Həyat lövhələri
Elçilik
Məktəbin “gülər üzü” sayılan Ramazan müəllimin son vaxtlar nədənsə üzü gülmürdü. Həmişə deyib-gülən, səsi məktəbi başına götürən, hay-küylü, şit hərəkətləri, zarafatları ilə çoxlarının zəhləsini tökən Ramazan müəllimdən əsər-əlamət qalmamışdı. O, müəllimlər otağının bir küncünə sıxılıb elə bil hər şeydən təcrid olunmuşdu. Həmkarlarının: “ay Ramazan müəllim, nə olub axı?”-sualına “heç nə” cavabından başqa bir söz demirdi.Müəllimlərdən biri indiyə qədər heç kimin ağlına gəlməyən versiya atdı ortalığa. “Ə, bəlkə Ramazan vurulub?” Elə o dəqiqə də bu versiyanı sınaqdan keçirdilər. Müəllimlər üçün təəccüblü görünsə də Ramazan müəllim eşqə düşdüyünü etiraf etdi. Məlum oldu ki, kəndin ən nüfuzlu şəxslərindən olan Hacı Salehin qızını istəyir.
Hacı Salehin qızını Ramazan müəllimə verəcəyinə inamları olmasa da yeyib-içmək həvəskarları işi uzatmağı Ramazana məsləhət bilmədilər. Elə bu gün məsələni həll etmək üçün elçi getmək təklifini irəli sürdülər və direktor başda olmaq şərtilə qalstuklu, şlyapalı müəllimlərdən dördünü seçdilər.
– Ramazan müəllim, bu işin məsuliyyətini yəqin ki, dərk eliyirsən, elçilik çox qəliz məsələdir, bilmirsən səni necə qarşılayacaqlar, özü də Hacı Saleh kimi adam. Odur ki, bir balaca yeyib-içsək danışanda da ürəkli danışarıq.
Ramazan müəllim yaxındakı kafelərin birində elçi gedənlərə əməlli-başlı qonaqlıq verdi. Elçilər “Allah, Məhəmməd ya Əli !” deyib maşını Hacı Salehin evinə tərəf sürdülər. Maşın Hacı Salehin darvazası qabağında dayandı. Müəllimlər direktora hələlik maşında qalmağı məsləhət bildilər:
– Bilirsiniz, Hacı Saleh bir az özündən razı, qəliz adamdır, birdən artıq-əskik söz deyər, elə sözləri eşitməsəniz yaxşıdır. Biz gedək, əgər söhbətimiz baş tutsa sizi çağırarıq.
Direktor məsləhətə qulaq asıb maşından düşmədi. Müəllimlər Hacı Salehin darvazasını döydülər. Müəllimləri içəri dəvət etdilər. Müəllimləri salamlayan Hacı Salehin üzündə təlaş olsa da özünü səmimi aparmağa çalışırdı. Müəllimlər mətləbi uzatmadılar, gəlişlərinin məqsədini bildirdilər.
Hacı Saleh:
– Qızın bu işdən xəbəri var? – soruşdu
– Əlbəttə, qızın razılığı olmasa bizi bu qapıya göndərməzdilər.
Hacı Saleh qızını çağırtdırdı:
– Qızım, sən Ramazan müəllimi tanıyırsan?
– Hansı, o gic Ramazanı?
– Cavabınızı aldınız? Necə gəlmisiniz elə də çıxın gedin, mənim gicə verməyə qızım yoxdu.
Müəllimlərin belə tez çıxması direktora işin nə yerdə olduğundan xəbər verirdi.
Müəllimlər bu xəbəri mümkün qədər yumşaq formada Ramazan müəllimə çatdırmaq qərarına gəldilər. Hələ ümidin itirilmədiyini bildirdilər və yeni planlar qurmağa başladılar.
– Mən yeganə çıxış yolunu qızı qaçırmaqda görürəm – müəllimlərdən biri dilləndi.
– Ağıllı fikirdir, bu, həm də Hacı Salehə dərs, qapıya gələn elçilərin ələ salınmasına cavab olardı – başqa bir müəllim təsdiqlədi.
– Yaxşı, bu işin təşkilini necə təsəvvür edirsiniz? – direktor soruşdu.
– İnstituta gələndə, ya da institutdan çıxanda yaxalamaq lazımdır qızı.
– Hacı Salehin qızını maşınla aparırlar, maşınla da gətirirlər.
