Mütəfəkkir
Azərbaycan
mədəniyyəti tarixində danılmaz xidmətləri
olan böyük şəxsiyyətlər çoxdur – Mirzə
Cəlil, Üzeyir Hacıbəyov, Səməd Vurğun, Rəsul
Rza.
Bu
sırada dayanan görkəmli şəxsiyyətlərindən
biri də Anardır. Onun fəaliyyəti keçən əsrin
60-cı illərindən başlayır. Publisist, esseçi,
ssenarist, dramaturq, alim, nasir – bunlar sadəcə gəlişigözəl
sözlər deyil, Anarın həyatı, fəaliyyətidir...
Mədəniyyətimiz
tarixində xüsusi yeri olan “Qobustan” incəsənət
toplusu Anarın çoxşaxəli fəaliyyətinin bir hissəsidir.
Ümummilli liderimiz H.Əliyevin “Qobustan” haqqındakı fikirləri
çox dəyərlidir. H.Əliyev deyirdi: “... O vaxtlar
“Qobustan” jurnalı həyatımızda çox böyük
rol oynayırdı. Bizim bu milli dirçəliş, milli
oyanış, milli özünütanıma prosesində
“Qobustan”ın rolu çox böyük olubdur. Bunu o vaxtlar bəziləri
bəlkə də dərk etmirdilər. Bəlkə indi də
bəziləri o qədər də dərk edə bilmir. Amma mən
bunların hamısını daim izləyirdim və hər bir
belə tədbirin həyata keçirilməsi
üçün lazımı şərait
yaradırdım...”
Yeni
sözlərin, terminlərin yaradılmasında, türk mənşəli
sözlərin dilimizə gətirilməsində “Qobustan”
toplusunun rolu əvəzsizdir.
Anarın
yaradıcılığının mühüm bir qolunu kino təşkil
edir: həm ssenarist kimi, həm də rejissor kimi.
Yazdığı ssenarilərdə də, çəkdiyi
filmlərdə də ağırlıq yenə tarixin, tarixi
şəxsiyyətlərin tərəfində olur: “Dədə
Qorqud”, “Ü.Hacıbəyov...”, “Qəm pəncərəsi”,
“Cavid ömrü”, “Qobustan”, “Qədim Gəncə-Yeni Gəncə”
“Bu – Səttar Bəhlulzadədir”, “Bu – Cavaddır..”
Anar
dramaturgiyasında da fəlsəfi-etik problemlərin
qoyuluşu və həlli baxımından da gözəl
örnəklər yaradıb: “Şəhərin yay günləri”,
“Sizi deyib gəlmişəm”, “Adamın adamı”, “Səhra
yuxuları”...
lll
Anarın
yaradıcılığının bir hissəsini tarixi şəxsiyyətlər
haqqındakı esselər təşkil edir. O biri esselərin
qiymətini azaltmadan “Anlamaq dərdini” xüsusi qeyd edərdim.
Bu esse Mirzə Cəlil haqqındadır – anlamaq və
anlanılmamaq barəsindədir...
Böyük
şəxsiyyətlərin dərdləri də böyük
olur: özləri anlayırlar, özlərini isə
anlamırlar, ya da anlamaq istəmirlər...
lll
Anarın
yaradıcılığının bir hissəsini də
çağdaş ədəbiyyatımız haqqındakı
fikirləri tutur. Bu yazılarda Anar təmkinli, obyektiv, qərəzsiz...tənqidçidir.
Bu yazıların da əsas qayəsi istedadları qiymətləndirmək,
onları yersiz və əsassız hücumlardan qorumaq, ədəbiyyatımızın
bu günü və sabahıdır. Müxtəlif yaş nəslinə
mənsub (indi artıq özünü tanıtmış və
təsdiq etmiş yaradıcı insanları xatırlamaq kifayətdir...)
bu insanlar çağdaş ədəbiyyatımızın
tanınmış simalarındandır...
lll
İyirminci
əsrdə Azərbaycan satirasının inkişafında iki
mərhələ var: birinci mərhələ əsrin əvvəlində
Mirzə Cəlilin “Molla Nəsrəddin” jurnalıdır ki, ətrafına
böyük şəxsiyyətləri toplaya bilmişdi.
Keçən əsrin ikinci yarısından sonra isə satira
yönümü Anarın “Molla Nəsrəddin-66”sı ilə
bağlıdır. Bu mərhələ “zarafatla”
başladı və “Yaxşı padşahın
nağılı” ilə də qurtardı...
