Gənc Tamaşaçılar
Teatrı “Belaya Veja”
festivalında uğurla təmsil olunub
Azərbaycan Dövlət Gənc
Tamaşaçılar Teatrında çalışan
tanınmış sənətçi, əməkdar artist Şövqi Hüseynov bu günlərdə
Belarusun Brest şəhərində
keçirilən ənənəvi XV “Belaya
Veja” Beynəlxalq Teatr
festivalından qayıdıb. Bu festival miqyas
baxımından və təqdim olunan tamaşalar etibarilə önəmli tədbirlərdən
sayılır. Festivalda iştirakı barədə
söhbətləşdiyimiz Ş.Hüseynovun
bildirdiyinə görə, tədbir sentyabr
ayının 11-dən 18-dək davam edib: “Artıq iki ildir ki, kollektivimiz
bu festivala
qatılır. Hər il festivalda
15-16 ölkə təmsil olunur. Bu ölkələrdən Polşa,
İran, Venesuela,
İngiltərə, Belarus, Ukrayna və Rusiya ənənəvi
qaydada hər il bu festivalın iştirakçısı olur, bu il
isə Hindistan, Pakistan,
İtaliya da festivala qatılan ölkələr arasında
idi. Mən festivalda Patrik Züskindin “Kontrabas” əsərinin mono-tamaşası
ilə çıxış
etdim. Gün ərzində 4-5 tamaşa göstərilirdi
və ertəsi gün tamaşaların müzakirəsi keçirilirdi.
Bu müzakirələrə
münsiflər heyəti
və iştirak edən hər kəs qoşulurdu. Münsiflər heyətinə Rusiya,
İtaliya, Belarusun məşhur teatrşünasları
daxil idi. Təqdim etdiyim tamaşa bir çox ölkələrin teatrlarının
repertuarına daxildir və münsiflər heyətinin üzvləri müqayisəli şəkildə
bizim tamaşa haqqında fikirlərini bölüşdülər, bəyəndiklərini
bildirdilər. Görkəmli teatrşünaslardan belə
fikirlər eşitmək
özü artıq böyük uğur sayıla bilər”. Qeyd edək ki, festivalda
Azərbaycan Dövlət
Gənc Tamaşaçılar
Teatrının “Kontrabas”
tamaşası “Ən
yaxşı mono-tamaşa”
mükafatına layiq görülüb. Ş.Hüseynov
bildirib ki, sözügedən yaradıcı
kollektiv birinci dəfə böyük yazıçı Qoqolun “Dəlinin qeydləri” əsəri ilə festivalda təmsil olunub: “Keçən il festival bütünlükdə
Qoqola həsr olunmuşdu. Bu il
isə festival Çexovun
yaradıcılığını əhatə edirdi. Lakin bu o demək deyildi ki, festivalda
göstərilən tamaşalar
yalnız Çexovun əsərləri olmalı
idi. Bu festival müxtəlif janrları özündə əks etdirən yaradıcılıq
tədbiridir”. Ş.Hüseynov
festivalda bir sıra nüfuzlu və fəal heyətlərin iştirak
etdiyini xüsusi vurğulayıb: “Festivalda
Rusiyanın Perm şəhərini
təmsil edən yaradıcı kollektiv
Martin Maqdonaxın “İnişman
adasından olan əlil” əsərini göstərdi. Bu əsər dünyanın
10-15 ölkəsinin aparıcı
teatrlarının repertuarında
yer alıb. Tamaşada heç bir musiqidən, kənar effektdən istifadə olunmamışdı, yekunda
bu əsər, haqlı olaraq, festivalın “Qran pri”sinə layiq görüldü. Bundan
başqa, Polşadan olan “Krakov küçə
teatrı”nın təqdim etdiyi “Korlar” əsəri və Berlinin “Russkaya ssena” teatrının tamaşası
bəyəndiyim səhnə
işlərindən oldu.
Festivalda
zəif tamaşalar da vardı və
bunlar ilk növbədə
Brest şəhərindən, İran və İtaliyadan olan sənətçilərin təqdim
etdiyi tamaşalar idi”. Sözügedən festivalda başqa
tamaşalar da təqdim edən Gənc Tamaşaçılar
Teatrı hazırda Səudiyyə Ərəbistanı,
Sloveniya və Almaniyada keçiriləcək
festivallarda da iştirakı gündəmdədir.
Bu kimi tədbirlərdə
iştirakla əlaqədar
Gənc Tamaşaçılar
Teatrına Mədəniyyət
və Turizm Nazirliyi tərəfindən
müvafiq qaydada dəstək verilir.
HÜSNİYYƏ
525-ci qəzet.-
2010.- 23 sentyabr.- S.7.