“İçərişəhəri tanıyaq, tanıdaq və qoruyaq” layihəsinə start verilib

“Bakı – Dirçəliş” İctimai Birliyi “İçərişəhəri tanıyaq, tanıdaq və qoruyaq” adlı layihənin icrasına başlayıb. Layihə çərçivəsində İctimai Birlik sözügedən tarixi-memarlıq abidəsinin ərazisində araşdırmalara başlayacaq, buranın sakinlərinin qədim ənənələri öyrəniləcək və toplanan məlumatlar əsasında əyani vəsaitlər hazırlanacaq. İçərişəhərlə bağlı layihənin rəhbəri Razi Abasbəylinin sözlərinə görə, bu işin reallaşdırılmasında başlıca məqsəd həm də turizm potensialının öyrənilməsi və təbliğidir: “Bununla əlaqədar çoxşaxəli tədbirlər həyata keçiriləcək. Yəni layihənin adından göründüyü kimi əsas prioritet Azərbaycan əhalisinə yönəlik tanıtım, daha sonra bu qədim tarixi abidənin dünyaya tanıdılması və nəhayət qorunması və mühafizəsi ilə bağlıdır. Layihənin icrası müddətində xeyli sayda insan prosesə cəlb ediləcək. İçərişəhərlə bağlı mütəmadi araşdırmalar aparmış tarixçi-alimlərlə söhbətlər olacaq. Tarixi abidələrin mühafizə edilməsi, qoruq ərazisində yerləşən abidələrin indiki və keçmiş vəziyyəti araşdırılacaq. Eyni zamanda hazırda turizm üzrə təhsil alan gənc tələbələrlə könüllülərdən ibarət təbliğat-təşviqat qrupları formalaşdırılacaq. Digər tərəfdən Azərbaycanın tarixi abidlələrinin öyrənilməsi, qorunması və təbliği istiqamətində həyata keçirəcəyimiz işlər bundan sonra da geniş miqyasda davam etdiriləcək”.

Qeyd edək ki, layihə Prezident yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə gerçəkləşdirilir.

Günel MUSAYEVA

525-ci qəzet.- 2010.- 13 may.- S.7.