“Nə zamansa bu nişanda bir atam vardı”
(Əvvəli ötən
şənbə sayımızda)
“Nə xoşbəxt imişəm
bir zaman Allah
Xəbərim olmayıb bu səadətdən”
Əli Kərim
KİÇİK BİR HAŞİYƏ
Universitetin
birinci kursunda oxuyurdum. Mənim təhsil aldığım bina ilə
atamın dərs dediyi bina bir-birlərinə yaxın məsafədə
idi. Hər iki bina keçmiş Kommunist,
indiki İstiqlal küçəsində yerləşirdi.
Bir dəfə bilmirəm nə işləsə
bağlı atamın dərs dediyi filoloji fakültəyə
getmişdim. Tənəffüs vaxtı
idi. Atam dəhlizdə pəncərənin
önündə dayanıb siqaret çəkirdi. Yaxınlaşdım. Elə
sözümü deyib geri dönmək istəyirdim ki, atam birdən
siqaretini cəld arxasında gizlətdi.
– Ay ata nə oldu? Niyə belə etdin – deyə soruşub atam baxan tərəfə
baxdım.
Atamın ən
sevimli müəllimi professor Mir Cəlal müəllim dəhlizin
o biri başından gəlirdi. Atam onu görüb
siqaretini arxasında gizlətdi ki, müəllimi onu siqaret
çəkən görməsin. Mir Cəlal müəllim
də atamı siqaret çəkən görüb
üzünü yana tutub özünü
elə göstərdi ki, guya atamı, sevimli tələbəsini
görməyib.
Mir Cəlal
müəllim, görünür atama nəsə söz demək
istəyirdi.
Amma vaxtilə tələbəsi olan, indi isə eyni kafedrada dərs
deyən atamın onu görüb siqaretini arxasında gizlətməsini
başa düşüb keçmiş tələbəsinin
narahat olmayıb rahat siqaretini çəksin deyə, ona
yaxınlaşmadı elə bircə kəlmə:
– Bəxtiyar, sonra kafedraya gələrsən,
sənə deyiləsi sözüm var – dedi.
İndi fikir
verin bundan böyük mədəniyyət, bundan böyük
demokratiya, bundan böyük böyüyə hörmət,
bundan böyük böyüyün müdrikliyi varmı? Şəxsən
mən görmürəm.
Bu adi və kiçik
bir epizodda böyüyə olunan hörmət,
böyüyün də kiçiyə qarşı
qayğısı ehtiramla göstərilir.
Atam
özündən böyüyə olan bu hörməti, bu
ehtiram əlamətini, bu qaydanı heç bir kitabda, heç
bir yazıda oxumamışdır. Və mən yüz faiz əminəm
ki, bunu ona heç kim deməmişdir. Bu xüsusiyyət, bu adət ona kökdən, zatdan
gələn qan yaddaşında olub. Nəsildən-nəslə
keçib.
Çəkəndir bəlkə
də
bayaqdan bəri
Yanır, siqar
üçün yanır ciyəri
Çəkməyir,
yanımda
çəkməyir ancaq
Bizim qoca Şərqin adətinə
bax
Pismidir?
Bir pislik görməyirəm
mən
Əgər pis deyilsə
bəs onda nədən
Bu gözəl adətlər
tez unudulsun?
Böyüyə ehtiram belə
pis olsun?...
B.Vahabzadə
“Yollar və oğullar” poemasından
Demək bu adət,
bu mədəniyyət, bu ənənə kökdən gəlir,
daxildən gəlir. Heç kim bunu heç bir yerdə
yazmır, heç kim heç nəyi heç kimə demir,
öyrətmir. Mənə də heç kim
bu adətləri bu qaydaları öyrətməyib, deməyib.
Bütün bunların hamısı mənə
qan yaddaşı ilə atamdan keçib. Bütün
bunların hamısını mən atamdan əxz eləmişəm.
Mən də
atamın yanında heç bir vaxt siqaret çəkməmişəm. Heç atam
ömrünün sonuna qədər də bilmədi ki, mən
siqaret çəkirəm ya yox. Heç
bir vaxt həyat yoldaşımın adını atamın
yanında çəkməmişəm. Uşaqlar
körpə ikən heç bir zaman atamın yanında
onları qucağıma alıb əzizləməmişəm.