– Ə, nə olsun, şofer tək, biz dörd nəfərik, bir qıza da gücümüz çatmayacaq?
– Hə, Ramazan müəllim, nə deyirsən, başlayaq əməliyyata, ya yox?
– Nə deyirəm, necə məsləhətdir.
– Onda bir şey təşkil elə, əməliyyat məsuliyyətli işdir, heç olmasa bir az vuraq, özümüzə gələk.
Ramazan müəllim əməliyyatın məsuliyyətinə layiq bir qonaqlıq təşkil elədi. Məclisin sonuna yaxın müəllimlərdən biri:
– Bax, qardaşlar, halallıq olsun deyə biz hər şeyi Ramazan müəllimə açıq deməliyik. Axı şikayət olsa, qız qaçırmaq üçün yeddi – səkkiz il türmə gözlənilir.
– Olsun də, zato prinsipimizi yerinə yetirərik – kimsə dilləndi.
Türmə sözünü eşidən Ramazan müəllimin rəngi qaçdı:
– Hörmətli həmkarlarım, son günlər sizə yaman zəhmət verdim, həyəcanlı dəqiqələr yaşadınız. İcazə verin mən bir az fikirləşim, siz də sakitləşin, sonrasına baxarıq.
– Əlbəttə, Ramazan müəllim, qərar sənindir, biz sənin qərarına hörmət etməliyik – müəllimlər sevincək razılaşdılar.
Bu hadisədən iki həftə keçmişdi. Ramazan müəllim şən əhval – ruhiyyə ilə qalstuklu, şlyapalı müəllimlərə yaxınlaşıb:
– Hazırlaşın
elçi gedirsiniz.
– Hara, kimə, ay Ramazan
müəllim?
– Bizə. Bir qohumum var,
yaxşı qızdır, ürəyimə yatır, atası
ilə bizdə qonaqdır. Elə məqamdır. Məsələni
həll edək.
Elçilikdən düz
qırx gün – qırx gecə... Sonra Ramazan müəllim toy
elədi, evləndi.
ƏKS ÜNVAN
– Arif müəllim, salam!
Bircə dəqiqəlik vaxtınızı alacam.
– Səkinə xanım,
vaxtımı nə qədər istəyirsən, al, amma
canımı alma.
– S vami ne soskuçişsya,
Arif müəllim. Ya k vam po seryoznomu voprosu, a vı hər
şeyi zarafata çevirirsiniz.
– Yaxşı, qulağım
səndədir.
– Mənə qulağınız
lazım deyil, diqqətiniz məndə olsun.
Arif müəllimin
qaqqanağı kabineti başına götürdü.
– Afərin, Səkinə
xanım, hesab oldu bir-bir. İnstitut deyil ey, komediya
teatrıdır. Yaxşı diqqətim səndədi.
– Arif müəllim, bu yay tətili
gələndə başım şişir.
– Bu fizikanın qanundu, istidən
hər şey şişir, soyuqdan qısalır.
– Opyat naçinayetsya. Mən
o mənada demirəm. O mənada deyirəm ki, bilmirəm bu tətil
günlərini harada, necə keçirim. Elə bil
Kislovodskdan başqa dünyada yer yoxdu. İnsan nə qədər
eyni sifətləri görər, eyni səsləri eşidər.
Bakıdakı qonşularımız Kislovodskda da
qonşuluğumuzda olurlar. İnstutumuzun əməkdaşlarının
əksəriyyəti oranı zəbt ediblər, bir sizdən
başqa. Bir sözlə, elə bil heç yerimi,
obstanovkamı dəyişməmişəm, Bakıdayam. Ən
dəhşətlisi odur ki, bir də görürsən
tumanının balağı yerlə sürünənin biri
şəhər parkının bu başından o
başına qışqırır: Ciyərin yansın bala,
geri qayıt, gəlsəm, səni cıracam. “Və ya: “Yetim
qalasan səni, tez gəl də” deyib uşağın
başına qapaz ilişdirir. Uşağı vurduğuna
görə ona irad tutan rusa: “Cəhənnəm ol, indi
Allahın alkaş rusu mənə ağıl öyrədəcək”
– təpinti gəlir. İndi döz görüm, bu səhnələrə,
istirahətə gələn şəxs.
