Kubada Azərbaycan Mədəniyyət Günləri yekunlaşıb

Martın 3-6-da Kubada Azərbaycan-Kuba hökumətlərarası komissiyasının növbəti üçüncü iclası ilə eyni vaxtda keçirilən Azərbaycan Mədəniyyəti Günləri başa çatıb. Bu barədə Mədəniyyət və Turizm Nazirliyinin mətbuat xidmətindən məlumat verilib. Mədəniyyət günlərində iştirak etmək üçün Kubaya 50-yə yaxın incəsənət xadimini, mətbuat işçilərini və texniki heyəti əhatə edən bir qrup yollanıb. Azərbaycan Mədəniyyət Günlərinin açılış konserti Havananın məşhur “Mella” teatrında olub. Konsertdə Azərbaycanın mədəniyyət və turizm naziri Əbülfəs Qarayev, ölkəmizin Kubadakı səfiri Aqşin Mehdiyev, hökumətlərarası komissiyanın nümayəndələri, Kubanın hökumət rəsmiləri iştirak ediblər. Havanadan başqa, Azərbaycan sənətçiləri Kubanın Matansaz əyalətində də konsert veriblər. Mədəniyyət günləri çərçivəsində Havananın Xose Marti adına Milli Kitabxanasında Azərbaycanı tərənnüm edən fotosərgi və milli geyimlərin nümayişi təşkil olunub.

SARA

525-ci qəzet.- 2010.- 11 mart.- S. 7.