“İntellektual olmaq dəbdədir” – Bakıda X Bakı Kitab Bayramı bu deviz altında gerçəkləşib

Ötən gün M.F.Axundov adına Milli Kitabxanada Azərbaycan Xalq Cümhuriyyətinin yaranmasının 92, xalq şairi Rəsul Rzanın 100 illiyinə həsr olunan X Bakı Kitab Bayramı keçirilib. “İntellektual olmaq dəbdədir” şüarıyla baş tutan tədbir Yeni Yazarlar və Sənətçilər Qurumunun və Yazıçılar Birliyinin (YYSQ) təşkilatçılığı, Mədəniyyət və Turizm, Gənclər və İdman Nazirliklərinin, Milli Kitabxananın rəsmi dəstəyi ilə gerçəkləşib.

Səhər saatlarından start götürən X Kitab Bayramında yeni kitablardan ibarət sərgiyə ictimai-kulturoloji baxış olub. Sərgilərdə ümummilli lider Heydər Əliyevə həsr olunan, həmçinin xalq şairi Rəsul Rza və gənc yazarların kitabları bayrama gələnlərə təqdim olunub.

Bayram çərçivəsində oxucularla yazarların, naşirlərlə müəlliflərin görüşü təşkil edilib. Bundan başqa tədbir boyu innovativ dəyirmi masa, YYSQ-nin innovativ-kulturoloji layihəsi – www.kitabxana.net – Milli Virtual Kitabxananın geniş ictimaiyyətə tanışlıq mərasimi, “Azərbaycanın intellektual sərvəti və çağdaş innovativ şəbəkə resurslarımız, sayt və portallarımız” mövzusunda və yazıçı-publisist Oqtay Əliyevin Qarabağ müharibəsinə, Azərbaycanın milli qəhrəmanına həsr olunmuş “Əbədiyyətə qovuşan Koroğlu” kitabının təqdimat mərasimləri və mini-konfranslar keçirilib.

Tədbirdə YYSQ-nin sədri, yazıçı-kulturoloq Aydın Xan qardaş Türkiyənin qədim İstanbul şəhərinə həsr olunmuş fotosərgini təqdim edib.

Tədbirin gedişatında SOS Uşaq Kəndində yaşayan balaca oxuculara, eləcə də qaçqın məktəbinin kitabxanasına kitablar toplanaraq göndərilib.

Günün ikinci yarısında isə X Bakı Kitab Bayramının rəsmi açılışı baş tutub. YYSQ-nin sədri, yazıçı-kulturoloq Aydın Xan açılış nitqində hər il ənənəvi olaraq təşkil olunan bayramın əhəmiyyətindən danışıb: “İntellektual olmaq dəbdədir!” şüarı ilə keçirilən X Kitab Bayramı da əvvəlkilər kimi yalnız bir məqsədə xidmət edir: Azərbaycan Milli Kitabının təbliği və dəyərləndirilməsinə, oxucular arasında mütaliə vərdişinin yenidən canlandırılmasına. Biz inanırıq ki, davamlı olaraq keçirdiyimiz belə tədbirlərlə istəyimizə nail olacağıq. Kitab böyük qüvvədir. Belə tədbirlər gənclərə, gələcək nəslə bu böyük qüvvədən lazımınca istifadə etməyin əhəmiyyətini aşılamaq niyyətindəyik”. Təşkilatçı kitab bayramlarının hər il müəyyən tarixi hadisələrə, bu il isə Azərbaycan Xalq Cümhuriyyətinin yaradılmasının 92, xalq şairi Rəsul Rzanın anadan olmasının 100 illiyinə həsr olunduğunu diqqətə çatdırıb: “Hər il kitab bayramlarını bir tarixi hadisəyə həsr etməklə həm də tariximizi xatırlamış oluruq. Bu il də bir daha qarşıdan gələn 28 May Respublika Günü ərəfəsində Şərqin ilk demokratik cümhuriyyətinin yaranmasını və görkəmli sənətkar Rəsul Rzanın xatirəsini bir daha yad etmiş olduq”.

M.F.Axundov adına Milli Kitabxananın direktoru Kərim Tahirov çıxışında hər il keçirilən Kitab bayramlarının böyük əhəmiyyət kəsb etdiyini vurğulayıb: “10 il əvvəl ilk dəfə kitab bayramı keçiriləndə cəmi 4-5 nəşriyyat iştirak edirdi. İndi isə onlarla nəşriyyat bayrama qatılıb. Bu da onu göstərir ki, ötən 10 il ərzində Azərbaycanda kitab işi xeyli inkişaf edib”.

Mədəniyyət və Turizm Nazirliyinin sektor müdiri, şair Çingiz Əlioğlu son dövrlərdə ölkəmizdə nəşriyyatların sürətlə inkişaf etdiyini, kitabın əhəmiyyətinin artdığını vurğulayıb.