Heç bir zaman atamın yanında
uzanmamışam. Gəldiyi zaman dik
qalxmışam. Heç bir zaman atamın
yanında alt köynəyində oturmamışam. Heç bir zaman atamın yanında üz
qırxmamışam. Heç bir zaman, heç bir zaman,
heç bir zaman...
Bütün
bunların heç birini atam mənə qadağan etməmişdi. Əlbəttə,
yox. Atam mənə deməmişdi ki, ay
oğul, filan işi filan cür eləmə icazə vermirəm.
Əksinə... Atam mənə hədsiz dərəcədə
sərbəstlik, müstəqillik verib. Amma
onun gözlə görünməyən, dillə deyilməyən
hərəkətləri ilə yaratdığı sərhəddən
də kənara çıxmaq olmazdı. Arada
çox qalın bir pərdə var idi. Bu
pərdəni isə nə mən, nə də o əbədi
ayrılığa qədər aradan götürmədik.
İndi
bütün bunları xatırladıqca bu sətirləri
yaza-yaza fikirləşirəm ki, İlahi... bütün bu adi,
adidən də adi, amma gözəl və müqəddəs
adət-ənənəyə riayət etməkdən mən
necə də zövq almışam. Hədsiz dərəcədə
ləzzət duymuşam. Atama qarşı
belə itaətkar olmağımdan həzz almışam.
Sözsüz ki, bu
yazılmamış, amma əməl olunan adətləri hər
hansı bir amerikalı, avropalı, rus lap elə deyək ki,
bugünkü türk haradasa oxusa, kimdənsə eşitsə
və yaxud da kənardan durub bizi müşahidə etsə elə
başa düşər ki, atam despot bir adam
olub, övladına zülm verib. Amma xeyr. Qətiyyən yox. Atamın mənə
qarşı olan məhəbbətinin, sevgisinin həddi-hüdudu
olmayıb.
Amma onu da hiss edirdim ki, atam
bildirməsə də mənim belə hərəkətlərim
(yalnız mənim, təkcə mənim) ona xüsusi ləzzət
verir. Qürrələnir. Amma
bildirmirdi. Hərdən gizli-gizli mənə
baxıb gülümsəyərdi. Sanki bu
gülümsəməsi ilə onun belə hörmətini
saxlamağıma görə öz təşəkkürünü
bildirirdi.
Gizli-gizli süzüb məni
durardı bəzən,
Durub-durub güc gələrdi
əyri qəlyana.
Sərt üzünə bircə
anlıq
səhər doğardı
Bilməz idim hansı nurlu
düşüncələrdən.
Əli Kərim
Bəzən də
özünü elə göstərirdi ki, guya mənim onun
yanında belə çəkingəliyimdən rahatsızdır,
guya mənim belə hərəkətlərimdən
xoşlanmır. Hərdən də deyərdi:
– Ay oğul bəsdir də,
saçın-saqqalın ağarıb, yekə kişisən,
bu gün-sabah özün baba olacaqsan, amma mənim yanımda
yenə də özünü uşaq kimi aparırsan. Yenə
də deyirəm bütün bu sözlərə baxmayaraq hiss
edirdim ki, yaşa dolmağıma baxmayaraq, hətta
yaşımın əllini belə keçməsinə
baxmayaraq ata qarşısında olan övlad itaətkarlığım
onun xoşuna gəlir. Elə mənim də.
Bu
yazılarımı başqa səmtə yönəltməyin. Xeyr. Məni düzgün başa düşün. Mən atama qarşı həmişə belə itaətkar
olmuşam, müti olmuşam. Amma
bütün bununla belə mübahisələrimiz də
çox olub. Həddən artıq
çox olub. Atamın hər dediyinə də
gözüyumulu ləbbeyk deməmişəm. İndi fikirləşirəm ki, ilahi mən nə qədər
mənasız işlərə, mənasız məsələlərə
görə atamla axırı görünməyən
mübahisələr etmişəm. Axı
niyə görə? Nəyin xatirinə?
Bəzən də mənasız işlərə görə
atamdan inciyirdim də... Ay Allah, mən necə də səfeh
olmuşam.
