Azərbaycanın qısametrajlı filmləri beynəlxalq festivalda

Almaniyanın Detmold şəhərində keçirilən VI Beynəlxalq Kinofestivalda Azərbaycan da təmsil olunub. Festivala Azərbaycan, iki filmlə qatılıb: Günel Nəcəfzadənin “Tərəddüd” (“Up & Down”) və Tamilla İbrahimovanın ‘Perpetuum Mobile’. “Tərəddüd” filminin ssenari müəllifi Səbinə Hüseynlidir. Qısametrajlı filmdə əsas rolları Mələk Abbaszadə və Rasim Cəfərov ifa ediblər. Qeyd edək ki, film ABŞ-ın Azərbaycandakı səfirliyi və R.İbrahimbəyovun Beynəlxalq Kino Məktəbinin birgə proqramı çərçivəsində istehsal olunub. Festival proqramında əsas vurğu gənc kinematoqrafçıların üzərindədir. Bu məqsədlə festival çərçivəsində ustad dərslərinin keçirilməsi də planlaşdırılır. Festivalda Almaniya və Azərbaycanla yanaşı Amerika, İngiltərə, Estoniya, Serbiya, Fransa, İspaniya, Sinqapur, Çexiya, Danimarka, Finlandiya, Rusiya, Xorvatiya, Boliviya, Avstriya, Macarıstan, Norveç, Polşa, Türkiyə, Kolumbiya, Monako kimi ölkələr də iştirak edir.

SARA

525-ci qəzet.- 2010.- 12 iyun.- S.21.