“Azərbaycan faciələrinin təqvimi”
kitabının təqdimat
mərasimi keçirilib
Dünən Demokratik İslahatlar Partiyasının (DİP) qərargahında
tədqiqatçı Nazim
Tapdıqoğlunun “Azərbaycan
faciələrinin təqvimi”
kitabının təqdimat
mərasimi keçirilib.
Mərasimi giriş sözü ilə DİP sədri Asim Mollazadə açaraq, təqdimatına yığışılan
yeni kitabın Azərbaycan xalqına, onun dövlətçiliyinə
xidmət edəcəyini
bildirib. O, kitab
müəllifinin işğal
altında olan Azərbaycan ərazilərindən
birində-Füzuli şəhərində
dünyaya gəldiyini,
vətənpərvər döyüşçü
kimi ermənilər tərəfindən dinc sakinlərin başına gətirilən müsibətlərin
bilavasitə şahidi
olduğunu diqqətə
çatdırıb. Qeyd edib
ki, müəllif hər bir azərbaycanlının
yaddaş kitabına çevriləcək yeni vəsaitdə XIX əsrin
əvvəllərindən müasir
günümüzə kimi
baş vermiş faciələrimizi, həmçinin
Qarabağ müharibəsi
zamanı şəxsi
müşahidələrini əks etdirib: “Nazim Tapdıqoğlunun
sayca 34-cü kitabında
son dərəcə qiymətli, tədqiqat səviyyəli bu kitabda başı tarixən min bir bəlalar çəkmiş Azərbaycanın
ayrı-ayrı illərdə
üzləşdiyi fəlakət
və faciələrin
təqvim tarixləri toplanıb. Kitabda təqvimin xronoloji ardıcıllıqla düzülən
hər bir gününün müxtəlif
faciəli hadisələri
əks olunub. Kitab faciəli, amma eyni zamanda
dəyərli tarixi keçmişimizə işıq
salan və bu səpkidə ürəklə, əsl vətənpərvərlik ruhu,
türkçülük eşqi
ilə yazılan ilk sistemli, universal
nəşrdir. Müəllif
hər bir təqvim gününün
Azərbaycan xalqı üçün faciəvi
xarakter daşıdığını
sübut etməyə
çalışıb. Demək
olar ki, buna tam nail
olub. Gərgin axtarışlar və böyük zəhmət hesabına araya-ərsəyə
gətirilən və
geniş oxucu auditoriyası üçün
nəzərdə tutulan
vəsait yəqin ki, oxucular tərəfindən
də maraqla qarşılanacaq, öz layiqli qiymətini alacaq. Bununla yanaşı, inanıram ki, bu kitab
gənc nəslin milli vətənpərvərlik
ruhunda tərbiyə almasında da böyük rol oynayacaq, tarixi faciələrimizi əks etdirən tədqiqatlar arasında özünə
layiqli yer tutacaqdır”.
Müəllif Nazim Tapdıqoğlu yeni yaradıcılıq məhsulundan
söhbət açarkən,
“Azərbaycan faciələrinin
təqvimi” kitabını
ürək ağrısı
ilə yazdığını
dilə gətirib: “Mən bu kitabı
yazdıqca yanıb-yaxılmışam,
ürəyim ağrıyıb.
Bu kitab əsrlərdir ki, başına min bir məşəqqətlər,
müsibətlər, faciələr
gətirilən azəri
türkünün, Azərbaycan
xalqının arxiv oyanışıdır, xalqın
əzilib-küsdürülən taleyinin ağlayan səhifələridir. Ümumilikdə
Azərbaycanımızın ömrünə, tale qismətinə yazılan və bəzi alovsuz, tüstüsüz yandıran
bu qara, qanlı səhifələr
onun qan yaddaşıdır. Bu kitabdakı faciəli təqvim tarixləri adi yazılar deyil. əslində onlar sözlərlə əfsanələşərək qeyri-adiləşmiş qəmli
nəğmələrdir. Uzun
illər topladığım
bu mühüm materialları övladlarımıza
ibrət olsun deyə tarix üçün, gələcək
üçün qələmə
almışam. Hesab edirəm
ki, Azərbaycan xalqının tarixi haqqını, şərəfini
qorumaq ictimai fikrimizin əsas vəzifəsi olmalıdır.
Çünki Azərbaycan
xalqı minlərlə
dünya xalqları içərisində başı
ən çox bəlalar çəkən,
haqqı daha çox tapdanan, saysız-hesabsız fəlakətlər
görən, faciələr
yaşayan 10 xalqdan biridir”.
Təqdimat mərasimində digər çıxış edənlər də kitabda ermənilərin uzun müddət Azərbaycan türklərinə qarşı törətdiyi qanlı hadisələrin əks olunduğunu bildiriblər. Qeyd olunub ki, ayrı-ayrı təqvim tarixlərində həyata keçirilən qanlı olayların Azərbaycan xalqının erməni işğalçılarına qarşı mübarizə əzminin göstəricisi kimi qiymətləndirilməlidir.
Rufik İSMAYILOV
525-ci qəzet.-
2011.- 19 fevral.- S.29.