III Beynəlxalq foto müsabiqəsinin qalibləri mükafatlandırılıb

Muzey Mərkəzində mərhum heykəltəraş Müslüm Eldarovun xatirəsinə həsr olunmuş “Ənənələr və müasirlik – Bakı-2009” 3-cü beynəlxalq foto müsabiqəsinin qaliblərinin mükafatlandırılma mərasimi keçirilib. Müsabiqədə Azərbaycanla yanaşı, ABŞ, Rusiya, Monako, Türkiyə, Qazaxıstan, Latviya, Ukrayna və başqa ölkələrin fotoqrafları iştirak ediblər.

Tədbirdə çıxış edən “Yeni qalereya” sərgi salonunun direktoru Rafael Gülməmmədli tədbiri 2001-ci və 2005-ci illərdə keçirilmiş eyniadlı müsabiqələrin məntiqi davamı kimi xarakterizə edib: “Bu genişmiqyaslı mədəni layihənin həyata keçirilməsinin təşəbbüskarı rəssam və ictimai xadim, əsl vətənpərvər insan Müslüm Eldarov olub. Müsabiqələrin başlıca məqsədi mədəniyyət, ümumən humanitar sahələrdə qazanılan təcrübənin yayılması, mübadiləsi, xalqların və ölkələrin tərəqqisi naminə beynəlxalq qüvvələrin səfərbər edilməsidir”.

Mərasimdə Rəssamlıq Akademiyasının rektoru, xalq rəssamı, M.Eldarovun atası Ömər Eldarov, Mədəniyyət və Turizm Nazirliyinin şöbə müdiri Leyla Axundzadə, xalq rəssamı Ağəli İbrahimov, layihənin əlaqələndiricisi İrina Eldarova, xarici işlər nazirinin müavini Mahmud Məmmədquliyev və başqaları çıxış edərək mərhum heykəltəraşın yaradıcılıq yolundan söz açıblar: “Vaxtilə Müslüm Eldarovun rəhbərliyi altında fəaliyyət göstərmiş Bakı İncəsənət Mərkəzi bir sıra vacib siyasi-ictimai və mədəni tədbirlərin mərkəzinə çevrilib. Məhz onun səyi nəticəsində Rusiya, Fransa, İngiltərə, Birləşmiş Ərəb Əmirlikləri və başqa dövlətlərlə əməkdaşlıq genişləndirilib, rəssamlarımızın xarici ölkələrdə əsərlərinin sərgisi baş tutub”. Tədbirdə M. Eldarova həsr olunmuş sənədli film nümayiş etdirilib.

Qeyd edək ki, 2009-cu ilin aprelində elan olunan “Ənənələr və müasirlik – Bakı-2009” 3-cü beynəlxalq foto müsabiqəsi 8 nominasiya üzrə keçirilib. 15 ölkədən 200-ə yaxın müəllif müsabiqəyə 2000-ə yaxın foto təqdim edib. Bu əsərlərin içərisindən ən yaxşı 50 iş min nüsxə ilə buraxılan kataloqda nəşr olunub. Hər nominasiya üzrə 3 qalib müəyyən edilib, onlara diplomlar verilib. Müsabiqənin “Qran pri” mükafatını latviyalı Qunar Bindi qazanıb. A kateqoriyası üzrə I yeri “İçərişəhər” əsərilə Leyla Güləliyeva, II yeri Tahir Məmmədov, III yeri Qazaxıstan təmsilçisi Feliks Şparbert tutub.

SARA

525-ci qəzet.- 2010.- 15 yanvar.- S.7.