Azərbaycan mədəniyyətinə layiqincə xidmət edib. Musiqi sənətimizə verdiyi töhfələr danılmazdır. Sevda xanımın yaş baxımından kompleksi yoxdur, çünki o hər zaman çox gözəl və təravətlidir, yenə də əvvəlki şövqlə çalışır və yaradır”. Tədbirdə çıxış edən Ailə, Qadın, Uşaq Problemləri üzrə Dövlət Komitəsinin sədr müavini Sədaqət Qəhrəmanova da yubilyarın yaradıcılığından rəğbətlə söz açıb, ona yeni uğurlar arzulayıb. Yubiley gecəsi Sevda İbrahimovanın əsərlərindən hazırlanmış konsert proqramı ilə davam etdirilib. Proqramda bəstəkarın “Qurbansız qalan tarım”, “Laylay”, “Ceylaya”, “Əzizlərimin xatirəsinə”, “Yaşa, ülvi məhəbbətim”, “Necə sevməyim səni”, “Məhəbbət işığı” və digər əsərləri ifa olunub.

525-ci qəzet.- 2010.- 20 fevral.- S.23.