Mirzə
Cəlil “qorxa-qorxa” kimlərdən yazmadı?!
“Yaxşı
padşahın nağılı” da baltanı kökündən
vuran əsərdir!..
Bu əsər
1970-cı ildə yazılıb!..
lll
Azərbaycan
ədəbiyyatında ekzistensializm fəlsəfi təlim və
ədəbi-estetik cərəyan kimi, sistem halında Anarın
yaradıcılığında öz əksini tapır. Gərgin
və maraqlı süjet, hadisələr, xarakterlər əsasında
insanın daxili dünyasının mürəkkəbliklərini,
ziddiyətlərini açmaqla əks etdirmək çox
böyük istedad, bilik və peşəkarlıq tələb
edir.
Ekzistensializmin
hansı müddəaları Anarın əsərlərində
təsdiqini tapır?
1)
Adamlar yalqızdır, tənhadır, qapalıdır,
qarşılıqlı anlaşılmazlığa məhkumdur
2)
İnsan simasız quruluşun qurbanıdır (faşizm,
stalinizm, durğunluq, “demokratiya”... Elçin bunu “taun”
adlandırır...)
3)
İnsanlar özlərinin yaratdığı, ancaq nəzarətdə
saxlaya bilmədikləri qurumlar, təsisatlar
qarşısında köməksizdir.
4)
Dünya, həyat mənasızdır.
5)
Dünyanın qarmaqarışıqlığı və
mürəkkəbliyi müqabilində zaman və məkan
“qırıqlığı” mövcuddur.
6) Hər
adam bütöv bir dünyadır, lakin bu dünyalar
arasında əlaqə, körpü yoxdur.
7)
Adamların ünsiyyəti zahiridir, ona görə də insan
qəlbinin dərinliyinə nüfuz etmir. Bu səbəbdən
də ünsiyyət yalqızlığı unutdurmur.
8)
İnsanlar ölüm qabağı – bir anlıq “sərhəd
situasiyasında” olurlar və həqiqəti dərk edirlər.
9) Əgər
insan yalqızdırsa və dünyada yeganə dəyərdirsə,
onda onun gələcəyi yoxdur və bu vaxt ölüm
mütləqdir. Həyat o vaxta qədər mənalıdır
ki, adamlar arasında əlaqə var.
10 )
Tale (qədər), qəza dəhşətlidir,
qarşısıalınmazdır, həmişə insanın
bir addımlığındadır. İnsanı hər yerdə
ölümün nəfəsi müşayiət edir. Lakin fərdin
düşdüyü şərait nə qədər sərt,
məcburi olsa da, o, öz həyatını təhlükə
qarşısında qoyaraq istədiyini etməkdə
azaddır.
11 )
İnsanın dünyaya gəlişi, təsadüfi olsa da,
onu mövcudluğundan əvvəlki reallıqla izah etmək
olmaz. İnsan hərəkətlərindən, əməllərindən
başqa bir şey deyildir.
12 )
Azadlıq əbədi, son günə qədər davam edən
əbədi prosesdir. Azadlıq mütləq deyil – azadlıq
azadlığa gedən yolun özüdür.
13 )
İnsanın mahiyyəti onun azadlığından
asılıdır.
14 )
Azadlıq – insanın özünə qaytımaqla öz
mövcudluğunu dərk etməsidir, “öz-özüylə
görüş”üdür.
15 )
İnsanın xoşbəxtliyi, sevinci, kədəri müəyyən
anlarla bağlıdır və həqiqət də elə
budur
16 )
İnsan “olum-ölüm” qarşısında mütləq bir
qərar qəbul etməlidir, birmənalı hərəkət
etməlidir.
17 )
İnsan hər hansı bir seçimi etməkdə sərbəstdir.
18)
İnsan özündən nəyisə gizlədə bilər,
ancaq başqalarından gizlənmək olmaz. Başqaları –
keçmiş bir an olmuş bir hadisəni, – o hadisəni ki,
onda seçim etmisən, – sənin yadına sala bilər və
ən pis, eybəcər cəhətlər üzə
çıxar (“Macal” povestində Fuadın həyatı və
gözləmədiyi anlarda keçmişinin
“xatırladılması”) .
Deməli,
“başqaları-cəhənnəmdir”.
19)
İnsanların bir-birinə və cəmiyyətin insanlara
total hücumu, təcavüzü özgələşməyə
gətirib çıxarır.
