“40-cı qapı” filminin geniş təqdimatı olub

Heydər Əliyev Sarayında “40-cı qapı” filminin təqdimatı keçirilib. Təqdimat mərasimi tanınmış muğam ustası, xalq artisti Alim Qasımovun ifası ilə başlayıb. Sonra filmin yaradıcı qrupu ekran işi haqqında məlumat verib.

Ssenari müəllifi və quruluşçu rejissor Elçin Musaoğlu filmdəki hadisələrin Azərbaycan xalqı üçün ağır olan 1990-cı illərin əvvəlində 14 yaşlı Həsənin taleyindən bəhs etdiyini bildirib: “Bakının 40 kilometrliyində yaşayan uşaq anasının himayəsində böyüyür. Rusiyaya qazanc dalınca gedən atasının ölüm xəbəri gəlir. Oğlan təhsilini atıb bütün çətinliklərdən keçmiş anasına maddi dəstək vermək məqsədilə işləmək fikrinə düşür. O özünü və anasını dolandırmaq məcburiyyətində qalır”.

Mərasimdə filmin Mədəniyyət və Turizm Nazirliyinin sifarişi ilə “Ritm Production”da çəkildiyi vurğulanıb. Film on dörd ölkədə, o cümlədən Almaniya, Belçika, Estoniya, Rusiya və Çexiyada keçirilən festivallarda yüksək mükafatlara layiq görülüb. 2009-cu ilin aprelində isə ABŞ-ın Hyuston şəhərində keçirilən Beynəlxalq Kinofestivalda “Ən yaxşı xarici film” nominasiyası üzrə qızıl mükafat alıb.

Filmdə rolları xalq artistləri Elmira Şabanova, Rafiq Əzimov, əməkdar artist Gülər Nəbiyeva, Həsən Səfərov və digərləri ifa edirlər.

Mərasim filmin nümayişi ilə başa çatıb.

SARA

525-ci qəzet.- 2010.- 22 may.- S.16.