Firəngiz Əlizadənin “İntizar”ı yeni quruluşda

Heydər Əliyev Fondu yeni beynəlxalq musiqi layihəsini – çağdaş Azərbaycan bəstəkarlıq məktəbinin görkəmli nümayəndələrindən biri olan Firəngiz Əlizadənin “İntizar” operasının yeni quruluşda premyerasını təqdim edib. Premyeraya dövlət başçısı İlham Əliyev və xanımı Mehriban Əliyeva tamaşa ediblər.

Librettonun müəllifi “Üns” Yaradıcılıq Səhnəsinin bədii rəhbəri, professor Nərgiz Paşayevadır. Operanın yeni quruluşunu beynəlxalq bədii heyət hazırlayıb. Tamaşanın quruluşçu rejissoru Moskva “Helikon-Opera” Teatrının bədii rəhbəri, Rusiyanın xalq artisti Dmitri Bertman, quruluşçu rəssam Hartmut Şorqhofer, dirijor Vladimir Ponkin, xoreoqraf Edvald Smirnov, xormeyster xalq artisti Gülbacı İmanovadır. Operanın yeni quruluşu müasir Avropa musiqili teatr rejissurası prinsiplərinə əsaslanıb. Əsərdə Azərbaycan tarixinin yaxın keçmişində baş verən faciəli hadisələr, Xeyirlə Şərin əbədi mübarizəsi kimi ümumbəşəri mövzu öz əksini tapıb.

SARA

525-ci qəzet.- 2010.- 14 may.- S.7.