KİÇİK BİR HAŞİYƏ
Bir dəfə
çoxdan bəri fikrimdə tutduğum arzumu özümdə
cəsarət tapıb nəhayət ki, atama açdım. Çoxdandır
buna cəsarət etmirdim. Atama deyə
bilmirdim. Hətta yazılarımın
birində bu barədə yazmışdım da. Demişdim ki, atama qarşı həmişə ərksiz
olmuşam. Heç bir vaxt ona qarşı ərkim
olmayıb. Hə... Atamgilə gəlib dedim ki, istəyirəm
sənədlərimi Akademiyanın müxbir
üzvlüyünə təqdim edim. Sən bu
işə necə baxırsan? Mənə
necə kömək edə bilərsən? Hələ dəqiq bilmirəm deyəsən bizim sahəyə
cəmi bir yer veriblər. Amma biz bir
neçə nəfərik. Əsas rəqibim
də o filankəsdir. (Mən qəsdən o filankəsin
adını çəkmirəm) O birilərini isə rəqib
saymıram. Onlar heç.
Atam əvvəlcə
təəccüblə mənə baxdı. İndiyə
kimi də bilmirəm ki, atam nəyə görə təəccüb
etmişdi. Sonra söhbəti dəyilşmək
istədi. Bir az ordan-burdan, dünyada
baş verən hadisələrdən, siyasətdən, indi nə
bilim daha nədən və nələrdən. Söhbətimiz
alınmadı. Gördü ki, yox. Çox israrlıyam. Elə
dediyimi deyirəm. Söhbəti hərləyib-fırlayıb
yenə də Akademiyanın müxbir üzvlüyünün
üstünə gətirib çıxarıram.
Birdən dedi ki, oğul, o
yerə sənin dediyin o filankəs daha çox layiqdir. Yox, mən demirəm ki, sən layiq deyilsən.
Əlbəttə, yox. Maşallah,
ağlın da var, savadın da. Akademik
olanların da heç birindən əskik deyilsən. Amma o yerə o filankəs layiq olmaqdan başqa, səndən
yaşda da böyükdür axı. Böyüyün
isə yolunu həmişə gözləmək
lazımdır, həm də... filan iş filan cürdür. Sən isə ondan cavansan. Gələn
seçkilərdə iştirak edərsən. Heç nə olmaz. Heç nə
itirməzsən. Tələsmək
lazım deyil.
– Axı, ay ata, nə olsun
ki, o yaşda məndən böyükdür. Yaşın
bura nə dəxli var ki. Mən heç
bir vaxt özümdən yaşda böyüklərə
hörmətsizlik etməmişəm. Həmişə
hörmətlərini saxlamışam. Həm
də nə olsun ki, filan şey filan cürdür. Mən indi səndən kömək istəyirəm.
Sənin səsin isə həlledicidir. Sən mənə səs verəcəksən?
– Yox, əlbəttə yox. Sən də Akademiyanın müxbir üzvü olasan, dostluq etdiyin Əziz Mirəhmədov da... Nə olsun ki, onun namizədlik dissertasiyası Məhəmməd Hadidən olub, sənin isə doktorluq dissertasiyan. Dostluq etdiyin Əziz Mirəhmədov kimi bir alim 1980-ci ildə 60 yaşında Elmlər Akademiyasının müxbir üzvü olub. Sən isə... nə qaçhaqaçdır.
(Mərhum alimimiz, gözəl insan Əziz Mirəhmədovla biz qonşu idik. Vaxtilə Hökumət evinin üzbəüzündə yaşayırdıq. Aramızda yaş fərqi çox idi. Özü də lap çox idi. Əziz müəllim mənim atamdan da yaşda böyük idi. Hətta Əziz müəllim 1950-ci il oktyabr ayının 5-də atamın toyunda tamada da olmuşdu. Əziz Mirəhmədov, Məmmədcəfər Cəfərov bu dünyadan vaxtsız köçmüş Məsud Əlioğlu və atam vaxtilə möhkəm dostluq edirdilər. Amma sonra... Eh sonralar çox şeylər oldu. Və... daha sonralar bu dostluğu özümdən asılı olmayaraq mən davam etdirməli oldum. Məmmədcəfər müəllimlə də yaxınlığım oldu. Əziz müəllimlə də. Hətta Məmmədcəfər müəllim mənim doktorluq dissertasiyamın elmi konsultantı, Əziz müəllim isə rəsmi opponentim olmuşdu. Ax... deyirəm necə də gözəl insanlar idilər. Darıxmışam elə insanların söhbətləri üçün, darıxmışam elə insanlar üçün. Onların mərdlikləri üçün.
