“Sehrbazlar dərəsi” haqqında “Literaturnaya qazeta”da resenziya dərc olunub

Rusiya yazarlarının nüfuzlu mətbuat orqanı “Literaturnaya qazeta”nın martın 23-də işıq üzü görmüş sayında son dövrlərdə bu ölkənin kitab mağazalarında rastlanan uğurlu nəşrlərdən söz açılır. Bunların sırasında ötən il Rusiyanın şimal paytaxtı Peterburqda nəşr olunmuş “Dolina Kudesnikov” (“Sehrbazlar dərəsi”) romanı haqqında ayrıca danışılır. Xatırladaq ki, görkəmli yazıçı Kamal Abdullanın “Sehrbazlar dərəsi” romanını tanınmış rusiyalı yazar Lyudmila Lavrova rus dilinə tərcümə edib, əsər Sankt-Peterburqun məşhur “Zlatoust” nəşriyyatında işıq üzü görüb. Rusiyanın mətbuat səhifələrində roman haqqında artıq bir neçə məqalə, araşdırma yazısı çap olunub. “LQ”nin sözügedən sayında “Sehrbazlar dərəsi” romanı haqqında çap olunmuş resenziyada deyilir: “Görkəmli Azərbaycan yazıçısı Kamal Abdullanın yeni romanı fəlsəfi pritça janrında qələmə alınıb və sakinləri məkanı və zamanı idarə etməyə qadir olan Sehrbazlar Dərəsindəki qeyri-adi hadisələr haqqında söz açır. Bu əsər həyatında heç olmasa bir dəfə şərq nağıllarının sehrinə düşən və sufi fikrinin zəngin xəzinəsi ilə maraqlanan hər kəsin xoşuna gələcəkdir. Roman kədərli hisslər də doğurur, çünki burada həm də haqsızlıqlar, amansızlıq və qisas barədə danışılır. “Göyüzünün rəngi Yerdə axan qanların rəngindən asılıdır” – əsərin qəhrəmanlarından biri belə deyir. Kitab əyani surətdə sübut edir ki, sırf realist janr kanonlarları çərçivəsində yazılmamış əsər də son dərəcə ciddi, mənalı və müdrik ola bilir. Burada təəccüblü heç nə yoxdur, axı ta qədim vaxtlardan bu yana bəşər övladının topladığı müdriklik miflərdə cəmlənmiş və qorunub-saxlanmışdır. Ona görə də nağıl-pritça-mif və adi insan həyatı arasındakı qırılma heç kəsə xeyir gətirmir: “Ruhunu itirmiş torpaq heydən düşüb”.

“Literaturnaya qazeta”nın mütəmadi olaraq yazıçı Kamal Abdullanın yaradıcılığına müraciət etməsi əlamətdar hadisə sayılmalıdır. Bu, onun son illərdə getdikcə daha da populyarlaşan əsərlərinə verilən qiymətin təzahürüdür.

525-ci qəzet.- 2011.- 2 aprel.- S.29.