Ali təhsildə
keyfiyyəti necə təmin etməli?
Son zamanlar Azərbaycan
vahid Avropa məkanına inteqrasiya üçün strateji
addımlar atır. Bura Avropa İttifaqı ilə geniş
qarşılıqlı əlaqələr, 2005-ci ilin
yazında Bolonya sazişinə qoşulma və digər
addımlar daxildir. Proses çox məntiqidir – Azərbaycan tək
yaşamaq üçün həddən artıq özəldir:
qloballaşan dünyada ayrılaraq yaşasaq həm dünya,
həm də ölkəmiz çox şey itirər. Belə
görünür ki, Azərbaycanın Avropaya inteqrasiyası
çox pozitiv və münasib bir prosesdir. Lakin daha çox
millətin özünəməxsusluğu sahəsinə – ali
təhsil ənənəsinin də aid olduğu mənəviyyat
sahəsinə toxunulduqda (Bolonya prosesini nəzərdə
tuturam) milli eyniləşmə üçün son əsasın
itirilməsi qorxusu yaranır. Bu tamamilə izah edilə bilən
bir qorxudur – o, lazımınca düşünülməmiş
yeniliklərlə bağlı orqanizmin
özünümüdafiə və
dayanıqlılığını təmin edir. Azərbaycan
Respublikası prezidentinin təsdiq etdiyi “2009-2013-cü illərdə
Azərbaycan Respublikasının ali təhsil sistemində
islahatlar üzrə Dövlət Proqramı”nda qeyd olunur ki, cəmiyyətin
tərəqqisi bütün dövrlərdə bilavasitə təhsilin
inkişafından və onun əhəmiyyətinin
düzgün qiymətləndirilməsindən asılı
olmuş, mövcud tələbat təhsilin
inkişafını sürətləndirmiş, elmi və
texnoloji nailiyyətlər isə təhsil sistemi
qarşısında həlli vacib olan daha mürəkkəb vəzifələr
qoymuşdur. Həmin sənəddə həmçinin
göstərilir ki, BMT XXI əsri “təhsil əsri” elan
etmiş və yüksək intellektə malik insan
kapitalının formalaşmasında, davamlı inkişafa zəmin
yaradan güclü iqtisadiyyatın qurulmasında ali təhsilin
rolu danılmazdır. Heç də təsadüfi deyil ki, bu
sənəddə ABŞ, Yaponiya, Cənubi Koreya kimi ölkələrin
bugünki səviyyəyə çatmasında maddi resurslardan
daha çox təhsil sistemlərinin yetişdirdiyi insan
kapitalının əvəzsiz rolu vurğulanır və həmin
ölkələrdə inkişafa təsir göstərən
amillər içərisində təhsilin çəkisinin təxminən
70 faiz təşkil etdiyi bildirilir. Bax budur təkzibolunmaz həqiqət.
Ulu öndərimiz demiş, təhsil millətin gələcəyidir.
Bolonya deklarasiyasının əsas bəndlərindən biri hər
bir ali məktəbdə təhsilin keyfiyyətinin təmini və
ona nəzarət ilə əlaqədardır. Demək olar ki,
vahid Avropa Ali Təhsil məkanının yaradılması
bugün Azərbaycan ali məktəbləri üçün
təhsilin səviyyə və keyfiyyətini diqqətlə nəzərdən
keçirmək üçün ciddi səbəbdir. Bu
çətin, lakin maraqlı bir yoldur, o, ali məktəblər,
təhsil nazirliyi və hökumətin fəaliyyətinin bir
çox aspektlərini yenidən dərk etməyi tələb
edir. Lakin bu istiqamətdə addım Azərbaycan həqiqətləri
şəraitində qərb sosial texnologiyasını tətbiq
etməklə və onu öz məzmunu ilə doldurmaqla Azərbaycana
Avropa məkanına inteqrasiyaya imkan verir. Təsadüfi deyil
ki, ali təhsilin modernləşdirilməsinə həsr olunan
forumlarda belə bir fikri eşitmək mümkündür ki,
Azərbaycan ali məktəblərində Bolonya deklarasiyasını
qərbə nisbətən “daha geniş başa
düşürlər”. Bu da bizim özəlliyimizdir. Vahid
Avropa Ali Təhsil Məkanına inteqrasiyaya gedən yol
mütləq keyfiyyətin təmin olunmasından keçir.
Dünya təhsil təcrübəsində keyfiyyətin təmin
olunmasının daha çox üç modeli – İngilis,
Fransız və Amerika modelləri diqqəti cəlb edib.
