Mətbuat Şurasında Yunus Oğuzun “Əmir Teymur” romanının birinci kitabının təqdimatı olub

MÜƏLLİF “HƏQİQƏTƏ XİDMƏTLƏRİNƏ GÖRƏ” MÜKAFATINA LAYİQ GÖRÜLÜB

Dünən Azərbaycan Mətbuat Şurasında (MŞ) yazıçı-publisist, “Olaylar” qəzeti və eyniadlı informasiya agentliyinin rəhbəri Yunus Oğuzun “Əmir Teymur” romanının “Zirvəyə doğru” adlı birinci kitabının təqdimatı keçirilib.

MŞ sədri Əflatun Amaşov “Əmir Teymur” kitabının Y.Oğuzun indiyədək işıq üzü görən on əsəri arasında xüsusi yer tutduğunu bildirib: “Bu əsərlərdən dördü tarixi mövzudadır. Yazıçının “Atilla” pyesi, “Nadir şah”, “Təhmasib şah” romanlarında da eyni dəsti-xəttə – tarixə dürüst, obyektiv mövqedən yanaşma üsuluna sədaqət duyulur. Məhz bunu əsas götürərək qərara almışıq ki, Mətbuat Şurasının və Dialoq Avrasiya Platformasının birgə təsis etdiyi “Həqiqətə xidmətlərinə görə” mükafatı ilk olaraq Yunus Oğuza təqdim olunsun “.

Dialoq Avrasiya Platformasının Azərbaycan üzrə nümayəndəsi Mustafa Saatçı “Həqiqətə xidmətlərinə görə” mükafatının təsis olunması təklifinin Mətbuat Şurasından gəldiyini deyib. O bu mükafatın hər il Avrasiya məkanında həqiqətə xidmət edən yazarlara təqdim olunacağını vurğulayıb. M.Saatçı Y.Oğuzu tarixi həqiqətlərin oxuculara çatdırılmasında mühüm xidmətləri olan qələm sahibi kimi xarakterizə edib: “Oğuz ismindən qürur duyuram. Müəllifin əsərlərinin dərinliyinə varan zaman tarixi həqiqətlərə geniş yer verildiyi aydın olur. Müəllifə daha böyük yaradıcılıq uğurları arzulayıram”.

Mətbuat Şurası İdarə Heyətinin üzvü, Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid də müəllifin yaradıcılığı və yeni kitabı barədə fikirlərini bildirib. R.Məcid deyib ki, Azərbaycan ədəbiyyatında tarixi roman janrının güclü ənənələri və dəyərli nümunələri var. O, Yunus Oğuzun tarixi mövzuda yazdığı əsərlərlə həmin ənənələri davam etdirməyə çalışdığını söyləyib: “Sovet dövründə bu janrda yazılan əsərlərdə tarixi şəxsiyyətlərlə bağlı əsl həqiqətlər çox zaman arxa planda qalırdı. Onda məqsəd bu yolla rəsmi ideologiyaya xidmət idi. Yunus Oğuzun isə əsərləri tarixə yeni, müstəqil Azərbaycan yazarının baxışıdır”.

Beynəlxalq Avrasiya Mətbuat Fondunun rəhbəri Umud Rəhimoğlu Y.Oğuza “Həqiqətə xidmətlərinə görə” mükafatının təqdim olunmasını qanunauyğun hadisə adlandırıb. O, kitaba “Əmir Teymur” adı verilməsini indiyədək belə bir görkəmli şəxsiyyətə bəzi xarici ölkə yazarlarının yanaşmasındakı aşağılayıcı niyyətə ötkəm cavab kimi dəyərləndirib. “Paralel” qəzetinin baş redaktoru Tapdıq Abbas Y.Oğuzun ədəbi sahədəki cəsarətinin onun vətənpərvərliyindən, milli-azadlıq hərəkatının fəal iştirakçısı olmasından qaynaqlandığını deyib. “Bakı-Xəbər”” qəzetinin baş redaktoru Aydın Quliyev Azərbaycan və Türk tarixinin öyrənilməsi sahəsindəki boşluğun aradan qaldırılması baxımından tarixi romanların xüsusi əhəmiyyətə malik olduğunu söyləyib və Y.Oğuzun bu yöndə önəmli iş gördüyünü vurğulayıb. Tarixin təkcə quru faktlardan, statistik rəqəmlərdən ibarət olmadığını bildirən “Xalq Cəbhəsi” qəzetinin baş redaktoru Elçin Mirzəbəyli romanda dövrün mənzərəsinin real cizgilərlə təqdim olunduğunu vurğulayıb. “Unikal” qəzetinin redaktoru Eldəniz Elgün də bu fikrə şərik çıxaraq, Əmir Teymurun dövlət qurucusu kimi dolğun obrazını yaradan müəllifin reallığa üz tutduğunu söyləyib. “Assa-İradə” İnformasiya Agentliyinin baş direktoru Fazil Abbas, “Xalq qəzeti”nin baş redaktor müavini Tahir Aydınoğlu, “Qərbin səsi” qəzetinin baş redaktoru İnşallah Hüseynov və MŞ İdarə Heyəti üzvlərinin çıxışlarında da müəllifin yaradıcılığı və yeni əsəri müxtəlif prizmalardan səciyyələndirilib. Sonda Y.Oğuza “Həqiqətə xidmətlərinə görə” mükafatı təqdim olunub.

Y.Oğuz mükafata görə Mətbuat Şurasına və Dialoq Avrasiya Platformasına təşəkkürünü bildirib. O, “Əmir Teymur”un ikinci kitabının də hazır olduğunu və yaxın zamanlarda nəşr ediləcəyini söyləyib.

AQİL

525-ci qəzet.- 2011.- 29 iyun.- S.7.