Şair Tahir Aslanlı yad edilib

Ötən gün Azərbaycan Yazıçılar Birliyinin (AYB) Natəvan klubunda şair Tahir Aslanlının 60 illik yubileyi qeyd olunub, bu münasibətlə xatirə gecəsi təşkil edilib. Mərasimi giriş sözü ilə açan AYB katibi, “525-ci qəzet”in baş redaktoru Rəşad Məcid bu tədbirin keçirilməsində xidməti olan hər kəsə, xüsusən də xalq yazıçısı Elçinə minnətdarlığını bildirib.

AYB-nin poeziya bölməsinin rəhbəri, şair Çingiz Əlioğlu T.Aslanlının həyat və fəaliyyəti haqqında ətraflı danışaraq, şairin qələmə aldığı əsərlərin onun istedadı, mənəvi aləmi və şəxsiyyəti haqqında dolğun rəy yaratdığını diqqətə çatdırıb: “Tahir Aslanlı haqqında keçmiş zamanda danışmaq mənə olduqca çətindir. Onu yaxından tanıyanlar Tahir Aslanlının dinamik həyat tərzi, saf, həyat şövqü ilə çırpınan qəlbə malik olduğunu yaxşı bilirlər. O, ölümün yaraşmadığı, nurlu çöhrəyə malik bir insan idi. İstedadı, axtarışları sayəsində çox tez bir zamanda adını, imzasını tanıda bildi. Düşünürəm ki, əgər Tahir Aslanlı dünyasını erkən dəyişməsəydi, biz onun hansı sahədə fəaliyyət göstərməsindən asılı olmayaraq, öz sahəsinin peşəkarı və eyni zamanda poetik yaradıcılıqda inkişafının şahidi olacaqdıq. Tahir Aslanlı milli mədəniyyətimizin təbliği, Azərbaycan həqiqətlərinin dünyaya çatdırılmasında müstəsna əməyi olan insanlardan biridir. Onun yas mərasimində iştirak edərkən, ailə mühiti ilə tanış olan zaman bir sıra məqamları özüm üçün kəşf etdim. Tahirin mənəvi aləminin genişliyi o zaman mənə daha da aydın oldu”. Yazıçı Natiq Rəsulzadə T.Aslanlı haqqında danışarkən deyib: “Biz Tahir Aslanlı ilə Moskvada yataqxanada qalarkən qələmə aldığımız əsərləri bir-birimizə oxuyar, fikir mübadiləsi edərdik. O, çox zəhmətkeş, təvazökar, istənilən işdə etibarlı, dostluqda çox sadiq, sədaqətli, geniş təxəyyülə malik insan idi. Deyirlər ki, bir insan dünyasını dəyişəndən sonra nə qədər çox yad edilirsə, bir o qədər çox yaddaşlarda yaşayır. Tahir Aslanlı bizim aramızda olmasa da, daim onu sevənlər tərəfindən yad olunur, deməli, mənəvi cəhətdən yaşayır”.

AYB üzvü Əkrəm Qaflanoğlu T.Aslanlını bütün çətinlikləri, maneələri təmkinlə dəf edə bilən, güclü mənəviyyata sahib şəxsiyyət, istedadlı qələm adamı kimi dəyərləndirib: “Tahir Aslanlının doğulduğu Qubanın Çiçi kəndi hələ XVIII əsrdən öz xalçaları ilə çox məşhurdur. Milliliyi, ornamentləri, əlvanlığı ilə seçilən bu xalçaların sorağı Luvr, Ermitaj və digər məşhur muzeylərdən gəlir. Yəni bu kənd milliliyilə seçilir. Şairin nəsli də bu kəndin sayılıb-seçilən adamlarından olub. Babası çox tanınmış aşıq, atası ədəbiyyat müəllimi olub. Şairin vaxtsız vəfatı valideynlərinin də ömrünü qısaltdı, onlar da dünyadan köçdülər”. Ailə, Qadın və Uşaq Problemləri üzrə Dövlət Komitəsinin əməkdaşı Yeganə Tofiqqızı öncə gecənin keçirilməsində rolu olan hər kəsə, xüsusilə də Natiq Rəsulzadə və Elmira Axundovaya təşəkkürünü bildirib. O, T.Aslanlı ilə tanışlığının uzun zaman əvvələ təsadüf etdiyini dilə gətirib. Y.Tofiqqızı şairin ad günü ərəfəsində təqdim olunan, yeni çapdan çıxmış kitabçada T.Aslanlıya yaxın insanların yazılarının, xatirələrinin yer aldığını bildirib: “Kitabçada Elmira Axundovanın, Natiq Rəsulzadənin, şairin qızı Dinara Aslanlının fikirləri, mənim qyedlərim, Tahir Aslanlının şeirlərindən nümunələr yer alıb”.

AYB-nin katibi, xalq yazıçısı Çingiz Abdullayev Litvaya həsr olunan kitabını T.Aslanlıya ithaf etdiyini, şairlə səfərlərdə onun işıqlı bir insan kimi daha yaxından tanıdığını bildirib. Xatirə gecəsində şairlər Oqtay Rza, Ağacəfər Həsənli, Nazim Əhmədli, Maarif Soltan T.Aslanlının Azərbaycanın ən layiqli övladlarından biri olduğunu, şairin adının hər zaman ehtiramla anılmasının vacibliyini vurğulayıblar. Tədbirdə şairin bacısı oğlu Ayxan Nuriyev T.Aslanlıya həsr etdiyi şeiri səsləndirib. Sonda çıxış edən Dinara Aslanlı atasının xatirəsinə göstərilən ehtirama görə tədbirin təşkilatçılarına və qonaqlara minnətdarlıq edib.

Qeyd edək ki, Tahir Aslanlı 23 fevral 1951-ci ildə Azərbaycanın Quba rayonunun Çiçi kəndində anadan olub. Orta məktəbi bitirdikdən sonra Azərbaycan Politexnik İnstitutuna daxil olub və 1973-cü ildə oranı bitirib. Bundan əlavə Rusiyanın Moskva şəhərində Maksim Gorki adına Ədəbiyyat İnstitutunun məzunu olub (1987). Rusca da şeirlər yazan Tahir Aslanlının “Günəşə uzanan əllər” (Bakı, 1980), “Başımın üstündə bir ovuc torpaq”, (Rusca, Moskva, 1986) “Dilimizin düyünü” (Bakı, 1989) kimi kitabları nəşr olunub. “Ürəyimdəki kölgə” adlı kitabı 1991-ci ildə Almaniyanın Frankfurt şəhərində almanca çap edilib. Tahir Aslanlının şeirləri, alman, macar, ingilis, fransız, ərəb və fars dillərində də işıq üzü görüb. Sovet Yazıçılar və Sovet Jurnalistlər İttifaqının üzvü olan T.Aslanlı Azərbaycan “Vətən” Cəmiyyətinin Moskva təmsilçisi kimi də fəaliyyət göstərib. Ömrünün son illərində isə Azərbaycanın Rusiyadakı Səfirliyində çalışıb. Tahir Aslanlı 7 iyul 1995-ci ildə Moskva şəhərində vəfat edib.

Hüsniyyə İSMƏTQIZI

525-ci qəzet.- 2011.- 24 fevral.- S.7.