“Cavad xan”ın Zaqatalada təqdimatı olub

Zaqatala rayonunun Əliabad qəsəbə mədəniyyət evində “Cavad xan” filminin təqdimatı keçirilib. Mədəniyyət evindən mətbuata verilən məlumat görə, tədbiri giriş sözüylə açan rayon icra hakimiyyətinin başçısı Mübariz Əhmədzadə xalqımızın qəhrəmanlıq tarixinin əhəmiyyətli dövrünü əks etdirən və qorxmaz sərkərdə Cavad xan haqqında çəkilən bu filmi Azərbaycan kino sənəti tarixində çox uğurlu addım kimi dəyərləndirib: “Əminəm ki, bu ekran əsəri gənclərin vətənpərvərlik tərbiyəsinə mühüm töhfələr verəcək”. Filmin ssenari müəllifi, millət vəkili, xalq şairi Sabir Rüstəmxanlı çıxışında bu ekran əsərində xalqımıza məxsus qəhrəmanlıq, vətənpərvərlik hisslərinin geniş əks olunduğunu deyib. Millət vəkili çəkilişlərə göstərdikləri köməyə görə hərbçilərə və zaqatalalılara filmin yaradıcı heyəti adından minnətdarlığını bildirib.

Filmin quruluşçu rejissoru Rövşən Almuradlı XIX əsrin əvvəllərində general Sisianovun başçılıq etdiyi rus qoşunlarına qarşı oğulları ilə birlikdə mübarizə aparan və mərdliklə həlak olan sərkərdə Cavad xan haqqında yaradılmış bu filmin maraqlı bir ssenari üzrə – S.Rüstəmxanlının “Ölüm zirvəsi” romanının motivləri əsasında lentə alındığını diqqətə çatdırıb. R.Almuradlı filmin döyüş səhnələrinin Zaqatala qalası ətrafında çəkildiyini, çəkilişlərdə Daxili Qoşunların “N” saylı hərbi hissəsinin əsgərlərinin də yaxından iştirak etdiyini vurğulayıb. Çıxışlardan sonra film nümayiş etdirilib. Xatırladaq ki, ekran əsəri Mədəniyyət və Turizm Nazirliyinin sifarişi ilə “Bizim Kino” prodüser mərkəzində istehsal olunub. Filmin çəkilişləri Bakı, Gəncə, Zaqatala, Şəki və digər tarixi məkanlarda gerçəkləşib. Əsas rolları xalq artistləri Nurəddin Mehdixanlı, Amaliya Pənahova, Ramiz Novruz, Rafiq Əzimov və başqaları ifa ediblər.

SARA

525-ci qəzet.- 2010.- 15 yanvar.- S.7.