Faşizm üzərində Qələbənin 65 illiyilə bağlı sərgilər açılıb

M.F.Axundzadə adına Milli Kitabxanada İkinci Dünya müharibəsində faşizm üzərində qələbənin 65 illiyinə həsr olunuş “Qələbə-65” kitab sərgisi təşkil olunub.

Tədbiri açan kitabxananın direktoru, əməkdar mədəniyyət işçisi Kərim Tahirov çıxışında qələbənin qazanılmasında Azərbaycandan cəbhəyə yollanmış 600 mindən çox insanın böyük əməyi olduğunu önə çəkib: “Azərbaycan diviziyaları Qafqazdan Berlinə qədər şərəfli döyüş yolu keçib. Həmvətənlərimizin təxminən 130 nəfəri Sovet İttifaqı Qəhrəmanı adına layiq görülüb, 30 nəfəri “Şöhrət” ordeni ilə, 170 mindən artıq Azərbaycan əsgər və zabiti müxtəlif orden və medallarla təltif edilib”.

Mədəniyyət və Turizm Nazirliyinin şöbə müdiri, şair Vaqif Bəhmənli dövlətimizin müharibə iştirakçılarına diqqət və qayğısından danışıb. Şöbə müdiri qələbənin 65 illiyi ilə əlaqədar Mədəniyyət və Turizm Nazirliyinin həyata keçirdiyi tədbirlərdən də ətraflı söz açıb.

Tədbirdə Qələbəyə həsr olunmuş müxtəlif dillərdə 200-dən artıq kitab və jurnal sərgilənib, həmçinin Milli Kitabxana əməkdaşlarının hazırladıqları “Azərbaycan aviatorları Böyük Vətən Müharibəsində” biblioqrafiyasının təqdimatı keçirilib.

Azərbaycan İstiqlal Muzeyində də Qələbənin 65 illiyinə həsr olunmuş “Tarixin ibrət dərsləri” adlı sərgi açılıb. Sərgidə Sovet İttifaqı qəhrəmanları Həzi Aslanovun, Mehdi Hüseynzadənin, Səlahəddin Kazımovun, İsrafil Məmmədovun, Məzahir Quliyevin muzeyin fondunda saxlanılan şəxsi əşyaları, Azərbaycan Dövlət kino-foto sənədlər arxivindən fotoşəkillər, plakat kolleksiyası və rəsm əsərləri nümayiş etdirilir.

Muzeyin 3 zalında “Azərbaycan 1941-45-ci illər müharibəsində”, “Azərbaycanın Qızıl Ulduzları”, “1941-45-ci illər müharibəsini əks etdirən plakatlar və rəsm əsərləri” mövzularında sərgi nümayiş etdirilib.

SARA

525-ci qəzet.- 2010.- 8 may.- S.20.