20)
İnsanın mövcudluğu, xarici aləmdən, mühitdən,
başqalarından asılıdır.
21)
İnsanın mövcudluğu, niyyət, arzu, istək, məqsəd
və s. həyata keçirməyə yönələn fəaliyyətdir.
22)
İnsanın özünü də əridib udan nəhəng
dövlət mexanizmində elə qruplar var ki, onlar fərdi
özünə tabe edir, insanı əridir və mexaniki bir
hissəsinə çevirir. Bu isə insanda tənhalığa
doğru meyl oyadır.
23)
İnsan öz-özlüyündə tamamilə azaddan və
özü öz ixtiyarındadır, lakin cəmiyyət hər
vasitə ilə ona qarşıdır.
24) Fərdin
azadlığı həm də obyektiv vəziyyətlərdən
asılıdır. Könüllü olmayan hərəkətlər
qeyri-əxlaqi, könüllü hərəkətlər isə
əxlaqidir. Deməli, azadlıq həm də ölüm
qorxusu keçirməyin üsuludur.
25)
Elm bəşəri problemləri nəinki həll edir, əksinə
onu kəskinləşdirir, çıxılmaz hala gətirir.
26)
Eksiztensializmə görə, bilik, idrak heç də insan
mövcudluğunun zəruri komponenti deyil, mövcudluq, həyat
deyil, instinktlər vasitəsi ilə ifadə olunur. Yaşamaq
üçün insan ətraf aləmlə özü
arasında əlaqə yaratmalıdır. Bu əlaqəni
yaratmaq üçün isə elmə ehtiyac yoxdur, bu əlaqə
instinktlər vasitəsi ilə olmalıdır.
27)
Ekzistensializmə görə, elm, texniki tərəqqi bəşəri
mövcudluğun ilkin, təbii, saf halını korlayıb
insanı dəyişdirir. İnsanla dünya arasında
harmoniya pozulur. Müasir insan yeni mədəni sərvət
yaratmır, o yalnız əşyalara sahib olmağa
çalışır (“Şəhərin yay günləri” əsəri,
Kərəm ləyaqətinin unudulması...)
28)
Ekzistensializmə görə, varlıq mahiyyətdən əvvəldir.
J.P.Sartı
“Ekzistensializm-humanizmdir” əsərində yazır: “Bu o deməkdir
ki, insan əvvəlcə var olur, dünyaya gəlir, ancaq
bundan sonra onun mahiyyəti müəyyənləşir.
Ekzistensializmə görə, insanı ona görə təyin
etmək olmur ki, o əvvəl-əvvəl heç nədir. O
yalnız sonralar insan olur, özü də özünü necə
yaradırsa, elə insan olur... ... İnsan var olur və o,
özünün təsəvvür etdiyi kimi yox, olmaq istədiyi
kimidir.
Ekzistensializmin birinci prinsipi budur...” (Tərcümə
Anarındır. Anar. Əsərlər VI cild. Bakı, “Nurlan”, 2006, səh. 540)
29) Başqasını mühakimə
etmək həm olar, həm olmaz. Ona görə
olmaz ki, insan tam səmimiyyətlə
və aydın şüurla seçim edirsə öz xətt hərəkətini
müəyyən edirsə,
ona başqa seçim təklif etmək olmaz... Ona görə mühakimə
etmək olar ki, insanın başqasının seçiminə
– hərəkətinə münasibət
onun öz varlığını da müəyyənləşdirir.
30) İnsan daimi dəyər deyil, o, özünü yarada-yarada
və itirə-itirə
insan olur.
31) “Yalnız bir ciddi fəlsəfi problemi var-intihar problemi. Yaşamağa dəyərmi, dəyməzmi,
bu suala cavab vermək fəlsəfinin fundamental sorğusuna
cavab verməkdir” (A.Kamyu)
32) “İntiharın səbəbləri
çoxdur, ən çox aşkarda olanlar – əsaslarından deyil...” (A.Kamyu)
33) İnsanın taleyi və ömrü Sizif əməyi kimi faciəvidir.
34) İnsan yeganə varlıqdır ki, ölüm qorxusu ilə yaşayır, daim ölüm haqqında fikirləşir.
35) Cəmiyyət insanı hər dəqiqə udmağa hazırdır, onun fəaliyyətini əlindən alır, arzularının həyata
keçməsinə imkan
vermir. Lakin insan cəmiyyətdə
yaşamağa məcburdur
və müəyyən
əxlaq normalarını
qəbul etməlidir.