Hə... bu yaş fərqinə baxmayaraq hərdən Əziz müəllimgilə gedib söhbətləşirik. Əziz müəllim deyərdi ki, a kişi, sən bir Allahın işinə bax e... Toyunda tamada olduğum bir adamın oğlu ilə dostluq edirəm. Ə...bu qədər də yaşamaq olar?...
– Sənin adını ilk pozan da elə mən özüm olacağam. Yox oğul yox, mən filankəsə səs verəcəyəm. Həm də mən bu məsələni səndən çoxdan gözləyirdim. Bilirdim ki, əvvəl-axır bu barədə mənə müraciət edəcəksən. Ola bilsin ki, mənim familiyama görə bir çoxları sənə kömək eləsin və sən seçiləsən, amma yadında saxla mən o filankəs üçün çalışacağam, bacardığımı edəcəyəm. Vəssalam. Sən gələn seçkilərdə iştirak edərsən.
– Yox... ay ata əgər indi sən mənə kömək etməsən, mən nə növbəti, nə də ki, ondan sonrakı gələn seçkilərdə iştirak etməyəcəyəm. Mən elə məhz bu seçkidə iştirak etmək istəyirəm. Çünki mən əsas rəqibim olan o filankəsin üzərində mütləq qələbə qazanmalıyam. Həm də sən bilməyən məsələlər çoxdur. Çünki elə işlər var ki, sən bilmirsən. Mən o filankəsi... (həmin adını çəkmək istəmədiyim o filankəs vaxtilə mənim namizədlik dissertasiyamın müdafiəsinə səbəbsiz yerə mane olub. Nə az, nə çox, düz iki il ləngitmişdi. Bu iki ildə mənim nələr çəkdiyimi bir olan Allah bilir.)
Atam heç qoymadı ki, sözümü axıra qədər bitirim – sözümü ağzımda kəsərək:
– Kəs səsini. Mən heç bilməzdim ki, mənim oğlum belə cılız hisslərlə yaşayır. Ay məndən olub, mənə oxşamayan. (Bu söz atamın zarafatla ən çox işlətdiyi söz idi). Axı sən mənim oğlumsan. Hər bir şeyin fövqündə durmağı bacarmalısan. Oğul bir az qəlbi geniş ol. Heç nə olmaz, dünya dağılmaz ki... Sən gələn seçkilərdə iştirak edərsən.
– Yox, ay ata, yox. Dünya, əlbəttə, Akademiyaya müxbir üzvlüyünün seçkilərinə görə dağılmır. Bunu sən də bilirsən ki, belə məsələlərə görə dünya dağılıb eləmir. Amma yadında saxla ki, əgər sən mənə indi köməklik etməsən mən seçilə bilməyəcəyəm. Ona görə də indidən sənədlərimi təqdim edib seçilməyib pərt də olmaq istəmirəm. Özün də bilirsən ki, həyatda indiyə kimi nəyə nail olmuşamsa da, altmış faizi sənə görə olubsa, qırx faizi də elə özümə görə olub. Bu familiyanın əgər mənə haradasa köməyi dəyibsə, inan ki, zərbəsi də az olmayıb. Niyə özün həmişə deyirsən ki, bu zəhmətkeşliyin, bu çalışqanlığın müqabilində belə dərin mütaliənin qarşısında həyatda çox şeyə nail ola bilərdin. Çox uzaqlara gedib çıxa bilərdin. Harada işləmişəmsə eyni vaxtda üç-dörd ali məktəbdə də gedib dərs demişəm. İşlərin hamısına vaxtlı-vaxtında çatım deyə çox vaxt naharımı da elə maşında yemişəm. Nə bilim tələbə hazırlaşdırmışam, onun-bunun kitablarını, yazılarını redaktə etmişəm, evə əlavə işlər də götürmüşəm. İndi sənə demək istəmirəm, başqa işlər də görmüşəm. İşdən, zəhmətdən