“Ulu xalq-Ulu sənət” Xalça Muzeyində

“Humay” Milli Mükafatçısı, Azərbaycan Rəssamlar İttifaqının üzvü Rauf Əbdülhüseynoğlunun “Ulu xalq- Ulu sənət” adlı fərdi yaradıcılıq sərgisi açılıb. Sərgi Mədəniyyət və Turizm Nazirliyinin dəstəyi ilə təşkil edilib və 28 May Respublika gününə həsr olunub. Muzeyin direktoru, sənətşünaslıq namizədi, professor Röya Tağıyeva giriş sözü ilə çıxış edərək Azərbaycanda ilk və yeganə keçə sənəti ilə məşğul olan Rauf Əbdülhüseynoğlunun seçdiyi yaradıcılıq yolundan danışıb: “O öz yaradıcılığında, demək olar ki, unudulmuş, lakin unikal sənət nümunələri olan bədii keçə sənətini yenidən dirçəltmək, ona yeni nəfəs vermək kimi çox lazımlı və mühüm bir işə sərf edən istedadlı rəssamdır. Keçəçilikdə sənətdə mövcud olan bütün janrları sınaqdan keçirməklə sübut edib ki, bu texnikada çox şeyə nail olmaq mümkündür. Əldə etdiyi ən böyük sənət uğuru isə budur ki, xalçalarımız kimi keçəni də, ucalara qaldırıb”.

Rəssamlar İttifaqının katibi, xalq rəssamı Ağəli İbrahimov rəssamın keçəçilik sənətinin bütün janrları üzrə yüksək peşəkarlıqla yaratdığı əsərlərin müasirliyindən və mövzu rəngarəngliyindən söhbət açıb: “Rauf Əbdülhüseynoğlu unudulmaqda olan keçəçilik sənətinə yeni ruh, yeni nəfəs gətirib. Bunu onun “Hünər meydanı”, “Güllərin rəqsi”, “Yarımçıq qalmış mahnı” və digər əsərlərindən də görmək mümkündür”.

İttifaqın şöbə müdiri, əməkdar incəsənət xadimi Ənvər Qarayev salona daxil olarkən özünü Dədə Qorqud dövründə hiss etdiyini, rəssamın bir il öncə də çox maraqlı sərgi ilə sənətsevərlərin görüşünə gəldiyini bildirib.

“Biz Rauf Əbdülhüseynoğlu ilə bir küçədə yaşamışıq, on il bir məktəbdə oxumuşuq. Uşaqlıqdan bizim çox maraqlı söhbətlərimiz olub. Raufda rəssamlığa həvəs hələ uşaq yaşlarından yaranıb. Atası bu işdə ona çox kömək edib. Atası ailənin böyük olmasına baxmayaraq Rauf üçün o dövrdə baha olan karandaşlar, boyalar, fırçalar, kitablar alıb gətirir, ona müəyyən istiqamətlər verirdi. Biz uşaqlarla Raufgilə gedəndə özümüzü sanki Luvr muzeyində hiss edirdik. Sərgilənən əsərlərə baxanda mən öz uşaqlığımı gördüm. Bəlkə siz də bu əsərlərə baxsanız öz uşaqlığınızı, nənələrinizi görəcəksiniz. Bu rəssam Rauf Əbdülhüseynoğlunun uğurudur. Mən rəssama uğurlar arzu edirəm”. Bu sözləri tədbirdə millət vəkili Aydın Mirzəzadə səsləndirib.

Çıxış edənlər rəssamın əsərlərinin Amerika Birləşmiş Ştatları, İsveç, Hollandiya, Türkiyə, Rusiya, İspaniya, İngiltərə və digər ölkələrin muzey və şəxsi kolleksiyalarında saxlanıldığını qeyd ediblər.

Hüsniyyə İSMƏTQIZI

525-ci qəzet.- 2010.- 28 may.- S.26.