Londonda Tahir Salahovun əsərlərinin sərgisi açılıb

Fevralın 18-də Londonun nüfuzlu “Sothebys” Qalereyasında dünya şöhrətli azərbaycanlı rəssam Tahir Salahovun əsərlərindən ibarət sərginin açılış mərasimi olub. Səfirlikdən APA-ya verilən xəbərə görə, “Görünməmiş Salahov” adlanan sərgiyə rəssamın Azərbaycan həyatının müxtəlif çalarlarını təsvir edən 30-dan artıq əsəri çıxarılıb.

Açılış mərasiminə Londonda akkreditə olunmuş diplomatik korpus nümayəndələri, britaniyalı sənətsevərlər, bu ölkədəki azərbaycanlı, türk və rus icmalarının təmsilçiləri, jurnalistlər qatılıb.

Qalereyanın direktoru Lord Poltimor məşhur rəssamın əsərlərinin Londonda nümayiş olunmasından məmnunluğunu bildirərək, Azərbaycana səfəri zamanı ölkənin zəngin incəsənət irsi ilə tanışlığından bəhs edib. Səfir Fəxrəddin Qurbanov isə T.Salahovun əsərlərindən ibarət sərginin Britaniyada təşkil olunmasını mühüm hadisə kimi qiymətləndirərək, mədəniyyətin xalqlar arasında körpü rolunu oynadığını vurğulayıb.

Sonda çıxış edən Tahir Salahov sərginin təşkilində əməyi olanlara minnətdarlığını bildirib.

Sərgi fevralın 25-nə qədər ictimaiyyət üçün açıq olacaq.

525-ci qəzet.- 2010.- 20 fevral.- S.23.