qaçmamışam. Bəs onda sən dediyin o uzaqlara niyə gedib çıxa bilməmişəm? Arzularıma niyə çata bilməmişəm? Əgər bilmirsənsə onda qoy mən deyim. İş zəhmətdə, çalışmaqda deyil. Vallah yox. İş cəhd göstərməkdədir. Ata, inan mənə, çox vaxt haqqımı əlimdən alıblar. Sənə deməmişəm,boynumu büküb yana-yana qalmışam. Heç nəyi də heç kimə sübut edə bilməmişəm. İçimdə boğulmuşam. Dalaşmışam, vuruşmuşam. Sonra da kiriyib oturmuşam. Adım da çətin adam, sərt adam, dalaşqan adam kimi çıxıb. Heç nəyi də mənə podnosda, boşqabda hazır gətirib verməyiblər. İran inqilabının qorxusu, Əfqanıstan müharibəsinin dəhşətləri indi də canımdan çıxmayıb. Mən başqaları kimi heç bir vaxt hazıra nazir olmuşam. Əşşi bütün bunları indi mən sənə niyə görə deyirəm e... Guya ki, özün bilmirsən. Nə isə... İndi isə yadında saxla, əgər indi mənə köməklik etməsən, mən bir də heç bir zaman, lap belə ömrümün sonuna qədər sənədlərimi Akademiyanın müxbir üzvlüyünə təqdim etməyəcəyəm. Heç bu barədə düşünməyəcəyəm də. Çünki burada prinsipiallıq məsələsi var. Bu adi uşaq şıltaqlığı deyil. Çünki yol üstəyəm yenə də xaricə gedirəm. Allah bilir bir də nə zaman qayıdacağam.
Atam da əsəbiləşdi:
– Sən mənim qarşımda şərt-zad qoyub eləmə. Sən özün bilərsən, bundan sonra seçkilərdə iştirak edərsən ya yox. Bu sənin öz işindir. Akademiyaya seçilənlərin heç birinin Bəxtiyar kimi dədəsi yoxdur.
Mən də dilimi dinc
qoymadım:
– Atası yoxdursa,
dayısı var, dayısı yoxdursa, yerlisi var. İndi
heç kim kimsəsiz deyil. Arxayın
ol. Hamının kimisə var.
– Sən indi məndən nə
istəyirsən? Özünə belə
arxayınsansa, get seçkilərdə iştirak elə.
Mən sənə heç nədə kömək
etməyəcəyəm. Əgər
iştirak etməzsənsə yenə də deyirəm bu sənin
öz işindir. Amma indi bu söz əgər sənin
ağzından çıxıbsa sözündə də
möhkəm ol, kişi kimi də hərəkət
elə, bundan sonra heç bir zaman seçkilərdə
iştirak etmə.
Təəccübdən
gözlərim böyümüşdü, dediklərimə
peşman olmuşdum. Amma artıq gec idi. Söz
ağzımdan çıxmışdı.
– Baş üstə, ata...
oldu. Mən bunu sənə kişi kimi
söz verirəm. Heç bir zaman
özümü müxbir üzvlüyə təqdim etməyəcəyəm
– deyib qapıdan çıxdım.
Eh... (Bu mənasız
mübahisə kimə lazım idi? Nəyə
lazım idi? İndiyə kimi də bunu
anlaya bilmirəm. Əlbəttə
günahkar mən idim.)
Mən geri
durdum. O filankəs
dediyim isə seçkilərdə iştirak etdi. Başqa bir nəfər üçün də əlavə
yer alındı. Bunu biləndə isə
lap belə cızdağım yandı. Amma
daha çox gec idi. Atam da
bacardığını o filankəsdən əsirgəmədi.
Nəticədə o Milli Elmlər
Akademiyasının müxbir üzvü seçildi. Mən isə... bir müddətdən sonra atamgilə
getdim. Heç nə olmayıbmış
kimi yenidən bir yerdə danışır, deyir, söhbətləşirdik.
Amma bu inciklik mənim ürəyimdə
qaldı. Yox atamdan inciməmişdim.