Çıxışlardan sonra “İlin Milli Kulturoloji Mükafatı” müsabiqəsinin yekunlarını elan edilib. Milli Kulturoloji Mükafat Komissiyasının qərarına görə, 2009-cu “İlin mədəniyyət dostu”- mədəniyyət və turizm naziri Əbülfəs Qarayev və gənclər və idman naziri Azad Rəhimov, “İlin uğurlu nəşriyyat-poliqrafiya müəssisəsi”- “Təhsil Nəşriyyat-Poliqrafiya” Müəssisəsi, direktoru Bəhruz Axundov, “İlin bədii-sənədli kitabı” –Yazıçılar Birliyinin sədri, xalq yazıçısı Anarın “Unudulmaz görüşlər” ədəbi-publisistik əsəri, “İlin ədəbiyyat dostu olan deputatı”- millət vəkili, yazıçı-publisist Qənirə Paşayeva, “ilin dəyərli nəşriyyatı”- “Ərgünəş” nəşriyyatı, direktoru Oqtay Əliyev, “İlin naşiri”- “QAPP-POLİQRAF” nəşriyyatının direktoru Qoşqar Qarayev, “İlin sənət kitabı”- “Aspoliqraf” nəşriyyatı tərəfindən nəfis şəkildə buraxılmış “Sənətin Məcnunu” albom-tədqiqatı, “İlin romanı”-yazıçı-publisist Paşa Qəlbinurun “Qara su” əsəri, “İlin qadın yazarı”-yazıçı-publisist Natəvan Dəmirçioğlu, “İlin ədəbi-ilahiyyat kitabı”- tanınmış teoloq, nüfuzlu düşüncə sahibi Osman Nuri Topbaşın “Sirr və Hikmət” əsəri, “İlin musiqi kitabı”- professor Tariyel Məmmədovun “Koroğlu: Aşıq havaları” antologiyası, “İlin tərcümə kitabı”- Telman Vəlixanlının tərcüməsində F.M.Dostoyevskinin “Karamazov qardaşları” romanı, “İlin araşdırma-sənədli kitabı”- yazıçı-publisist Sevda Əlibəylinin “İlk poliqrafçı alim” əsəri, “İlin poeziya kitabı şairə-publisist Simuzər Nüsrətbəylinin “Mənim göz yaşlarım çevrildi daşa” poetik toplusu, “İlin roman-araşdırması”- yazıçı-publisist Etibar Sturvinin “Qiyamçı, yaxud tənhalığın bir ili” bədii-sənədli əsəri, “İlin elmi-publisistik kitabı”-alim-publisist Rüstəm Rüstəmovun “İnsan qəlbinin anatomiyası” araşdırması, “İlin uşaq ədəbiyyatı kitabxanası layihəsi”- “Təhsil” nəşriyyatının balaca oxuculara ünvanlanmış silsilə kitab layihəsi, “İlin milli-mənəvi dəyərlər mövzusunda kitabı”- yazıçı-publisist Oqtay Əliyevin “Əbədiyyətə qovuşan Koroğlu” bədii-publisistik əsəri, “İlin kitab və mətbuat yayımı firması”- “Qaya” Mətbuat Yayımı Firması, direktoru Xanhüseyn Əliyev, “İlin ictimai-siyasi şeirləri kitabı”-şair-publisist, pedaqoq Mahmud Əhmədin “Zəfərlər yolu” poetik toplusu, “İlin Qarabağ mövzusunda kitabı”-şairə-publisist Zərəngiz Dəmirçinin “Cavab ver”, “Güllələnmişlər” və “20 Yanvar” poemaları, eləcə də silsilə şeirləri, “İlin dərslik kitabı”- “Aspoliqraf” nəşriyyatının “Bapbalaca Əlifba” adlı nağıllı, şeirli, tapmacalı və şəkilli dərsliyi, “İlin ədəbi televiziya verilişi”-“Azad Azərbaycan” Telekanalının “El içində” intellektual-kulturoloji televiziya layihəsi, rəhbəri və aparıcısı Elçin Əlibəyli, “İlin dərs vəsaiti kitabı”- filoloq alim Şəmil Sadiqin “Ədəbiyyat” kitabı, “İlin ədəbi uğuru”-“Düşmən əlimi sıxır, dost ürəyimi” və “Tenha kuğu” poetik topluların müəllifi şairə-publisist Şəfəq Sahibli, “İlin yeni nəsil tərcüməçisi”-tərcüməçi, yazıçı Nihalə Abdulla, “İlin yeni nəsil yazarı”-yazıçı, şair-tərcüməçi Kənan Hacı, “İlin gənc şairi”-şair, publisist Sevinc Mürvətqızı, “İlin ədəbiyyat müəllimi”- Bakı şəhəri 20 saylı orta məktəbin müəllimi Nailə Salmanova, “İlin Kitabxanası”- M.F.Axundov adına Milli Kitabxana, direktoru Kərim Tahirov, “İlin ədəbi portalı” –nominasiyalarında – www.kitabxana.net <http://www.kitabxana.net> İnternet ünvanlı Milli Virtual Kitabxana, layihə rəhbəri Aydın Xan Əbilov qalib olub.

“Moskvada rusca nəşr olunmuş, yaratdığı obrazlarla zəmanədaşlarının həyat yolu və dünya görüşlərindəki ziddiyyətləri orijinal formada – lirik modern roman şəklində yaratdığına, xarici dillərə çevrilərək geniş oxucu auditoriyası qazandığına, milli söz sənətimizin tarixində yeni tipli irihəcimli bədii-psixoloji nəsrin inkişafındakı xüsusi xidmətlərinə görə” təqdimatı ilə qalib adını qazanan yazıçı, həkim Paşa Qəlbinur mərasimdə çıxış edərək müsabiqə komissiyasına əsərini fərqləndirdiklərinə görə minnətdarlığını bildirib.

Mərasimdə qaliblər mükafatlandırılıb, onlara diplom və xatirə hədiyyələri təqdim olunub.

Sonra X Bakı Kitab Bayramı nəşriyyatların kitab nümayişi ilə işini başa çatdırıb.

SARA

525-ci qəzet.- 2010.- 28 may.- S.16.