İçərişəhərdə Nikulinə abidə

Bakıda – İçərişəhərdə görkəmli rus-sovet kinoaktyoru Yuri Nikulinin abidəsi ucaldılıb. Abidə “Brilliant əl” filminin çəkilişlərinin reallaşdığı ərazidədir. Bu barədə Nazirlər Kabineti yanında “İçərişəhər” Dövlət Tarix Memarlıq Qoruğu İdarəsinin direktoru Mikayıl Cabbarov məlumat verib. Sözügedən abidənin, filmin baş qəhrəmanının yıxılan zaman “Lənət şeytana” dediyi yerdə açılış mərasiminin keçirilməsi nəzərdə tutulub. Abidə “Yıxılan Nikulin” adlanacaq. İdarənin direktoru hansı aktyora – Yuri Nikulinə, yoxsa Andrey Mironova İçəri şəhərdə heykəl qoyulması barədə müzakirələrin getdiyini və sonda Yuri Nikulinə abidə ucaldılmasına qərara verildiyini bildirib. Qeyd edək ki, “Brilliant əl” filmi ölkə ekranlarına çıxan kimi prokat lideri oldu – təkcə 1969-cu ildə o, 76,6 milyon tamaşaçı topladı. Film Rusiya kino tarixində ən məşhur ekran əsərlərindən biridir. Filmin ssenari müəllifləri Leonid Qayday, Yakov Kostyukovski, Moris Slobodskoy, rejissoru Leonid Qaydaydır. Baş rolları Yuri Nikulin (Semyon Qorbunkov), Anatoli Papanov (şefin köməkçisi), Andrey Mironov (Geşa), Nina Qrebeşkova (Nadya) və başqaları ifa edirlər.

SARA

525-ci qəzet.- 2010.- 5 may.- S.7.