Qətiyyən yox. Əstağfürullah.
Özüm-özümdən incimişdim ki, mənasız
bir məsələyə görə atamla mübahisə
etmişdim.
İndi
bütün bunları düşündükcə özüm
öz nəzərlərimdən düşürəm. İlahi bu nə
mənasız bir məsələ idi ki, biz mübahisə
etdik. Mən indi bu olmuş əhvalatı
tam təfərrüatı ilə yazmıram. Buna heç ehtiyac da yoxdur. O adama görə isə
heç mübahisə etməyə də dəyməzdi... Amma mən etdim.
Bu hadisənin
üstündən bir xeyli vaxt ötdü. İllər
keçdi. Elmlər Akademiyasının
müxbir üzvlüyünə seçkilər bir neçə
dəfə oldu. Lakin mən isə
iştirak etmədim. İndiyə kimi də bilmirəm
düz iş görmüşəm yoxsa yox. Axı
mən kimə nəyi sübut etmək istəyirdim? Atama? Eh... nə isə... Atamla
görüşdüyümüz zaman isə atam qəsdən
söhbəti hərləyib-fırlayıb Akademiyaya
seçkilərdən salanda isə mən qəsdən
söhbəti dəyişdirirdim. İstəmirdim
ki, bu söhbət bir də təkrarlansın. Nə mən tüpürdüyümü yalayım,
nə də ki, atam öz sözünü geri
götürsün.
lll
Axırıncı
dəfə yenə də işlədiyim xarici ölkədən
Bakıya növbəti məzuniyyətə gəlmişdim. Nə fərli-başlı
istirahət edir, nə də ki, atamla görüşməyə
vaxt tapa bilirdim. Elə hey
qaçhaqaçda idim. O dostlarımla,bu
dostlarımla görüşməkdən, yeyib-içməkdən
heç başım ayılmırdı. Atam isə
gecə yarıya qədər yatmayıb məni gözləyirdi.
Başım ayılan kimi elə beş-on dəqiqəliyə
atamgilə gəlib ona baş çəkib tez də evə
dönürdüm.
Məzuniyyətimin
axırıncı günü idi. Günorta atamla
xudahafizləşməyə getmişdim. Yaşadığı
evin həyətindəki skamyada oturub söhbət edirdik.
Gecə geri dönməli idim. Bir də bir ildən sonra məzuniyyətə gələ
bilərdim. Amma mən bilmirdim ki...
Birdən dedi ki, ay oğul, səninlə
çoxdandır ki, bir yerdə oturub çörək yemirik.
Könlümə yaman kabab düşüb.
Gedək bir yerdə oturub çörək yeyək.
Həm də dedi ki, heç kim
yanımızda olmasın. Elə ikimiz olaq.
Dərdləşək.
Hansısa
bağda, açıq havada kababxanada oturmuşduq. Əla da hava
var idi. Kababdan yeyir, ordan-burdan söhbət
edirdik. Birdən başımı
qaldıranda gördüm ki, atam diqqətlə mənə
baxır. Gözləri dolub. Narahat oldum. Çünki
atamın heç bir vaxt mənə belə diqqətlə,
belə zənnlə baxan görməmişdim. Sanki məni birinci dəfə idi ki,
görürdü. Heç nə başa düşməyərək:
– Nə olub sənə, ay
ata?
Dərindən
köks ötürdü.
– Heç, ay oğul...
Birdən özünü
saxlaya bilməyib:
– Ay aman, sən nə yaman dəyişmisən,
ay oğul, sən nə yaman yaşlaşmısan? Mən
heç indiyə kimi fkir verməmişəm ki...
Birdən
çənəsi əsdi. Gözləri doldu.
Hiss etdim ki, qəhər onu boğur. Söhbəti
dəyişmək istədim. Gülə-gülə:
– Ay ata, nə olsun ki, belə
yaşlaşmışam. Mən ki,
özümü gümrah hiss edirəm.
– Mən heç indiyə
kimi fikir verməmişəm ki... başın nə yaman
ağarıb. Ay aman... üzündə qırışlar da əmələ
gəlib ki... Ay oğul, axı sən nə yatdın ki, nə
də yuxu görəsən. Ay Allah, mənim balam nə tez
qocaldı. İyirmi gündür ki, gəlmisən,
mən isə indi fikir verirəm. Elə
bil ki, səni indi görürəm. Ay aman...