İngilis modeli əsasən akademik göstəricilərin
universitetdaxili qiymətləndirilməsini, Fransız modeli
universitetxarici qiymətləndirilməni, Amerika modeli isə təhsil
müəssisəsinin və təhsil proqramlarının
müstəqil akkreditasiya orqanları tərəfindən qiymətləndirilməsini
nəzərdə tutur. Bütün bu modellərlə
yanaşı düşünürük ki, təhsilin keyfiyyətinin
idarə olunması sisteminin yaradılması isə yeni idarəetmə
texnologiyalarının tətbiqidir. Əsas diqqət texnoloji
proses kimi keyfiyyətin idarə olunması sisteminin tətbiqinə
yönəldilir, məqsəd isə universitetin əsas iş
proseslərində keyfiyyətli təhsili təmin edən
mexanizmin yaradılmasıdır. Keyfiyyətin ümumi idarəsi
(menecmenti) – bu yalnız idarəetmənin effektli metodu deyil, hər
şeydən əvvəl, dünyagörüşü,
insanlar arasında idarəetmə sistemi, təşkilat fəlsəfəsidir.
Ona görə də keyfiyyətinin idarə olunması
sisteminin tətbiqi yalnız bütün əməkdaşların
bu prosesi anlaması əsasında mümkündür. Keyfiyyətinin
idarə olunmasının əsasında Keyfiyyətin Ümumi
İdarəsinin ardıcıl hərəkəti prinsipi
dayanır, yəni “planlaşdır-et-öyrən-qiymətləndir-hərəkət
et-təkmilləşdir”. Bunları ümumiləşdirsək
keyfiyyətin idarə olunmasının aşağıdakı
prinsiplərini müəyyən etmiş olarıq: – proseslərin
menecmenti; – ictimaiyyət qarşısında məsuliyyət;
– istehlakçı tərəfə meyllilik; – nəticə və
məqsədə çatmağa doğru meyllilik; – əməkdaşların
cəlb edilməsi, iştirakı və motivə edilməsi ;
– korporativ əməkdaşlığın inkişafı; – əməkdaşların
daimi təlimi, innovasiyalar; – qətiyyətli rəhbərlik.
Fikrimizcə, bu prinsiplər arasında prioritet olanlar proseslərin
menecmenti, korporativ əməkdaşlığın
inkişafı, savadlı-kompotent əməkdaşların cəlb
edilməsi, iştirakı və motivə edilməsi,
istehlakçı tərəfə meyllilikdir. Bəs keyfiyyətin
ümumi idarəsinin əsas elementlərinə nələri
aid etmək olar? Düşünürəm ki, bunlar
aşağıdakılardır: – təşkilatın
bütün əməkdaşlarının işə cəlb
olunması, –“rəhbər- tabe olan” arasında
qarşılıqlı əlaqənin yeni prinsipi, – səlahiyyətin
yuxarıdan aşağı, yəni güclü bənddən
orta bəndə və bu ardıcıllıqla verilməsi,
–yaxşı işə görə yeni mənəvi və
maddi stimul, –yeniliklərin qəbulu üçün psixoloji
maneələri aşma. Ali məktəbin konkret kollektivi
öz işinə görə məsuliyyət
götürür. Bu, korporativlik universiteti xaricdən vadar edilən
sərt dağıdıcı fəaliyyətlərdən də
qoruyur. Hər bir ali məktəb – texniki, pedaqoji və ya
klassik universitet keyfiyyətin ümumi idarə prinsiplərini
öz spesifik şərait və xüsusiyyətləri ilə
uyğunlaşdırır. Bu tamamilə doğrudur, belə
ki, qərbdə yaranan yeni sosial texnologiyaları tətbiq edərək
Azərbaycan universitetləri hər şeydən əvvəl
öz unikal ənənələrini – onilliklər ərzində
yaradılan təkrarolunmaz humanitar mühit və mənəvi
atmosferi saxlamağa çalışır. Təhsildə
keyfiyyətinin idarə olunması sistemi həmişə
proseslərin strukturunun qurulması və texnologiyasının
yaradılması ilə əlaqəlidir. Bu gün
Respublikamızda bu işə həm klassik və həm də
pedaqoji universitetlər cəlb olunub. Burada biz ali məktəb
kollektivinin sosial psixoloji iqlimində dəyişikliklər əsasında
yeni sosial texnologiyaların üzə çıxmasını
gözləyə bilərik, belə ki, universitetin “intellektual
məhsulunun” keyfiyyəti birbaşa olaraq onun
“buraxılmasında” iştirak edənlərdən,
universitetin əməkdaşlarından asılıdır. Ali
təhsildə keyfiyyətin idarə olunması sahəsində
mövcud vəziyyəti təhlil edərək ölkəmizdəki
ali məktəbləri təhsildə keyfiyyətin təmin
edilməsi texnologiyasının tətbiqinə görə bir
neçə qrupa bölmək olar: 1) beynəlxalq keyfiyyət
sertifikatı alan ali məktəblər; 2) öz keyfiyyət
sistemini təsdiqləməyə hazırlaşan ali məktəblər;
3) öz keyfiyyət sistemini yaradan, lakin onun təsdiqlənməsinə
can atmayan ali məktəblər 4) keyfiyyət sisteminin
ayrı-ayrı elementlərinin tətbiqinə başlayan ali məktəblər
5) bu prosesə yenicə yaxınlaşan ali məktəblər.
