Gənc Tamaşaçılar Teatrı – sənət məbədi və mənəvi dəyərlərin güzgüsü kimi

Milli-mənəvi dəyərlər insanları birləşdirə biləcək başlıca qüvvədir. Hər bir xalqın milli-mənəvi dəyərləri onun milli mənəviyyatının əsas göstəriciləridir. Bu mənəviyyat isə tarix və gerçəkliklər, zəngin mədəniyyət və incəsənət, qədim adət və ənənələrdən qaynaqlanır. Dünyaya örnək ola biləcək mədəniyyəti, milli mənəvi dəyərləri, zəngin adət-ənənələri Azərbaycan xalqının inkişafında və bir millət kimi dünya səhnəsində layiqli yer tutmasında başlıca rol oynayıb. Burada əsas rollardan birini də zəngin, möhkəm tarixi köklərə dayanan Azərbaycan teatrı təşkil edir. Azərbaycan teatrları arasında özünəməxsus yeri olan teatrlardan biri də Azərbaycan Dövlət Gənc Tamaşaçılar Teatrıdır.

Bu sənət ocağı mədəniyyət aləminə pioner və məktəblilərin bədii özfəaliyyət dram dərnəklərinin əsasında yaranan Bakı Uşaq Teatrı kimi qədəm qoyub.

1927-ci İL MARTIN 15-DƏ BAKIDA YENİ BİR TEATRIN AFİŞASI GÖRÜNDÜ.

Afişada: “Bu gün Pioner dəstə rəhbəri Lətif Kərimlinin quruluşunda “Fırtına” tamaşası göstəriləcəkdir” sözləri yazılmışdı. 14 yaşlı Ağadadaş Qurbanovun təşəbbüsü ilə hazırlanan bu tamaşa respublikamızda uşaq teatrının yaranmasının təməlini qoydu. 1928-ci ildə Azərbaycan Xalq Maarif Komissarlığının qərarı ilə Bakı Uşaq teatrı rəsmi olaraq fəaliyyətə başladı. Teatrın ilk aktyorları və rejissorları Ağadadaş Qurbanov, Məmmədağa Dadaşov, Yusif Əminli, Minə Abdullayeva, Yusif Dadaşov, Susanna Məcidova, Cavahir İskəndərova, Süleyman Ələsgərov, Hüseynağa Sadıxov, Kərim Həsənov, Zəfər Nemətov, Məhərrəm Haşımov, Əliməmməd Atayev və başqaları oldular. Teatrın rus bölməsi 1928-ci il noyabr ayının 06-da N.Smirnov və S.Şerbakovun “Beş nəfər” pyesi əsasında hazırlanmış eyniadlı tamaşa ilə, Azərbaycan bölməsi isə 1930-cı il yanvar ayının 30-da N.İvanterin “Qırmızı qalstuk əleyhinə” adlı əsəri ilə öz fəaliyyətinə başladı. 1936-cı il iyul ayının 18-dən etibarən Bakı Uşaq teatrı Azərbaycan Xalq Maarif Komissarlığının əmrinə əsasən “Azərbaycan Dovlət Gənc Tamaşaçılar Teatrı” adlandırıldı və ona Maksim Qorkinin adı verildi. 1936-cı ildə Moskvada rejissorluq fakültəsini başa vuran Məhərrəm Haşımov teatrın baş rejissoru təyin olundu. Məhərrəm Haşımov teatrın hər iki bölməsində V.Lyubimovanın “Seryoja Streltsov” əsərini müvəffəqiyyətlə tamaşaya hazırladı.

1937-ci İLDƏ GÖRKƏMLİ ƏDİB ABDULLA ŞAİQ TEATRIN ƏDƏBİ HİSSƏ MÜDİRİ TƏYİN OLUNDU.