Atam heyrətə
gəlmişdi.
Elə bil dünyanı mənə
verirlər,
Hanı əvəzinə
“ani” deyəndə.
B.Vahabzadə
Atam bu şeiri
1956-cı ildə, mənim yenicə dil
açdığım günlərdə yazmışdı.
Gözlərini
bir nöqtəyə dikib durmuşdu, gözləri yol çəkirdi.
Birdən dedim ki:
– Ay ata, nə olsun axı...
A kişi, qocalan vaxtımdır da...
– ...Yox, ay oğul! ...Bu illər
uzunu heç səninlə əməlli-başlı oturub
söhbətləşə bilməmişəm. Eh...
yaxşı gedək evə.
Evə gəldik. Yuxarı
qalxmadıq, elə həyətdəki skamyada oturduq. Atam hələ də fikirli idi. Birdən
yavaş səslə qayıtdı ki...
– Bu dünyada ən çox
səni istəmişəm. Sənin dəlin
olmuşam. Sən mənim
üçün bu dünyada hər şey olmusan, oğul.
İndiyə kimi heç sənin arxanca ürəklə
də baxa bilməmişəm.
“Gözüm dəyər”
deyə,
ata çox zaman
Oğlunun dalınca
baxa bilməzdi.
B.Vahabzadə
– Səninlə çox
mübahisələrimiz olub. Eh... Nə qədər desən...
Çünki mən səndən çox
şeylər gözləmişəm. Sənə
çox böyük ümidlərim olub. Mən elə
bilirdim ki, sən... Eh... nə deyim. Əslində
sən bu istedadla dağı-dağ üstünə
qoymalıydın. Çox uzaqlara gedib
çıxmalıydın. Amma ümidlərinin
heç birini doğrultmadın.
– Yox, ay ata. Vallah
yox. Sən səhv edirsən. Mənim heç bir istedadım-filanım olmayıb.
Bu sənə belə gəlirdi ki, mən nə
isə qeyri-adi bir adamam. Vallah yox. Orta məktəbi qurtarana qədər sən bəlkə
də mənə ən azı on beş–iyirmi müəllim
tutmuşdun. Mən adi bir adam
olmuşam. İstedad-filan hamısı boş
bir söz idi. Sən isə bununla
barışmaq istəməmisən. Elə
mübahisələrimizin çoxu da çox vaxt bunun
üstündə olurdu.
– Ay oğul, bəsdi sən
Allah, mən heç bir vaxt öz zənnimdə
yanılmamışam. Həyatı da mənə
öyrətməyə çalışma. Kimin qabında da nə var, nə yox mən səndən
yaxşı bilirəm. Sən sadəcə
olaraq heç vaxt mənə qulaq asmamısan, qulaq asmaq istəməmisən.
Başqa yolla getmisən. Sənin
getdiyin o yol isə istedadsızların, bezdarnıların (elə
belə də demişdi – bezdarnı) yolu idi. Sən də o yolla getməyə üstünlük
verdin. Atana qulaq asmadın. Allah səndən heç nəyi əsirgəməmişdi.
Nə isə indi bunu araşdırmağın
heç bir mənası yoxdur. Hər
şey arxada qalıb və hər şey çox gecdir.
– Yaxşı, ay ata, niyə
bəs soruşmursan ki, mən sənə niyə qulaq asmaq istəmədim?
Niyə başqa bir yolla getdim? Çünki yaşamaq istəmişəm. Həyat görmək istəmişəm. Sənin gördüyün o çətinlikləri
yaşamaq istəməmişəm. Amma...
yaşaya da bilmədim. Hə... Çünki
sənin mənə verdiyin o tərbiyə, o həyat dərsləri
mənə rahatlıq verməmişdi. Mən
də iki yolun arasında qalmışdım.
– Yox, ay oğul, sən bir
yol seçməliydin.
Sonra yenə də öz
sözünə davam edərək dedi:
– Bu dünyada ən çox
səni istəmişəm. Mən səninlə
nəfəs almışam, oğul. Sən bir az xəstələnən kimi özümə
yer tapa bilməmişəm. Sən mənim üçün, əstəğfürullah...
