Borçalıdakı “Sarvan” rəqs qrupu yeni mükafatlar qazanıb

Gürcüstanda fəaliyyət göstərən Azərbaycanlıların Mədəniyyət Mərkəzinin (AMM) nəzdindəki “Sarvan” rəqs qrupu kuboka layiq görülüb. Bu barədə APA-nın Gürcüstan bürosuna AMM-in mətbuat katibi Nərgiz Əliyeva bildirib. Onun sözlərinə görə, Gürcüstan paytaxtındakı İdman Dzüdo Kompleksində Tiflis meriyasının dəstəyi ilə ilk dəfə olaraq Gürcüstan Müasir və estrada rəqsləri Federasiyası “Birinci gürcü rəqs olimpiadası” keçirilib. “Olimpiadanı keçirməkdə məqsəd istedadlı kollektivlərin üzə çıxarılması və eyni zamanda Avropa çempionatlarında Gürcüstanı layiqincə təmsil edə bilən rəqs qruplarını seçmək idi. Bundan əvvəlki festivallarda çıxışlarını böyük maraqla izlədiyini və bəyəndiyini söyləyən Federasiyanın prezidenti Valentina Kuzmedi Gürcüstanda yeganə folklor rəqs qrupu kimi tanınan və Azərbaycanlıların Mədəniyyət Mərkəzinin nəzdində fəaliyyət göstərən “Sarvan” folklor rəqs qrupunu bu möhtəşəm olimpiadada iştirak etmək üçün dəvət etdi. Bizim folklor rəqs qrupunun üzvləri sevinclə həmin olimpiadada iştirak etdilər”, – deyə o bildirib. Tədbirə yüzlərlə rəqs qrupu qatılıb. İştirakçılar 30 nominasiyada mübarizə aparıblar. Gürcüstanın bütün regionlarından, eləcə də erməni rəqs qrupları da müxtəlif rəqslər nümayiş etdiriblər. “Bu tədbirdə “Sarvan” folklor qrupu 4 Azərbaycan xalq rəqsini təqdim etdi. Nəticədə 3 qızıl, 1 bürünc medal, diplomlar və kubok ilə təltif olundu”, – deyə mətbuat katibi vurğulayıb. “Sarvan” folklor rəqs qrupunun bədii rəhbəri Cəmilə Məmmədova APA-ya verdiyi açıqlamada bildirib ki, münsiflər heyətinin üzvlərindən olan YUNESKO-nun üzvü, beynəlxalq dərəcəli hakim, Ümumrusiya rəqs Olimpiadasının banisi Andrey Kokoulin, müasir rəqslər üzrə hakim Tea Qoçiridze (ABŞ),Teymuraz Metreveli (Gürcüstan), Gürcüstanın Müasir və Estrada rəqslərinin Federasiyasının vitse-prezidenti Nataliya Diqmelaşvili və başqaları “Sarvan” folklor rəqs qrupunun ifa etdiyi rəqsləri bəyəndiklərini bildiriblər.

525-ci qəzet.- 2010.- 1 may.- S.26.