Aşıq Musanın 125
illiyi ilə bağlı tədbir keçirilib
Rəşid Behbudov adına Dövlət
Mahnı Teatrında Qaraçöplü Aşıq
Musanın 125 illiyinə
həsr olunan yubiley gecəsi təşkil edilib. Tədbiri pedaqoji elmlər namizədi Fərhad Xubanlı açaraq, aşığın zəngin
yaradıcılığından danışıb, onun həm sənətkar, həm də insan kimi dəyərindən
bəhs edib. Aşıqlar
Birliyinini sədri Zəlimxan Yaqub Qaraçöplü
Aşıq Musanın zəngin aşıq ədəbiyyatımızın
görkəmli nümayəndələrindən biri
olduğunu bildirib: “Qaraçöplü Aşıq Musa zəngin
aşıq ədəbiyyatımızın hələ layiqli
qiymətini almamış görkəmli nümayəndələrindəndir”.
Professor Məhərrəm Qasımlı Aşıq Musanını yaradıcılıq ənənələrinin Xəstə Qasımla bağlılığını vurğulayıb.
Folklorşünas Elxan Məmmədli, Hacan Hacıyev, Borçalı Cəmiyyətinin sədri Zəlimxan Məmmədli Qaraçöplü Aşıq Musa sənətinin böyüklüyündən danışıb, aşığın qoşma və gəraylılarından nümunələr söyləyiblər. Tədbirdə Aşıq Məmməd Sadaxlı və sənətşünaslıq namizədi Fəzail Miskinin də çıxışları maraqla qarşılanıb.
Ədəbi-bədii gecə saz ifaçılarının və xanəndələrin çıxışları ilə davam etdirilib.
Tədbirdə yazıçı Nəriman Əbdülrəhmanlının tərtib etdiyi “Musa eldən aralanmaz” adlı kitabın təqdimatı da keçirilib. Kitabda Qaraçöplü Aşıq Musanın qoşquları, söyləmələri, onun haqqında araşdırmalar və el arasında danışılan xatirələr toplanıb. N.Əbdülrəhmanlı kitaba yazdığı önsözdə Aşıq Musanın qaraçöplülər sayəsində tarixin yaddaşına köçdüyünü qeyd edib: “Nə vaxtsa bu azman el sənətkarının haqqında sənədli film çəkiləcəyinə, səsinin təkcə kitabdan yox, ekrandan eşidiləcəyinə inanırıq. Çünki 125 yaşlı Aşıq Musa yalnız mənsub olduğu nəslin yox, Qaraçöpün, Borçalının, bütövlükdə Azərbaycan saz-söz sənətinin bənzərsiz şəxsiyyətidir”.
Aşıq Musa haqqında Fərhad Xubanlının, Azad Ozan Kərimlinin, Dilqəm Osmanlının fikirləri, həmçinin digər yazılar nəşrdə öz əksini tapıb.
Kitaba aşığın ustadnamələri, gözəlləmələri, təcnis və qəzəlləri, ithafları, deyişmələri, açmaları, hərbə-zorbaları və başqa poetik nümunələr daxil edilib.
GÜNEL
525-ci qəzet.-
2010.- 25 may.- S.7.