İncəsənət Muzeyində “Qadın ətri”

8 mart Beynəlxalq Qadınlar Günü münasibətilə Rüstəm Mustafayev adına Azərbaycan Dövlət İncəsənət Muzeyində “Qadın ətri” adlı təsviri sənət sərgisi açılacaq. Hüseyn Cavidin “Bəşəriyyət qadınla yüksələcək” misrası ekspozisiya üçün deviz olaraq seçilib. Mədəniyyət və Turizm Nazirliyinin mətbuat katibi Zöhrə Əliyevanın APA-ya verdiyi məlumata görə, müxtəlif nəsillərə məxsus sənətkarların yaradıcılığını təmsil edən bu sərgidə fərqli üslub və cərəyanlar öz əksini tapıb. Sərgidə korifey fırça ustaları Mikayıl Abdullayev, Oqtay Sadıqzadə, Toğrul Nərimanbəyov, Vəcihə Səmədova ilə yanaşı, Sakit Məmmədov, Niyaz Nəcəfov, Elşən Sərxanoğlu və digər müasir rəssamların da əsərləri tamaşaçıların ixtiyarına veriləcək. Açılış mərasimi martın 5-də olacaq.

525-ci qəzet.- 2010.-2 mart.- S. 7.