Maraqlıdır ki, təsdiq edilmiş keyfiyyət sistemlərinin
mövcudluğu həmişə onun ali məktəbdə
doğrudan da fəaliyyət göstərməsini təsdiq
etmir. Bundan başqa, öz keyfiyyət sistemini təsdiq etmək
və ya etməmək isə ali məktəbin öz
işidir. Təhsilin keyfiyyətindən danışdıqda,
onu təmin edən dörd əsas faktoru ayırmaq
lazımdır: 1) təhsilə qoyulan sərmayənin həcmi
2) müəllimlərin səriştəliliyi-kompotentliyi 3)
abituriyentlərin səviyyəsi 4) təhsilin məzmunu
Mövcud vəziyyəti uzun uzadı təhlil etmək,
problemləri uzun-uzadı sadalamaq olar. Bircə məsələ
hamımıza gün kimi aydındır ki, mübahisəsiz
olaraq regionun intellektual və mənəvi potensialını
özündə cəmləşdirən universitetlər təhsilin
keyfiyyəti ilə vəziyyəti dəyişə bilərlər.
Burada da keyfiyyətin idarəsi texnologiyasından istifadə
etmək vacibdir. Keyfiyyətin İdarəsi Sisteminin
yaradılması üzrə işləyən bütün ali
məktəbləri iki qrupa bölmək olar: 1) Keyfiyyətin
İdarəsi Sisteminin yaradılması üçün
neçə il cəhd edən ali məktəblərdə
ümumilikdə az şey edilmişdir, ən yaxşı halda
Keyfiyyətin İdarəsi Sisteminin hər hansı bir elementlərindən
istifadə olunur, sistemin özü isə yoxdur. Keyfiyyət məsələsi
ilə məşğul olan qrup daha çox nəzəriyyəyə
meylli olur, kurslarda təlim keçir və ya kurslar açaraq
digərlərini öyrədir. Belə ali məktəblərdə
Keyfiyyətin İdarəsi Sistemi kağız üzərində
mövcud olan diaqram və sxem formasında olur. 2) Keyfiyyətin
İdarəsi Sistemi texnologiyalarının real tətbiq
olunduğu ali məktəblər. Keyfiyyətin İdarəsi
Sisteminin yaradılmasında özünün və digər ali
məktəblərin təcrübəsini təhlil edərək
bu prosesin aşağıdakı əsas problemli məqamlarını
nəzərə almaq lazımdır: a) Top menecerlərin, yəni
rektor, prorektorun Keyfiyyətin İdarə Sisteminin tətbiqində
zəruri real marağı. b) Beyinlərin cəlb olunması
problemi, yəni top menecerlərin, təhsilin keyfiyyətinin təmin
olunması texnologiyasının ilk olaraq rəhbərlərin
yeni bilikləri, intellektual texnologiyaları mənimsəməli
olduqlarını başa düşmələridir. Bu həm
maddi xərc, həm də mənəvi sərf (əslində
sonuncu qanunauyğun olaraq daha çətindir, çünki
dünyagörüşünün dəyişilməsi məsələsidir)
tələb edir. c) Rəhbərlik üslubunun dəyişdirilməsi.
