Görkəmli ədəbiyyatşünas Araz Dadaşzadənin 75 illiyi qeyd edilib

Azərbaycan Yazıçılar Birliyinin (AYB) “Natəvan” klubunda görkəmli tənqidçi və ədəbiyyatşünas alim, filologiya elmləri doktoru, əməkdar elm xadimi Araz Dadaşzadənin anadan olmasının 75 illiyilə bağlı tədbir keçirilib. Mərasim iştirakçıları əvvəlcə İkinci Fəxri xiyabana gedərək, mərhum alimin məzarını ziyarət ediblər. Tədbirdə AYB-nin sədri, xalq yazıçısı Anar çıxış edərək Araz Dadaşzadənin həyat və yaradıcılığı haqqında məlumat verib, görkəmli alimin xidmətlərini, onun yaradıcılığının ən mühüm məqamlarını diqqətə çatdırıb: “Araz Dadaşzadə 1936-cı il yanvarın 30-da Bakıda görkəmli ədəbiyyatşünas alim, akademik Məmməd Arifin ailəsində dünyaya gəlib. Ədəbi fəaliyyətə 1956-cı ildə “Azərbaycan gəncləri” qəzetində nəşr olunan “Tərli küləklər” rəyi ilə başlayıb. Bundan sonra dövri mətbuatda Araz Dadaşzadənin bir-birindən dəyərli elmi məqalələri dərc olunub. Onun “Molla Pənah Vaqif” əsəri bir çox xarici dillərdə, o cümlədən rus, ingilis, ərəb, fars, türk dillərində nəşr olunub”. Yazıçılar Birliyinin birinci katibi, xalq şairi Fikrət Qoca, filologiya elmləri doktoru, professor Qəzənfər Paşayev, görkəmli bəstəkar, xalq artisti Xəyyam Mirzəzadə və digərləri çıxışlarında Araz Dadaşzadə ilə bağlı xatirələrini dilə gətirərək, onu musiqini, elmi, incəsənəti dərindən bilən ziyalı kimi qiymətləndiriblər. Sonda Araz Dadaşzadənin oğlu Aqşın və qızı Zümrüd Dadaşzadələr atalarının xatirəsinə göstərilən diqqətə görə təşəkkür edərək, tədbirin təşkilatçılarına və iştirakçılarına minnətdarlıqlarını bildiriblər.

HÜSNİYYƏ

525-ci qəzet.- 2011.- 3 fevral.- S.7.