Odur ki, qəti qərara gəlmişəm
və həyat yoldaşımın da
razılığını almışam. Bu il başqa yerdə,
özü də tək istirahət edəcəm. Sizin bu
işdə təcrübəniz böyükdür. Bilirəm
ki, hər il istirahənizi Yaltada keçirirsiniz. Yeri gəlmişkən,
Arif müəllim, eyni yerdə istirahət etmək sizi
darıxdırmır?
– Səkinə xanım, bu, o
adamın özündən asılıdır. Neçə
illər Yaltaya getsəm də hər dəfə özüm
üçün yeniliklər tapıram. Ora mənim
üçün həmişə maraqlı yerdir.
– Bax, elə ona görə də,
Arif müəllim Sizin yanınıza gəlmişəm məsləhət
üçün. Mən də bu il Yaltaya getmək, orada
istirahət etmək istəyirəm. Bilirəm ki, siz o yerlərə
yaxşı bələdsiniz,orada dostlarınız,
tanışlarınız çoxdur. Onu da bilirəm ki, orada
putyovka, yaxşı mənzil tapmaq da problemdir. Amma Sizin
üçün yox.
– Sanatoriyaya putyovka almaq mənim
üçün çətin deyil, amma nə vaxt gələcəyini
dəqiq bilməliyəm. Orası da var ki, mən əvvəlcə
7-8 günlük Moskvaya getməliyəm, ordan da Yaltaya. Odur ki,
nə vaxt gələcəyini mənə xəbər vermək
üçün gərək iki məktub yazasan, birini Moskvaya,
o birini də Yaltaya. ?nvallar da belədir: Moskva, K-9, Qlavteleqraf,
“Do vostrebovaniya”. Yalta, Qlavpoçta, “Do vostrebovaniya”.
Adımı, familyamı, atamın adını bilirsən.
Arif müəllim Moskvada bir
həftə qalandan sonra Yaltaya gəlmişdi. Moskvada olarkən
Qlavteleqrafa bir neçə dəfə baş çəkmişdi.
Səkinə xanımdan məktub gəlməmişdi. O,
Yaltaya gələndən bir neçə gün sonra Səkinə
xanımdan qısa və çox səmimi bir məktub
almışdı: “Əzizim Arif müəllim, şərtləşdiyimiz
kimi Yaltaya gələcəyim günü bildirmək
üçün bu məktubu iki nüsxədə (biri
Moskvaya; o biri Yaltaya) Sizə göndərirəm.
Görüşənədək. Sizin Səkinə xanım”.
Məktubdakı “Əzizim”, “Sizin” sözləri Arif müəllimi
narahat etsə də, məktubun Səkinə xanım tərəfindən
yazıldığını nəzərə alaraq çox “dərinə”
getmədi.
Səkinə xanım Yaltaya
çatdığı gün Arif müəllim ən
yaxşı sanatoriyalardan birinə putyovka ala bilmişdi. Arif
müəllim Səkinə xanımın sanatoriya məsələsini
həll etdikdən sonra onlar xudafizləşmiş, sonra cəmi
bir dəfə təsadüfən dənizkənarı parkda
rastlaşmış, ayaqüstü hal-əhval tutduqdan sonra
ayrılmışdılar.
İstirahətdən
qayıdan Səkinə xanım çox şən, gümrah
görünürdü. O, işə çıxan kimi Arif
müəllimə baş çəkmiş, ona minnətdarlığını
bildirmişdi.
– İnanın, Arif müəllim,
ilk dəfədir, hiss edirəm ki, istirahətdən gəlmişəm.
Allah sizə uzun ömür, can sağlığı versin.
Siz insanlara lazımsınız.
İş günü deyildi.
Arif müəllim dənizkənarı parka getməyə
hazırlaşırdı. Telefona zəng gəldi:
– Arif müəllim, salam, məni
Əliş müəllim göndərib ki, sizi onun
bağına aparım.
– Bəs niyə özü zəng
eləmir?
– Yəqin maşın
göndərməyi zəngdən vacib sayır. Beş dəqiqəyə
sizin evin qabağındayam.
Əliş müəllimin
bağı Bilgəhdə idi.
Arif müəllim Əliş
müəllimin sürücüsünü görməmişdi.
– Siz Əliş müəllimin
sürücüsünüz?
– Xeyr. Mən onun yaxın
tanışıyam.
– Nə münasibətlə
bu gün Əliş müəllim bizi yığır bir yerə?
