“Rəngli arzular” adlı foto sərgisi açılıb

“Müasir İncəsənət Mərkəzi”nin sərgi salonunda “Birliyə Doğru” Əlil və Kimsəsiz Uşaqlara Qayğı İctimai Birliyi və Azərbaycanda Birləşmiş Millətlər Təşkilatının Keçmiş Təcrübəçiləri Assosiasiyası “Rəngli arzular” adlı foto sərgi keçirib.

Tədbirdə çıxış edən “Birliyə Doğru” təşkilatının rəhbəri Zərifə Quliyeva deyib ki, “Rəngli arzular” fotosərgisi cəmiyyətdə özünü təsdiq etməkdə çətinlik çəkən uşaqların həyatlarından müəyyən anları göstərir: “Müasir dövrümüzdə ailə qayğısından məhrum olmuş uşaqların taleyi hər birimizi maraqlandırmalıdır. Kadrlara köçürülən bu anlarda bizim hər birimizə ünvanlanmış sözləri oxumaq olar”. Azərbaycanda Birləşmiş Millətlər Təşkilatının Keçmiş Təcrübəçiləri Assosiasiyasının Prezidenti Aysel Əsgərova bildirib ki, bu uşaqlar öz problemləri ilə tək-bə-tək qalırlar və biganəlik onların həyatında adi bir haldır. Beləliklə, sərginin əsas məqsədi sosial məsuliyyət kimi dəyəri təbliğ etməkdir.

Sərgidə bir neçə internat məktəbindən və uşaq evlərindən olan balacaların 50-yə yaxın fotosu nümayiş etdirilib. Qeyd edək ki, maraqlı anları lentə köçürən tanınmış fotoqraflar İsa Aydın, Məryəm və Türkan Hüseynovadır.

GÜNEL

525-ci qəzet.- 2010.- 22 may.- S.17.