Media rəhbərləri Bakı Slavyan Universitetinin tələbələri ilə görüşdülər

Dünən Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşəbbüsü ilə Bakı Slavyan Universitetinin jurnalistika fakültəsində təhsil alan tələbələrlə ölkənin aparıcı media qurumlarının rəhbərləri arasında görüş keçirilib. Tədbirdə KİVDF-nin icraçı direktoru Vüqar Səfərli, Bakı Slavyan Universitetin rektoru, professor Kamal Abdulla, Mətbuat Şurasının sədri Əflatun Amaşov, “525-ci qəzet”in baş redaktoru Rəşad Məcid, “Ayna-Zerkalo” qəzetinin baş redaktoru Elçin Şıxlı və 20-dən artıq digər qəzetin rəhbəri iştirak edib.

Tədbiri giriş sözü ilə açan BSU-nun rektoru Kamal Abdulla bu görüşün tələbələr üçün böyük əhəmiyyətə malik olacağını deyib. O bildirib ki, tədbirin əsas məqsədi jurnalistika fakültəsində təhsil alan istedadlı tələbələrə qəzet redaksiyalarında təcrübə keçmək və gələcəkdə işlə təmin olunmaları üçün şərait yaratmaqdır.

Tədbirin davamında çıxış edən KİVDF-nin icraçı direktoru Vüqar Səfərli vurğulayıb ki, bu görüş tələbələr üçün çox mühüm əhəmiyyətə malikdir. Onun sözlərinə görə, belə görüşlərin təşkil olunmasında məqsəd bu sahədə çalışanlara, jurnalistika peşəsini sevənlərə dəstək verməkdir. Onun sözlərinə görə, görüşlərdə universitetdə oxuyan tələbələrin təcrübə keçəcəyi qəzetlərin rəhbərləri ilə təcrübə mübadiləsi aparılacaq: “BSU-nun jurnalistika fakültəsinin sonuncu kursunda təhsil alan tələbələr müxtəlif qəzetlərdə təcrübə keçməyə göndəriləcək. Onlar 5 ay müddətində müxtəlif qəzetlərdə təcrübə keçəcək və hər ay 100 manat məbləğində əmək haqqı alacaqlar. 5 aydan sonra onlar özlərini doğrultsalar və ya işləri ilə redaksiya rəhbərliyini qane etsələr, həmin yerdə işə qəbul olunacaqlar. Hər il jurnalistikada oxuyan tələbələr müxtəlif redaksiyalarda təcrübə keçir, amma onların təcrübəsi bizləri qane etmir. Onlar təcrübə müddətində işləmək əvəzinə, sanki sonda kağıza qol çəkilməsini gözləyirlər. Bizim isə istəyimiz ondan ibarətdir ki, istedadlı tələbələr, həqiqətən jurnalist olmaq istəyənlərin hamısı işlə təmin edilsin. Qeyd edim ki, fevralın 23-də analojı tədbir Bakı Dövlət Universitetində keçirilib və artıq BDU-nun jurnalistika fakültəsinin 22 tələbəsi qəzet redaksiyalarında işə başlayıblar”.

Azərbaycan Mətbuat Şurasının sədri Əflatun Amaşov isə çıxışında bu məsələlərə optimist yanaşdığını deyib. O bildirib ki, bu görüşlər KİVDF-nin həyata keçirdiyi ən mühüm layihələrdən biridir: “Bu layihədən sonra jurnalistika fakültəsini bitirən 5-10 tələbə müxtəlif redaksiyalarda işləyəcəksə, bu artıq mətbuatımızın uğurudur. Hazırda işləmək istəyən tələbələrin çoxu televiziyaya üstünlük verirlər. Ancaq unutmaq lazım deyil ki, televiziya jurnalistikası öz spesifik xüsusiyyətlərinə görə, yazılı mətbuatdan fərqlənir. Tələbələrə məsləhət görürəm ki, iş yerlərini seçərkən qəzetlərdən başlasınlar. Bundan sonra böyük uğurlar qazanmaq olar. Bir məsələni də qeyd edim ki, son zamanlar elektron jurnalistika yaranıb və bu da yeni bir sistemdir. Ancaq unutmayaq ki, hər bir qəzetlərin də onlayn sistemləri var və gənclər sosial şəbəkələrdə, bloklarda daha çox vaxt keçirməkdənsə, jurnalist olmaq istəyənlər daha çox buraya yazılar versin və onlarla əməkdaşlıq etsin”.