– O, hər şənbə
dostları ilə birgə olur, yeyib – içməyə bir bəhanə
axtarır.
Bilgəhə az
qalmışdı. Sürücü maşını yoldan
xeyli aralı sürüb saxladı.
– Olar, bir siqaret
yandırım?
– Buyurun.
Sürücü çox həyəcanlı
görünürdü. O, siqareti əsən barmaqları
arasında saxlaya bilmirdi.
– Bilirsiniz mən kiməm? – əsəbi
halda siqareti tulladı.
– Xeyr.
– Mən Səkinə
xanımın əriyəm. O, sizinlə birlikdə Yaltada
istirahət edib.
– Birlikdə yox, bir şəhərdə.
Mən sizin halınızı başa düşürəm,
amma məsləhət bilirəm ki, tələsik nəticə
çıxarmayasınız, mən hər şeyə
aydınlıq gətirməyə hazıram. Siz hardan bildiniz
ki, mən Səkinə xanımla Yaltada olmuşam.
– Onun mətləbə nə
dəxli var?
– Var. Mən əminəm ki,
bunu Səkinə xanım Yaltadan gələn kimi özü
deyib, hər şeyi olduğu kimi sizə danışıb.
– Bəli, elədir, o, istirahətdən
qayıdan kimi hər şeyi mənə danışdı.
– Bəs elə isə, niyə
bunları biləndən on gün sonra məni
yaxalamısınız?
– Buna səbəb onun sizə
Moskvaya yazdığı məktubdur. Siz Moskvanı tez tərk
eləmisiniz, odur ki, məktub Sizə çatmayıb. O, məktub
bir ay Moskvada qaldıqdan sonra əks adreslə evimizə
qayıdıb. Məktubdan eşq – məhəbbət
yağır. “Əzizim”, “Sizin Səkinə xanım”. O, nə
vaxtdan Sizin Səkinə xanımınızdır, Arif müəllim.
– Hə, indi hər şey
aydındır. Adınızı da bilmirəm.
– Biqeyrət kişinin
adını bilməsəniz yaxşıdır.
– Nə
özünüzü, nə də Səkinə xanımı
ittiham etməyə haqqınız yoxdur. Səkinə
xanımın başqa fikiri olsaydı, o, məktuba əks
ünvan yazmazdı, Yaltada məni gördüyünü belə
gizlədərdi. İndi mən hər şeyi olduğu kimi
danışım, Səkinə xanımın dediklərilə
tutuşdurun, görəcəksiniz ki,.. amma fikirləşə
bilərsiniz ki, biz nə cür danışmağı şərtləşmişik.
Odur ki, məsələhətim belədir: mənə diqqətlə
qulaq as (Arif müəllim, nədənsə, “sən”ə
keçdi), sonra nə nəticə çıxararsan,
özün bilərsən. Qadınlar var ki, hər oyundan
çıxır, amma müəyyən müddət ifşa
olunmaqdan qaça bilirlər, çünki, daxili əxlaqsızlığı
zahirən ətrafdakılardan gizlədə bilirlər.
Onların hərəkətləri kənardan baxanda heç
bir şübhə yaratmır, hətta namuslu, həyalı,
abırlı qadın imici yarada bilirlər. Onların hər
bir hərəkəti yalnız ifşa olunmamaq üzərində
qurulub. Onlar ehtiyatlıdırlar, hiyləgərdirlər,
yalançıdırlar. Odur ki, belə qadınlar qorxulu
insanlardır. Elə qadınlar da var ki, daxilən pak, təmizdirlər.
Lakin hərəkətlərində, davranışlarında,
danışıqlarında ehtiyatsızdırlar,
başqalarının onun haqqında nə deyəcəyi onu
maraqlandırmır, o ki, təmizdir, pakdır. Bu da
düzgün hərəkət deyil. İnsan cəmiyyətin,
ətrafdakıların onun haqqında nə deməsinə
biganə qalmamalıdır, onlarla hesablaşmalıdır.
İnsanlarda şübhə yaradan davranışlara əhəmiyyət
verməməyi mən yersiz sayıram. Sənin Səkinə
xanımın ikinci tip qadınlardandır.
ƏKS ÜNVAN
O, daxilən namuslu, təmiz,
pak bir qadındır. Amma bəzi hərəkətləri,
davranışı, danışıq manerası mənim də
xoşuma gəlmir. Bir də görürsən ki, əməkdaşlarımızdan
kiminləsə əl verib görüşür. Əslində
burada elə bir qəbahət yoxdur. Amma o, qəbul olunmuş həddi
keçir – kişinin əllərini, elə bil, buraxmaq istəmir.
