Maral Rəhmanzadənin yaradıcılığı “Xalq Əmanəti” kimi təqdim olunub

“Xalq Bank”ın təşəbbüsü və maliyyə dəstəyi ilə həyata keçirilən “Xalq Əmanəti” layihəsi çərçivəsində Azərbaycanın xalq rəssamı Maral Rəhmanzadənin əsərlərindən ibarət sərginin açılışı və rəssamın yaradıcılığını əks etdirən bədii albomun təqdimat mərasimi keçirilib. Azərbaycan və rus dillərində tərtib olunan kitaba rəssamın məhşur rəsm əsərləri, ailə fotoları daxil edilib. Topluda həmçinin rəssamın ömür yollarının maraqlı məqamları, əsərlərinin xarakteristikası da yer alıb.

2010-cu ildən başlayaraq həyata keçirilən bu layihə xalqımızın mədəni irsinin qorunub gələcək nəsillərə ötürülməsi və mənəvi dəyərlərimizin dünyaya tanıdılması məqsədi daşıyır. “Xalq Əmanəti” layihəsi çərçivəsində Azərbaycanın görkəmli ədəbiyyat, incəsənət və elm xadimlərinin əsərləri, eləcə də folklor nümunələri nəfis tərtibatda nəşr olunub sənətsevərlərin ixtiyarına verilir. Layihənin ilk buraxılışı xalq rəssamı Böyükağa Mirzəzadəyə, ikinci nəşri isə xalq şairi Məmməd Araza həsr olunub.

Tədbirdə çıxış edən Azərbaycan Rəssamlar İttifaqının sədri Fərhad Xəlilov sənətkarın həyat və yaradıcılığından bəhs edib. Onun Neft Daşlarına gedən, Naxçıvan dağlarını qarış-qarış gəzən ilk qadın rəssam olduğunu diqqətə çatdırıb və onun Azərbaycan rəssamlıq məktəbində özünəməxsus bir yol qoyduğunu deyib: “Maral Rəhmanzadənin fırçasına məxsus industrial və təbiət mənzərələri, kitab qrafikası nümunələri xalqımızın zəngin mədəni irsinin ayrılmaz bir hissəsidir”. Azərbaycan Dövlət Rəssamlıq Akademiyasının rektoru, akademik Ömər Eldarov isə deyib: “Maral Rəhmanzadənin yaradıcılığında yer alan zərif, idealizə olunmuş Azərbaycan qadını, “yeni sovet qadını” obrazları, neftçilərə həsr olunmuş son dərəcə emosional əsərlər, şəhər, kənd mənzərələrinin geniş retrospektivi – bu mövzular və obrazlar Azərbaycanın sənət tarixində öz layiqli yerini tutub”. Tədbirdə çıxış edən digər ziyalılar və sənət adamları da sənətkarın əsərlərindəki maraqlı məqamlardan danışıb, onun rəngkarlıq məktəbimizin inkişafında böyük xidmətləri olduğunu vurğulayıblar. Həmçinin çıxış edənlər belə bir mühüm layihəni həyat keçirərək, görkəmli insanların xatirəsini əbədiləşdirdiyi üçün “Xalq Bank”a təşəkkürlərini bildiriblər. Tədbirin sonunda mərasim iştirakçıları bankın baş ofisindəki qalereyada Maral Rəhmanzadənin əsərlərindən ibarət sərgi ilə tanış olublar.

Qeyd edək ki, sərgi martın 12-dən iyun ayının 12-dək fəaliyyət göstərəcək. Sərgini iş günləri saat 18:00-dan 21:00-dək, şənbə və bazar günləri saat 10:00-dan 16:00-dək seyr etmək olar. Giriş sərbəstdir.

GÜNEL

525-ci qəzet.- 2011.- 15 mart.- S.7.