Azərbaycanlı dirijor məşhur “Karnegi holl”un səhnəsində

ƏYYUB QULİYEV NYU-YORKDAKI MÖHTƏŞƏM KONSERT SALONUNDA “OLİMPİYA” ORKESTRİNƏ DİRİJORLUQ EDİB

Nyu-Yorkdakı “Karnegi holl” konsert salonunda (“Carnegie Hall”) çıxış etmək hər bir musiqiçi üçün böyük müvəffəqiyyət sayılır. Burada keçirilən konsertlərin iştirakçıları yaradıcılıq yolunda önəmli bir uğura imza atmış olurlar. Belə bir nailiyyət bugünlərdə Azərbaycan musiqiçisinin də payına düşüb.

Fevralın 24-də “Karnegi holl” kimi nüfuzlu bir salonda istedadlı gənc dirijor, beynəlxalq müsabiqələr laureatı Əyyub Quliyevin konserti keçirilib. Dirijor verdiyi açıqlamada bildirilir ki, həmin axşam o, “Karnegi holl”da Nyu-Yorkun “Olimpiya“ Simfonik Orkestrinə dirijorluq edib. Konsert məşhur “Kolumbiya” agentliyi və Sankt-Peterburqun “Musiqi Olimpi” Fondu tərəfindən təşkil olunub.

“6 parlayan ulduz” adlanan qala-konsertdə Əyyub Quliyevlə bərabər beynəlxalq müsabiqələrin qalibləri – Şitvan Varday (violonçel – Macarıstan), Jesiq Li (tenor – Koreya Respublikası), Fenq Ninq (skripka – Çin), Yuliya Novikova (soprano – Rusiya) və Yohannes Fiəer (zərb alətləri – Almaniya) iştirak ediblər. Konsertin proqramında Motsart, Verdi, Puççini, Maskanyi, Delib və Rimski-Korsakovun operalarından ariyalar, parçalar, həmçinin, Ştraus, Ravel, Çaykovski və Massnenin müxtəlif janrlarda yazılmış simfonik, instrumental əsərləri yer alıb.

Qeyd etmək yerinə düşər ki, Əyyub Quliyev “Karnegi holl” salonunda çıxış edən ilk azərbaycanlı dirijordur. Həmin məşhur salon 1891-ci ildə istifadəyə verilib və onun səhnəsində ilk çıxışın dahi bəstəkar Pyotr İliç Çaykovskinin adıyla bağlı olması da çox əlamətdar bir məqamdır.

Solmaz ASLANOVA

525-ci qəzet.- 2010.- 26 fevral.- S. 7.