Norveçdə Xocalı
soyqırımına həsr olunmuş seminar-sərgi
keçirilib
Dünən Norveç Azərbaycanlıları
Gənclər Təşkilatının (NAYO) təşəbbüsü
ilə Xocalı soyqırımının 19-cu
ildönümü münasibətiylə Norveçin Holokost
soyqrım mərkəzində “Xocalı: Faciədən
öyrəndiklərimiz” (Khojali: Lesson from Tragedy) mövzusunda
seminar keçirilib. Eyni zamanda Heydər Əliyev Fondunun
sözügedən faciə ilə bağlı
hazırladığı foto sərgi nümayiş etdirilib. Seminar-sərgi
layihəsində NAYO-nun üzvləri, Norveç hökumətin
nümayəndələri, norveçli və əcnəbi
siyasətçilər, tədqiqatçılar, professorlar,
Norveçdə təhsil alan yerli və xarici tələbələr,
kütləvi informasiya vasitələrinin (KİV) nümayəndələri
iştirak ediblər.
Seminarda Azərbaycanın
İsveçdəki fövqəladə və səlahiyyətli
səfiri Rafael İbrahimov fəxri qonaq kimi iştirak edərək
Xocalı soyqrımı və onun törətdiyi fəsadlar
haqqında danışıb.
Seminarla bağlı NAYO-nun sədri
Ramil Əliyev ilk dəfə olaraq Norveçin məşhur
Holokost mərkəzində Xocalı soyqırımı ilə
bağlı tədbir keçirdiklərini diqqətə
çatdırıb. O, qeyd edib ki, seminara “Xocalı: Faciədən
öyrəndiklərimiz” adını verməkdə əsas məqsədin
həm norveçlilərə, həm burda yaşayan digər
millətlərin nümayəndələrinə
sözügedən faciə ilə bağlı tarixi
faktları çatdırmaqdır: “Bu faktları insanlara
çatdırmaqla bildirmək istəyirik ki, ermənilər hər
cür vəhşilik törədərək, bütün beynəlxalq
hüquq qaydalarını pozmağa qadir olan bir millətdir. Azərbaycan
xalqına qarşı zaman-zaman törədilmiş tarixi faciələr,
əsasən də Xocalı soyqırımı
xalqımıza çox məsələləri
aydınlaşdırmağa və daha ətraflı dərk
etməyə imkan yaratdı. Bu faciə zamanı onu da öyrəndik
ki, erməni milli ideologiyası ona qonşu olan dövlətlər
üçün çox təhlükəlidir. Mənfur
qonşularımız olan ermənilərin xalqımıza
qarşı törətdiyi soyqırım siyasətini
dünyanın harasında yaşamasından asılı
olmayaraq hər bir azərbaycanlı, xüsusən də gənclərimiz
dünya ictimaiyyətinə və beynəlxalq təşkilatlara
çatdırmaq üçün bütün imkanlarından
istifadə etməlidilər”.
2008-ci ildən başlayaraq İslam Konfransı Gənclər Forumunun mədəniyyətlərarası dialoq üzrə baş koordinatoru Leyla Əliyevanın təşəbbüsü ilə dünyanın bir çox ölkələrində “Xocalıya Ədalət” kompaniyası çərçivəsində keçirilən tədbirlərin əhəmiyyətindən danışan R.Əliyev bildirib ki, bu layihəni həyata keçirməklə NAYO da bu il rəsmən “Xocalıya Ədalət” kampaniyasına qoşulur: “Bununla bərabər, NAYO Heydər Əliyev Fondu ilə səmərəli iş birliyi yaradaraq, onların Xocalı soyqırımına həsr olunmuş foto sərgisini Holokost soyqrım mərkəzində nümayiş etdirəcək. Yəni, biz diaspor təşkilatı olaraq bu faciənin beynəlxalq qiymət almasına qədər daima virtual məkan, yazılı materiallar, faktlar, fotolar və s. effektiv üsullarla təbliğini aparacaq”.
Rufik İSMAYILOV
525-ci qəzet.- 2011.- 25 fevral.- S.3.