Korrupsiya ilə mübarizəyə ictimaiyyət nümayəndələri də qatılsın

MİLLİ MƏCLİSDƏ KORRUPSİYA İLƏ MÜBARİZƏ ÜZRƏ DÖVLƏT KOMİSSİYASINA SİYASİ PARTİYA NÜMAYƏNDƏLƏRİNİN ÜZVLÜYÜ MƏSƏLƏSİ GÜNDƏMƏ GƏTİRİLDİ

Milli Məclisin (MM) dünənki iclasında cari məsələlərin müzakirəsi üçün ayrılan vaxtın böyük bir hissəsi son günlərdə ölkədə aparılan korrupsiyaya qarşı mübarizə tədbirlərinə həsr olundu. Ümid Partiyasının sədri, millət vəkili İqbal Ağazadə Korrupsiya ilə Mübarizə üzrə Dövlət Komissiyasına ictimaiyyət nümayəndələri hesabına genişləndirilməsini təklif etdi. O qeyd etdi ki, ictimai nəzarəti təmin etmək üçün komissiyanın tərkibinin yenidən formalaşdırılması daha effektiv olardı. “Belə olsa, cəmiyyət də bu mübarizənin kampaniya xarakterli olmadığına inanar” – deyə millət vəkili vurğuladı. Böyük Quruluş Partiyasının (BQP) sədri, millət vəkili Fazil Mustafa da Korrupsiya ilə Mübarizə üzrə Dövlət Komissiyasının tərkibində parlamentdəki müxalifət partiya nümayəndələrinin yer alması təklifinə qoşuldu: “Kampaniya o vaxt effektiv olur ki, bu, islahata çevrilsin. İndi hamı gözləyir ki, bu, islahata çevriləcək, yoxsa 10-15 günlük olacaq”. Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev bildirdi ki, korrupsiyaya qarşı mübarizə tədbirlərinin kampaniya xarakterli olmasının iddia etmək doğru deyil. Millət vəkilinin fikrincə, son vaxtlar ölkədə korrupsiya problemi çox kəskinləşmişdi və onun üstünə getmək lazım idi: “Bu addımlar müdafiə olunmalı, korrupsiyaya qarşı mübarizə daha da gücləndirilməlidir. Milli Məclisdə də bu məsələ ilə bağlı müzakirə açılması və bu iclasa QHT nümayəndələrinin dəvət olunması da doğru olardı”. Bitərəf millət vəkili Fuad Muradov bəzi həmkarlarından fərqli olaraq, korrupsiyaya qarşı mübarizə tədbirlərinin nə xarici, nə də daxili təzyiqlərlə əlaqədar olduğunu bildirdi. Onun sözlərinə görə, bu islahatlar Azərbaycanın şüurlu seçimidir. Hökumət uzun müddətdir ki, bu istiqamətdə işhlər aparır. Millət vəkili korrupsiyaya mübarizə tədbirlərinin gələcəkdə də davam etdiriləcəyini bildirdi. Korrupsiyaya Qarşı Mübarizə üzrə Komissiyanın üzvü, parlamentin Hüquq siyasəti və dövlət quruculuğu komitəsinin sədri Əli Hüseynli də dedi ki, son vaxtlar hökumətin korrupsiyayla mübarizə istiqamətində apardığı işlər ictimaiyyətin geniş müzakirəsinə səbəb olub. Amma bəziləri elə təəssürat yaratmağa çalışırlar ki, guya əvvəllər bu istiqamətdə heç bir iş aparılmayıb. Ə.Hüseynli bu tipli təbliğatın yanlış olduğunu bildirdi. Onun sözlərinə görə, son vaxtlar atılan addımlar ölkədə aparılan islahatların tərkib hissəsidir və gələcəkdə də davam etdiriləcək. Məqsəd isə Azərbaycanın inkişaf etmiş ölkələr sırasına qatılmasına nail olmaqdır. Komitə sədri dedi ki, ölkə prezidentinin tapşırığı da məhz bu məqsədə xidmət edir. Hökumət istəyir ki, korrupsiyanın ölkədəki inkişafa vurduğu zərəri minimuma endirsin. Onun sözlərinə görə, ötən illər ərzində Azərbaycanda korrupsiyaya qarşı mübarizənin aparılması üçün yaxşı qanunverici baza yaradılıb. Hazırda da mübarizə tədbirləri bu baza əsasında aparılır. Ə.Hüseynli Korrupsiyaya Qarşı Mübarizə üzrə Komissiyaya yeni üzvlərin qəbulu ilə bağlı səsləndirilən təklifə münasibət bildirərək dedi ki, əslində korrupsiyaya qarşı mübarizə ilə cəmiyyətin hər bir üzvü məşğul olmalıdır. Bu baxımdan komissiyada kimlərin təmsil olması o qədər də əhəmiyyətli olmamalıdır. Müzakirələri yekunlaşdıran spiker Oqtay Əsədov da korrupsiyaya qarşı mübarizə tədbirlərinin müvəqqəti xarakter daşımadığını dedi. Onun sözlərinə görə, ölkədəki əsaslı islahatlar davamlı olacaq.

Kamil HƏMZƏOĞLU

525-ci qəzet.- 2011.- 12 fevral.- S.5.