36) Hər bir insanın
daxili əxlaqı var (Təhminə deyir: “... Mən elə hesab edirəm ki, insanın öz daxili əxlaqı olmalıdır və əgər bu əxlaq varsa, insan öz daxili
əxlaqına sadiqdirsə,
bütün zahiri şeylərin heç bir əhəmiyyəti yoxdur – kim nə
bilim nə dedi, nə fikirləşdi”)
37) Həyat, dünya mənasızdır. Dünyada heç
nəyi dəyişmək
mümkün deyil.
Həyat-ölümə aparan
yoldur...
lll
Keçən əsrin 90-cı illərində
yazılan əsərlərdə
isə təsvir olundu ki, insanlar
bu dünyada qəribdirlər. Onların doğma yerləri
yoxdur. Dünya – mehmanxanadır, müvəqqəti gecələmə
dayanacağıdır. Bu mehmanxananın harada
olmasının da elə bir əhəmiyyəti
yoxdur. İnsan hər yerdə qeyri-insaniliklə, təzyiq
və təqiblə üzləşir, başqaları
– cəhənnəmdir və
hətta sən özün nə qədər qaçsan da bu cəhənnəmdən
qurtara bilmirsən...
“Otel otağı”, “Qırmızı limuzin”,
“İlin fəsilləri,
yaxud qovluğun içindəkilər” əsərlərindən
çıxan əsas
nəticələr bunlar
idi...
lll
“Ora-bura səpələnmiş
fikir və düşüncələrimi müəyyən
ardıcıllıq üzrə,
bir mətn daxilində toplayarkən gördüm ki, elə bu qarmaqarışıqlığın
özündə də
bir sistem var – bir-birindən çox-çox uzaq anımların qəribə
yumağı, bilaixtiyar,
özün də bilmədən bir-birinə
qarışıb mozaik
olsa da, mənim daxili dünyamın, hiss və duyğularımın hadisələrə
qiymət verməyimin
müəyyən mənada
dəqiq mənzərəsini
yaradır. Bu gün mənə çox-çox sadəlövh
görünməyinə baxmayaraq,
bəzi vaxt ölmüş fikirlərimi
də verirəm.
Ona görə ki, fraqmentlər şəklində
olsa da, yalnız mənə aid olan fikir və
düşüncələrimdən – öz daxili dünyamdan üz döndərib heç nəyi danmaq, inkar etmək istəmirəm. Bəlkə həm
də ona görə ki, insan Özüylə – Gecə Həmsöhbətiylə
ünsiyyətlə, təsəvvür
edilməyən dərəcədə
səmimi olur. Əgər ümumiyyətlə, bu dünyada sonadək səmimi olmaq mümkündürsə. Özü
də sən bu səmimiyyəti başqalarıyla bölüşürsənsə...”
(Anar. Əsərləri. III cild, Bakı,
“Nurlan” 2004, səh.
426)
Bu qeydlər Anarın
“Gecə düşüncələri”ndəndir. Burada yazıçının “Gecə
Həmsöhbətiylə” ünsiyyətində çox
mətləblərdən danışılır
– Allah, insan (lar),
tarix, ədəbiyyat,
şəxsiyyətlər, hadisələr...
Bizim yaradıcı
şəxsiyyətlərin fəaliyyətini hissələrə
bölməyimiz (publisist,
ssenarist, esse, dramaturgiya, kino...) şərtidir. Əgər insanın şəxsiyyəti
bütövdürsə, onun
yaracıdıcılığı (bütün həyatı və fəaliyyəti) da şəxsiyyətinin bütövlüyünü tamamlayır...
Məncə, Anarın bütün
yaradıcılığı ilə bərabər “Sizsiz”, “Mübarizə bu gün də
var”, “Kərəm kimi” və “Gecə düşüncələri”
onun daxili dünyasının ifadəsi,
dünyagörüşü, dünya, insan, hadisələrə... yanaşma,
qiymətvermə baxımından
da dəyərlidir...
İlk qələm
təcrübələrindən bu günə qədər sətilrlərin
arasından böyük
bir yazıçı,
ictimai-siyasi xadim. Azərbaycanı
hər zaman və hər yerdə ləyaqətlə
təmsil edən bir mütəfəkkir boylanır, bu – Anardır...
Sabir BƏŞİROV,
fəlsəfə doktoru
525-ci qəzet.- 2011.- 13
avqust.- S. 25.