Göyçayda xalq şairi Rəsul Rzanın ev-muzeyi istifadəyə verilib

Xalq şairi Rəsul Rzanın Göyçay şəhərindəki ev-muzeyinin əsaslı təmirdən sonra açılışı olub. APA-nın yerli bürosunun məlumatına görə, tədbirdə mədəniyyət və turizm naziri Əbülfəs Qarayev, Azərbaycan Yazıçılar Birliyinin sədri Anar, rayon icra hakimiyyətinin başçısı Mənsur Məmmədov, xalq şairi Fikrət Qoca R.Rzanın ev-muzeyinin açılışı münasibətilə ədəbiyyatsevərləri təbrik ediblər. Rəsul Rza yaradıcılığından, xalq şairinin həyat və fəaliyyətindən bəhs edən natiqlər sənətkarın xatirəsinin əbədiləşdirilməsi üçün doğulduğu Göyçay şəhərində ev-muzeyinin fəaliyyət göstərdiyini, orta məktəblərdən və küçələrdən birinə onun adının verildiyini, büstünün qoyulduğunu diqqətə çatdırıblar. Əsaslı təmirdən sonra istifadəyə verilən muzeydə 700-ə yaxın eksponat, eləcə də xalq şairinin foto şəkilləri və rəsm əsərləri, kitabları, diplom və mükafatları, onun şəxsi əşyalarından tar, ov tüfəngi, piano, çap makinası, qəlyan, eynək qorunur. Mədəniyyət və turizm naziri Əbülfəs Qarayev muzeyin 18 May Beynəlxalq Muzeylər Günü ərəfəsində istifadəyə verilməsini əlamətdar hadisə kimi qiymətləndirib. Tədbirdə nazir Əbülfəs Qarayevə, rayon icra hakimiyyətinin başçısı Mənsur Məmmədova, ev-muzeyin direktoru Solmaz Həsənovaya, rejissor Əhliman Qafarova və heykəltaraş Azad Zeynalova Beynəlxalq Rəsul Rza mükafatı təqdim olunub. Çıxışlardan sonra rəmzi qırmızı lent kəsilib və şairin ev-muzeyi ilə tanışlıq başlayıb. Rəsul Rzanın ev-muzeyində şair və yazıçıların yubiley tədbirlərinin, gənc yazarlarla görüşlərin, məktəblilərə ədəbiyyat dərslərinin keçirilməsi üçün şərait yaradılıb.

525-ci qəzet.- 2010.- 15 may.-S.17.