Texnologiyaların tətbiqi, eyni zamanda ali məktəbin idarə
üslubunun avtoritar elementlərinin texnoloji elementlərlə əvəz
edilməsi deməkdir. Bir qayda olaraq təşkilatlarda prosesi tənzimləmək
işini qabaqcıl idarəetmə texnologiyalarını mənimsəyən
insanlar başlayır. Və ən əsas problem – Prosesi
başlayanların keyfiyyət ideyasını başa
düşənə qədər keyfiyyət sisteminin tətbiqi
ilə məşğul olması məsləhət deyil. Bu ən
vacib məsələdir. Keyfiyyət Sisteminin tətbiqinin
başlanğıcında yaxşı ideoloji işin
yoxluğu bu proseslərin ali məktəblərdə illər
boyu zəif effektli olmasının əsas səbəbidir. Son
olaraq onu qeyd etmək lazımdır ki, Ali təhsil sistemində
rəqabətli mübarizəyə hazır ali məktəblərlə
digərləri arasında sərhəd gündən-günə
daha aydın görünməkdədir. Bugün Ali təhsil
menecerləri üçün ali təhsil problemini həll etmək
sanki riyaziyyatçı üçün Ferma teoremidir-çətin,
lakin hədsiz dərəcədə maraqlı bir iş. Vacib
olan odur ki, gərək problemin həllinə düzgün
yanaşasan, strategiya yaradasan və doğrudan da işlə məşğul
olasan. Bir məsələni də yaddan çıxarmaq olmaz
ki, ali təhsil haqqında müasir diplom statusunun dəyəri
düşür. Bu gün işə götürən təcrübəsiz
ali təhsil məzununu deyil, iş təcrübəsi olan
mütəxəssisi böyük məmnuniyyətlə işə
dəvət edir. Bəs nə etməli? Ali təhsildə
keyfiyyəti necə qaldırmaq olar? – Hal-hazırda təhsil
sistemi ilə əmək bazarı arasında uyğunsuzluq
genişlənir. Bu, təkcə Azərbaycanın deyil,
Amerikanın, Avropanın, hətta Çinin problemidir. O,
inkişaf etmiş təhsil sisteminin mövcud olduğu və
iqtisadiyyatın strukturunun tez-tez dəyişdiyi hər yerdə
yaranır. Səbəb ondan ibarətdir ki, əmək
bazarı çox dinamik inkişaf edir, mütəxəssislərə
yeni tələblər yaranır, hətta “mütəxəssis”
anlayışı da dəyişir. Təhsil isə təbiətcə
mühafizəkardır. Universitetlər, məktəblər
öz ənənələrini, vərdişlərini,
standartlarını saxlamağa çalışırlar. Demək
uyğunsuzluq qaçılmazdır. Sadəcə onu dramatikləşdirmək
lazım deyil. Bu gün ali məktəb məzunlarının
çoxunun öz ixtisası üzrə işləməməsi
təbii tendensiyadır. Lakin əgər belə uyğunsuzluq
çox böyükdürsə, problemlər başlanır,
işə götürən şikayətlənir, təhsilin
paralel sistemləri yaradılır – kadrların
hazırlanması üçün korporativ proqramlar, hətta
korporativ universitetlər, beləliklə də diplom rəsmiyyətə
çevrilir, peşəkar hazırlıqdan daha çox sosial
status simvolu olur. Məsələ təhsil sistemini əmək
bazarının dəyişən şəraitinə
yaxınlaşdırmaqdır. Biz daha yaxşı olar ki, “fərdi
təhsil trayektoriyası”na keçək. Yəni birinci kurs tələbəsi
ən əvvəldən harada işləyəcəyini, nə
ilə məşğul olacağını, öz
karyerasını necə quracağını nəzərə
alaraq öz trayektoriyasını müəyyənləşdirir.
O, kursları, seminarları özü seçir və
alacağı biliyə görə özü məsuliyyət
daşıyır. Bu əlbəttə ki, ideal vəziyyətdir,
lakin hələ ki, bizdə heç bir yerdə tətbiq
olunmur. Bolonya prosesinin aşkar faydasına baxmayaraq, onun tələblərini
tam qəbul etmək XX əsrin sonunda ali təhsil sisteminin əsaslandığı
ənənələrin demək olar ki, əksəriyyətindən
əl çəkmək deməkdir. Bolonya prosesi qanun deyil, fəaliyyət
üçün bələdçidir. Əgər Bolonya
prosesinə rəsmi tələblər yığını
kimi baxsaq, belə tələbləri mexaniki olaraq tətbiq etsək,
yaxşı heç nə əldə etmək mümkün
olmayacaq. Ümumilikdə, Bolonya prosesi kifayət qədər
demokratikdir – hər bir ali məktəb özü
üçün müəyyənləşdirməlidir ki, bu
prosesdə hansı miqyasda və formatda iştirak edəcək.
Vacib olan başqa bir məsələdir –XXI əsr təhsili
XX əsr təhsilindən fərqlənəcək və Azərbaycan
bu sahədə da digər inkişaf etmiş ölkələrdən
geri qalmamalıdır.
Əfqan ABDULLAYEV,
professor, Azərbaycan
Dillər Universiteti
İngilis dili fakültəsinin
dekanı,
ABŞ Dövlət Departamenti
Senator
Fulbrayt mükafatları
sahibi
525-ci qəzet.-
2011.- 8 aprel.- S.5.