“Arazdan gələn səs” üçün İmza günü
Ötən gün Azərbaycan Yazıçılar Birliyinin
(AYB) “Natəvan” klubunda
yazıçı Şövkət
Zərin Horovlunun “Arazdan gələn səs” kitabının təqdimatı, müzakirəsi
və imza günü gerçəkləşib.
Tədbiri giriş
sözü ilə açan AYB-nin katibi Rəşad Məcid müəllifi istedadı, məhsuldar yaradıcılığı ilə
seçilən qələm
sahibi kimi səciyyələndirib: “Onun
yaradıcılığında Qarabağ mövzusu üstünlük təşkil
edir. Elə təqdimatı
keçirilən “Arazdan gələn səs” romanı da
Qarabağ acılarını ədəbiyyata gətirməyə
xidmət edir”. Tədbirin aparıcısı olan “Ulduz”
jurnalının baş redaktoru, yazıçı-dramaturq
Elçin Hüseynbəyli Ş.Z.Horovlunun
yaradıcılığı haqqında ətraflı məlumat
verib: “Yazıçının bundan əvvəl “Çinar həsrəti”,
“Mən Araz qızıyam”, “Sözün işığı”,
“Dünya səndən nigaranam” kitablarında olduğu kimi,
burada da Qarabağ faciələrindən, tariximizin
ağrılı anlarından söhbət
açılır”.
“Ədəbiyyat
qəzeti”nin şöbə müdiri, şair Adil Cəmil “Arazdan gələn səs” kitabını acı talelər, amansız hadisələr romanı kimi qiymətləndirib: “Kitabda erməni daşnakları tərəfindən
Azərbaycan xalqının
yurdundan-yuvasından didərgin
salınması, qız-gəlinlərimizin
girov götürülməsi,
əsirlərimizin başına
gətirilmiş ağlasığmaz
vəhşiliklər ətraflı
göstərilib.
Romanda psixoloji məqamlar çox aydın boyalarla təsvir olunub”. A.Cəmil müəllifi yubileyi münasibətilə
də təbrik edib, ona yeni yaradıcılıq
uğurları arzulayıb. Şairlər
İlyas Tapdıq, Oqtay Rza da çıxış edərək,
Ş.Z.Horovlu yaradıcılığı və bu kitabı
haqqında fikirlərini dilə gətiriblər.
Tədbirdə Beynəlxalq Mahmud Kaşğari Fondunun icraçı direktoru, şair Elxan Zal Qaraxanlı müəllifi “San yarlığı”
mükafatı ilə
təltif edib. Mükafat
yazara vətənpərvərlik mövzusunda qələmə
aldığı əsərlərə və “Arazdan gələn
səs” romanına görə verilib. Sonda
çıxış edən Ş.Z.Horovlu tədbirin təşkilatçılarına
və iştirak edənlərə minnətdarlığını
bildirib, şeirlərini oxuyub. Qeyd edək
ki, əsasən şair kimi ədəbi fəaliyyətilə
tanınan müəllifin “Arazdan gələn səs” kitabı
onun irihəcmli nəsr sahəsində ilk qələm təcrübəsidir.
Kitaba Musa Ələkbərli “Ehtiyacdan doğulan
roman” adlı önsöz yazıb.
HÜSNİYYƏ
525-ci qəzet.-
2011.- 13 aprel.- S.7.