Mən Səkinə xanımı yaxşı
tanadığımdan, xasiyyətinə bələd
olduğumdan buna reaksiya verməyə bilərəm. Bəs ona
bələd olmayanlar nə fikirləşərlər? Kiminsə
nə fikirləşməyinə yersiz (mən əminəm
ki, Səkinə xanım sıxdığı əlin kişi
əli olduğu barədə heç fikirləşmir də)
bəhanə verməyə nə ehtiyac var. Bir də
görürsən, qəh-qəhəsi instutu
götürüb başına. Kənardan baxan, onu
tanımayan fikirləşər ki, bu vulqar qadını burada
niyə saxlayırlar. Əslində isə o, yüksək
intellekt sahibi, savadlı, bilikli, instituta lazımlı bir
kadrdır. Səkinə xanımı yaxşı tanısam da
onun ətrafdakılarla hesablaşmamasını bəyənə
bilmirəm. Mənə yazdığı məktublarda “Əzizim”,
“Sizin..” sözləri sən bildiyin “Əzizim”, “Sizin..” deyil.
Bu sözlər özünə yaxın dostu, iş
yoldaşı bildiyi bir insana, bu sözlərin mənasına
varmadan deyilən sözlərdir. Belə bir hərəkəti,
nə nəticə ola bilər barədə fikirləşməyən
Səkinə xanım kimi qadınlar edə bilər.
İndi, əzizim
(görürsən mən də qeyri-ixtiyari, Səkinə
xanımın işlətdiyi mənada bu sözü işlətdim),
sənin iki yolun var: Ya Səkinə xanımın namuslu, qeyrətli
həyat yoldaşı olduğunu istisnasız qəbul edib,
onun ətrafi ilə hesablaşmayan kaprizlərinə, yersiz
saydığın hərəkətlərinə,
davranışlarına dözməlisən, ya da...
özün bilən yaxşıdır. Bir məsləhətim
də odur ki, nəbadə onun hərəkətlərinə,
davranışına irad tutasan. Bu, onu yalnız təhqir edər.
Qalır dözmək. Bu, ailə qazancı
qarşısında elə böyük itki deyil. İndi,
bilmirəm, dediklərimdən nə nəticə
çıxartdın.
– Arif müəllim, mən
sizin haqqınızda çox eşitmişdim. Bu gün isə
siz mənə əxlaq dərsi keçdiniz. Mənə məsləhətlər
verdiniz. Məni elə bilin yenidən həyata
qaytardınız. Mən namusla sevgi arasında
qalmışdım. Mən sevgimə görə namusumu itirə
bilməzdim. Siz məni xilas etdiniz. Bir daha minnətdaram sizə.
– Görüşümüz
barədə Səkinə xanım bilməməlidir.
– Əlbəttə, Arif
müəllim. Allah xatirinə məni
bağışlayın, Arif müəllim, bu qan qaraldan
görüşə görə.
– Mən bu görüşə
görə səni qınamıram. Əksinə, bu
görüş neçə günlərdir sənə
rahatlıq verməyən məsələnin həllinə səbəb
oldu. Odur ki, mən görüşdən razı qaldım.
Amma belə görüşdən (sonluğu yaxşı
qurtarsa da) sonra çətin ki, mən Əliş müəllimin
qonaqlığında deyib-gülə bilim. Qonaqlıqda da deyib-gülmədin,
bir qəpiyə dəyməz. Odur ki, xahiş edirəm məni
“Əzizbəyov” metro stansiyasına çatdır, bulvara gedəsəm.
– Onda elə bulvara aparım
də?
– Yox, gecikərsən, Əliş
müəllim narahat olar. Əliş müəllimə deyərsən
ki, məni evdə tapa bilmədin. Telefonumu da bir müddət
söndürəcəm.
– Vallah, yaxşı
olmadı, Arif müəllim.
– Əksinə, çox
yaxşı alındı. Əsas məsələni həll
etdik.
Maşın geriyə
döndü. Arif müəllim xəbər tutanda maşın
bulvara yaxınlaşırdı.
Xəlil MƏCİDOĞLU
525-ci qəzet.- 2010.- 20 noyabr.- S.26.