“Muzeylər və mədəni irs” mövzulu beynəlxalq elmi konfrans və sərgi təşkil edilib

Ötən gün Milli Azərbaycan Tarixi Muzeyinin 90 illik yubileyi münasibətilə baş tutan “Muzeylər və mədəni irs” beynəlxalq elmi konfransın və sərginin açılışı gerçəkləşib. Əvvəlcə tədbir iştirakçıları muzeyin 90 illiyinə həsr olunmuş sərgi ilə tanış olublar. Daha sonra giriş sözü ilə çıxış edən Milli Azərbaycan Tarixi Muzeyinin direktoru, akademik Nailə Vəlixanlı muzeyin keçdiyi 90 illik yola nəzər salıb: “1920-ci il iyunun 15-də Bakıda “Doğma diyarın tədris muzeyi” adı ilə fəaliyyətə başlayan muzey böyük və şərəfli yol keçmiş, özünün başlıca vəzifəsi olan mədəniyyət abidələrinin toplanılması, öyrənilməsi, nümayişi və təbliğini həmişə layiqincə həyata keçirib. Muzey Vətən tarixinin bütün dövrlərini özündə əks etdirən ekspozisiyası və sərgiləri ilə tamaşaçıların diqqətini daim cəlb edərək, rəğbətini qazanıb. Bu gün muzeyin müxtəlif fondlarında tariximizi yaşadan 300 minədək maddi mədəniyyət nümunəsi qorunur. Muzeyin kitabxanasında 80 mindən artıq, əsasən XIX-XX əsrin əvvəllərində çap olunmuş nadir jurnal, kitab və qəzet toplanıb. Son illərdə 4 minədək eksponat alınıb və burada olan 15 mindən çox eksponat isə bərpa olunub”.

N.Vəlixanlı ölkə prezidentinin muzeyə olan xüsusi qayğısını da dilə gətirib: “Prezident İlham Əliyevin birbaşa təşəbbüsü ilə 2005-2007-ci illərdə burada aparılan əsaslı bərpa və yenidənqurma işlərindən sonra muzey yeni inkişaf mərhələsinə qədəm qoyaraq tarix elminin son nailiyyətlərinə və müasir muzeyşünaslıq prinsiplərinə əsaslanan ekspozisiyanı ziyarətçilərin ixtiyarına verib. “2009-2015-ci illərdə elmin inkişafı üzrə Milli Strategiya”ya uyğun olaraq muzeyimiz dünya muzeyləri ilə əməkdaşlıq mübadiləsinin aparılmasını, qarşılıqlı sərgilərin, kütləvi mədəni tədbirlərin təşkilini, beynəlxalq layihələrdə iştirakı uğurla həyata keçirir. Son iki ildə əməkdaşlarımız Türkiyə, Polşa, Suriya, Çin, Rusiya, Yaponiya və Macarıstanda elmi ezamiyyətlərdə olmuş, həmin ölkələrdə fəaliyyət göstərən müxtəlif profilli muzeylərin iş təcrübəsi ilə maraqlanmışlar. Bundan əlavə, muzey artıq 5 ilə yaxındır ki, Norveçin Stavanger şəhərindəki arxeologiya muzeyi ilə sıx əməkdaşlıq edir”.

N.Vəlixanlı muzeyin müasir informasiya texnologiyaları ilə təmin olunması, ekspozisiya zallarında monitorların quraşdırılması və burada fasiləsiz olaraq müxtəlif tarixi mövzulara aid slaydlar nümayiş olunmasını da diqqətə çatdırıb.

Azərbaycan Milli Elmlər Akademiyasının (AMEA) prezidenti Mahmud Kərimov Tarix Muzeyinin çox zəngin tarixə malik olduğunu bildirib: “Son zamanlar Tarix Muzeyi yeni bir dövr yaşayır. Əsaslı təmir və bərpa işlərindən sonra bu muzeydə yeni ən müasir ekspozisiyalar təşkil olunub. Eyni zamanda Hacı Zeynalabdin Tağıyevin Ev Muzeyi bərpa olunub və istifadəyə verilib. Son illər dövlətimizin başçısının müvafiq sərəncamları ilə Azərbaycanda muzey işinin təkmilləşdirilməsi, müasir tələblər səviyyəsində qurulması istiqamətində mühüm addımlar atılıb. Mühafizə edilən tarixi abidələrin təbliği muzeyin fəaliyyətinin əsas istiqamətlərindən biri sayılır. Buradakı eksponatlar birinci növbədə ekskursiyalar və sərgilər vasitəsilə geniş tamaşaçı kütləsinin diqqətinə çatdırılır”. AMEA prezidenti bu tipli elmi konfranslarının keçirilməsinin əhəmiyyətini də qeyd edib. Konfransın açılışında Türkiyə Respublikasının nümayəndə heyəti adından Topqapı Sarayı Muzeyinin baş mühafizi Sibel Alparslan Arça, Rusiya Federasiyasının nümayəndə heyətinin adından Dağıstan Dövlət Universitetinin Yeni və ən yeni dövr vətən tarixi kafedrasının müdiri, tarix elmləri doktoru, professor Artur Dalqatov çıxış ediblər. Qonaqlar Azərbaycanda təşkil olunan beynəlxalq tədbiri yüksək qiymətləndiriblər. Beynəlxalq konfransda Rusiya, Türkiyə, İran, Gürcüstan, Misir, Şimali Kipr Türk Cümhuriyyəti, Ukraynadan gələn qonaqlar da iştirak edir. İştirakçılar əvvəlcə muzeyin 90 illiyinə həsr olunmuş sərgi ilə tanış olublar. Konfrans “Muzeylər-mədəni irsin daşıyıcısı və qoruyucusu”, “Muzeylər və mədəni irsin tədqiqi”, “Mədəni irsin təbliği, mühafizəsi və muzeylər” bölmələrində işini davam etdirəcək. Tədbirdə 43 məruzənin dinlənilməsi planlaşdırılıb. Konfrans iştirakçılarının muzeyin ekspozisiyası ilə tanışlığı, habelə İçərişəhərə, Atəşgaha, Mərdəkan qalasına ekskursiyaları da nəzərdə tutulub. Muzeyin internet saytı – www.azhistorymuseum.az ünvanlı veb səhifə artıq hazırdır və noyabrın 1-dən istifadəyə verilib. Qeyd edək ki, “Muzeylər və mədəni irs” beynəlxalq elmi konfrans işini noyabrın 3-də yekunlaşdıracaq.

HÜSNİYYƏ

525-ci qəzet.- 2010.- 2 noyabr.- S.7.