Vokalçı Fərid Əliyev daha bir uğura imza atıb

Azərbaycan Dövlət Musiqili Komediya Teatrının 100-cü mövsümünün ilk tamaşası olan “Arşın mal alan” operettasının qəhrəmanı Əsgər bəy – Fərid Əliyev may ayının 18-də Yekaterinburqda SSRİ xalq artisti V.A.Kuroçkina adına gənc opera və müzikl artistlərinin III beynəlxalq müsabiqəsində iştirak edərək, birinci yerə layiq görülub. Bu barədə teatrın mətubat xidmətindən verilən məlumatda deyilir.

Solist-vokalist kimi öz imkanlarından geniş istifadə edən, gözəl aktyorluq qabiliyyətinə malik Fərid Əliyev 1999-cu ildən Dövlət Musiqili Komediya Teatrının solistidir. Səsinin cazibəsi və məlahətini ifa etdiyi obrazın xarakterinə uyğun ifadəli, emosionallıqla dəyişmədə böyük təcrübəyə malik aktyor teatrda işlədiyi illər ərzində həm Rus, həm də Azərbaycan bölmələrində tamaşaya qoyulan “Şən dul qadın” (F. Leqar), “Maritsa”, “Silva” (İ. Kalman), “Çılğın Qaskoniyalı” (Q.Qarayev), “Talelər qovuşanda” (R.Hacıyev, F.Zöhrabov), “Volqalı canan” (R. Mustafayev, C. Məmmədov), “Aldın payını, çağır dayını” (V.Adıgözəlov, Anar), “O olmasın, bu olsun”, “Arşın mal alan” (Ü.Hacıbəyli) kimi tamaşalarda baş rolları ifa edərək maraqlı obrazlar silsiləsi yaradıb.

HÜSNİYYƏ

525-ci qəzet.- 2010.- 25 may.- S.7.