Adil İsgəndərov Dövlət Film Fondunda anılıb

Mədəniyyət və Turizm Nazirliyinin və Dövlət Film Fondunun birgə təşkilatçılığı ilə Azərbaycanın xalq artisti, görkəmli rejissor və aktyor, professor Adil İsgəndərovun anadan olmasının 100 illik yubiley mərasimi keçirilib.

Fondun direktoru, əməkdar incəsənət xadimi Cəmil Quliyev tədbiri açaraq, Adil İsgəndərovun həyat və fəaliyyətindən danışıb: “Böyük sənətkar 1910-cu ildə Gəncədə anadan olub. O, Bakı Teatr Texnikumunu və Lunaçarski adına Moskva Dövlət Teatr Sənəti İnstitutunu bitirib. Hələ texnikumda oxuyarkən Gəncə Dram Teatrında çıxış etmiş, sonra Bakıya gələrək Azərbaycan Dövlət Dram Teatrında fəaliyyətini davam etdirib”.

Tədbirdə xalq artistləri Ağakişi Kazımov, Nurəddin Mehdixanlı, “Azərbaycanfilm” kinostudiyasının direktoru Xamis Muradov, əməkdar incəsənət xadimi Şeyx Əbdül Mahmud, yubilyarın tələbəsi, əməkdar artist Elxan Qasımov və başqaları çıxış edərək A.İsgəndərovun böyük sənətkar olduğunu, məktəb yaratdığını diqqətə çatdırıblar. Görkəmli rejissorun Moskvada təhsil alarkən, Bədaye Teatrında və Vaxtanqov adına teatrda rejissorluq təcrübəsi keçdiyini deyən natiqlər A. İsgəndərovun teatrda ilk rejissorluq işi olan “Polad Qartal” (1936) tamaşasından söz açıblar: “Sonralar o, “Vaqif”, “Fərhad və Şirin”, “Aydın”, “1905-ci ildə”, “Dumanlı Təbriz”, “Şərqin səhəri”, “Otello” və digər əsərləri tamaşaya qoyub”.

Çıxış edənlər görkəmli sənətkarın hələ teatrda işləyərkən filmlərə çəkilməyə başladığını, “Qara daşlar”, “O olmasın, bu olsun”, “Uzaq sahillərdə”, “Bir məhəlləli iki oğlan”, “26-lar”, “Leyli və Məcnun”, “Qanun naminə”, “Axırıncı aşrım”, “Arxadan vurulan zərbə” və başqa filmlərdə yaddaqalan obrazlar yaratdığını, “Əhməd haradadır” bədii filminin quruluşçu rejissoru olduğunu qeyd ediblər.

Dövlət Film Fondunda yubilyarın həyat və yaradıcılığına aid fotosərgi təqdim olunub.

SARA

525-ci qəzet.- 2010.- 28 may.- S.17.