“Ayna-Zerkalo” qəzetinin baş redaktoru Elçin Şıxlı da bu görüşün KİVDF-nin ən maraqlı təşəbbüslərindən biri olduğunu söyləyib. O bildirib ki, bir çox hallarda jurnalistikada oxuyan, yüksək səviyyə, dünyagörüşünə və xarici dil qabiliyyətinə malik olan tələbələr sonrada jurnalistikaya getmək istəmir: “Bunun bir çox obyektiv və subyektiv səbəbləri var. Jurnalistika ixtisası üzrə universitetlərə qəbul sistemində də müəyyən çatışmazlıqlar var. Bu gün jurnalistikaya qəbulda qabiliyyət imtahanlarının keçirilməsinə ehtiyac var. Jurnalistika həyat tərzidir. Əgər kimsə öz həyat tərzini jurnalistikada görürsə, ondan nəsə çıxacaq. Jurnalist hərtərəfli, yüksək məntiq, öz fikirlərini ifadə etmək bacarığına malik olan bir insan olur”.

BSU-nun professoru Etibar Babayev universitetin jurnalistika fakultəsinin fəaliyyəti barədə məlumat verib. Daha sonra tələbələrin mətbuat orqanlarının rəhbərlərinə ünvanladıqları sualları cavablandırılıb. Tələbənin sualını cavablandıran “Səs” qəzetinin baş redaktoru və “Səs” İnformasiya Agentliyinin baş direktoru Bəhruz Quliyev ümumilikdə Bakı Slavyan Universitetində tələbələrin fəal olduğunu deyib. O bildirib ki, bir neçə il ərzində bu universitetdən redaksiyaya təcrübə keçmək üçün praktikantlar gəlir və onlar arasında bu gün işləyənlər də var: “Amma ümumi götürdükdə bu gün Azərbaycanda jurnalist buraxılışı aşağı səviyyədədir. Gələn jurnalistə işləmək istədiyini sual verdikdə, bu ixtisasa təsadüfən düşdüyünü deyir. Belə tələbələrə yenidən dərs keçə bilmərəm. Əgər bu adam bəxtəbəxt bu sahəyə gəlibsə, onun üstündə əziyyət çəkməyə dəyməz. Gələcəkdə işləmək istəyən, həqiqətən istəyi, marağı olan tələbələrin üzərində daha çox işləyirik. Qəzetlərin səviyyəsinin qaldırılması jurnalistlərdən asılıdır. Jurnalistləri kəşf etmək və tapmaq üçün bu cür görüşlərdən istifadə etmək vacibdir”.

“Yeni Azərbaycan” qəzetinin baş redaktoru Hikmət Babaoğlu isə qeyd edib ki, vətəndaş cəmiyyətin əsas atributlarından biri vətəndaş dövlət münasibətlərinin hüquq əsasında formalaşmasıdır: “Hər birimizin sosial statusu gün ərzində dəyişilir. Siz bu gün burada tələbə, burdan çıxdıqdan və evə gedəndən sonra isə ailənizin vətəndaşı olacaqsınız və sairə. Bütün vətəndaşlar hüquqi dövlətlə dövlət-vətəndaş münasibətlərində bərabər statusa malikdir. Ancaq bir də peşə məsələsi var. Azərbaycan jurnalist peşəsinin statusu cəmiyyətin sosial piramidasında kifayət qədər üst mərtəbələrdədir. Son dövrlərdə Azərbaycan dövlətinin, prezidentinin həyata keçirdiyi siyasət nəticəsində bu statusun peşə nüfuzu daha da artıb. Bu gün informasiya erasında hər bir jurnalistin əsas borcu vətəndaşlıq borcu olmalı və bütün məsələlərdə məhz vətəndaşlıq öhdəçiliyindən və milli maraqlarından çıxış etməlidir. Ona görə də nə peşəsində olursunuzsa olun, ilk növbədə vətəndaş olmaq lazımdır”.

Tədbir müxtəlif suallar və mövzular ətrafında davam etdirilib.

Sevinc QARAYEVA

525-ci qəzet.- 2011.- 11 mart.- S.2.