Sən mənim üçün hər şey
olmusan. Atam da sən olmusan, qardaşım
da. Birdən yenə çənəsi əsdi, gözləri
doldu nə isə... – Amma bütün bununla bərabər sənə
qarşı bəzən... Yox bəzən yox, çox vaxt...
Sonra nə düşündüsə, – Nə bilim vallah həyatdır
da... – dedi.
– Ay ata bəsdir də...
yaxşı da... Mən bu gecə yola
çıxıram. Sən isə məni
kövrəldirsən.
Atam sözlərinə davam
edərək:
– Səni görməyəndə
darıxmışam. Özümə yer tapa bilməmişəm.
Nə isə... Yaxşı ay oğul, di gəl
xudahafizləşək.
Atamı pillələrə
qədər ötürüb geri qayıtdım. Hava artıq
qaralmışdı. Daha yuxarı
çıxmadım. Evə
qayıdırdım. Elə bir qədər
aralanmışdım ki, biixtiyar geri baxdım. Gördüm ki, atam dayanıb diqqətlə arxamca
baxır. Birinci dəfə idi ki, atam mənim
arxamca baxırdı.
İlahi pərvərdigara,
bu qəribə baxışlarda, bu işığı
sönməkdə olan, dünyanın hər üzünü
görmüş və gördüklərindən pərişan,
yorğun olan gözlərdə nələr yox idi. Bir həsrət,
bu məzəmmət, kədər, hüzn həmişə mənim
üçün çəkdiyi
nigarançılığın sanki sonuncu atdıqları,
sükutlu bir fəryad, ağrılı bir
çığırtı, bir yanğı və bir də...
bir də əbədi ayrılığını
çalarları. Həmişə hər
bir yerdə hökmlü olan atam, ötkəm olan atam elə
bil ki, bu qəribə baxışları ilə məndən
xahiş edirdi. Yalvarmırdı yox. Yalvarmaq onun xislətinə ömrü boyu yad olub.
Heç kimə yalvarmayıb. Heç ölümə də yalvarmadı. Uzaq yolda olduğum üçün, məni görmək
üçün heç ölümdən bir neçə
saat möhlət də istəmədi. Yox... Amma bu dəfə bu baxışları ilə sanki
dil deyirdi.
– Amanın
günüdür, ay oğul getmə. Yetər
ayrı qaldığımız bəsdir daha.
Əstəğfrüllah.
– Nə olub, ay ata? – deyib geri qayıtmaq istədim.
– Qayıtma, qayıtma, ay
oğul, get, sənə yaxşı yol. Özündən
muğayat ol – dedi. Amma ürəyində
tutduqlarının heç birini mənə demədi.
O zaman mən bilmirdim ki, bu mənim
atamla axırıncı görüşüm,
axırıncı naharım, axırıncı söhbətimdir.
Bunu isə atam yəqin ki, bilirdi. Bilirdi ki, bir də heç zaman görüşməyəcəyik.
Onun üçün də ürəyini
boşaltmaq qərarına gəlmişdi. Amma bilmirəm
atam ürəyini tam boşalda bildimi?..
Ah o niyə belə etdi
bu nə qubardı...
Nə zamansa bu nişanda
bir atam vardı.
Əli Kərim
Mənim atama
olan məhəbbətim, dəli kimi sevgim,
bağlılığım bir övladın öz atasına
olan adi məhəbbəti deyildi. Bu bir səcdə idi.
Bu bir sitayiş idi. Daha bilmirəm
nə idi. Elə atamın da mənə
qarşı olan münasibəti eyni idi.
İndi isə
bu sətirləri yaza-yaza xatirələrimlə baş-başa
qalıb düşünürəm ki, görəsən mən
atama necə oğul olmuşam? Atamın dediyi, mənim
üçün arzuladığı o uzaqlar hara idi? Mən o uzaqlara niyə gedib çıxa bilmədim?
Atam məni necə görmək istərdi?
Və bir də, görəsən...
Kişinyov, 2010-cu il
İsfəndiyar VAHABZADƏ
525-ci qəzet.- 2010.- 28 may.- S.22-23.