O dövrdə Abdulla Şaiqin “Xasay”, “Eloğlu”, “Fitnə”, Mirmehdi Seyidzadənin “Qızılquş”, “Nərgiz”, Əyyub Abbasovun “Azad”, “Məlikməmməd” tamaşaları teatrın önəmli yaradıcılıq nailiyyətləri idi. 1940-cı ilin noyabr ayında teatr Moskvada keçirilən Sovet Uşaq Teatrlarının 1 Ümumittifaq baxışında iştirak edərək, rusiya teatr ictimaiyyəti və digər iştirakçı ölkə nümayəndələri tərəfindən böyük hərarətlə qarşılandı. Kollektiv bu nüfuzlu tədbirdə Sabit Rəhman və Adil İskəndərovun “Partizan Məmməd”, Əliməmməd Atayev və Əhməd Əhmədovun “Seyran” pyesləri əsasında hazırlanmış tamaşalarını təqdim etdi. II dünya müharibəsindən sonrakı illərdə Azərbaycan Dövlət Gənc Tamaşaçılar Teatrının repertuarında ən yaxşı tamaşalardan sayılan “Fitnə”, “Qaraca qız”, “Skapenin kələyi”, “Polad necə bərkidi”, “Hacı Qənbər”, “Sevinc” öz profesionallığı ilə seçilirdi. Teatr 1952-ci ili yeni binada qarşıladı və həmin dövrdəki fəaliyyəti xüsusilə Yusif Əzimzadənin “Anacan”, “Aprel səhəri”, Rauf İsmayılovun “İki həyat”, Məmmədhüseyn Təhmasibin “Çiçəkli dağ”, Ə.Abbasovun “Aqil və Sərvinaz”, rus bölməsində isə “Pavlik Morozov”, “Sombrero”, “Valya Kotik”, “Polad üzük” kimi tamaşalarla əlamətdar oldu. 1954-cü il fevralın 28-də Azərbaycan Dövlət Gənc Tamaşaçılar Teatrının 25 illik yubileyi təntənəli surətdə qeyd edildi. Yubiley günlərində Azərbaycanda Uşaq və Gənclər teatrının yaranması və inkişafındakı xidmətlərinə görə Məhərrəm Haşımov, Əliağa Ağayev və Ağadadaş Qurbanov respublikanın xalq artisti, dramaturq Ə.Abbasov, rejissor Zəfər Nemətov, rəssam Nikolay Ovçinnikov Azərbaycan SSR Əməkdar incəsənət xadimi, rejissor Kamal Həsənov, artistlərdən Məmmədağa Dadaşov, Yusif Dadaşov, Süleyman Ələsgərov, Cəvahir İskəndərova, Aleksey Lejnyov, A.Lızina Respublikanın Əməkdar Artisti fəxri adı ilə təltif olundu. Yubileydən sonra teatr özünün 26-cı mövsümünü 1954-cü il sentyabrın 10-da Cəfər Cabbarlının “Yaşar” pyesinin tamaşası ilə açdı. 1955-ci ilin oktyabrında teatr ilk dəfə olaraq, Uilyam Şekspirin yaradıcılığına müraciət edərək, böyük dramaturqun “İki veronalı” pyesini tamaşaya hazırladı. Hər bir teatra yeni aktyor nəslinin gəlişi yaradıcılıq prosesinin, teatrda yeni abu-havanın yaranmasına təkan verir. Məhz 50-ci illərdə yeni aktyor nəslinin nümayəndələri Firəngiz Şərifovanın, Osman Hacıbəyovun, Rəhilə Məlikovanın, İrina Vasilyevanın, Georqiy Sıqankovun, Tamara Razumovskayanın və başqalarının teatra gəlişi ilə kollektivdə bir canlanma yarandı.

GƏNC TAMAŞAÇILAR TEATRININ 60-cı İLLƏRDƏKİ FƏALİYYƏTİ XÜSUSİLƏ SƏMƏRƏLİ OLUB.

Öz tarixində ən məhsuldar dövr kimi qiymətləndirilib. Teatrın baş rejissoru həssas pedaqoq, mahir təşkilatçı Zəfər Nemətovun bu sahədəki işi xüsusilə fərqlənib. Onun baş rejissor olduğu çoxillik fəaliyyəti dövründə teatrda yeni dramaturq, aktyor, rejissor nəsli yetirib. Məhz o illərdə teatr ideya-bədii istiqamətində və pedaqoji sahədə yüksək səviyyəyə qalxa bilib. Xüsusilə, ailə və məktəb əlaqələrinin vəhdəti üçün əsaslı zəmin yaradılıb. Dramaturqlardan Rauf İsmayılovun, İskəndər Coşğunun, Əfqan Əsgərovun, Hüseyn Nəcəfovun, Qeybulla Rəsulovun “İki həyat”, “Komsomol poeması”, “O mənim oğlumdur”, “Valya Kotik”, “Əlvida, Hindistan” əsərləri bilavasitə Zəfər Nemətovun rəhbərliyi, istedad və bacarığı sayəsində sənət nümunəsinə çevrilib. Əminə Yusifqızı, Solmaz Qurbanova, Firdovsi Naibov, Zərnişan Fətəliyeva, Sona Babayeva, Həsən Əbluç, Viktor Semerenko, İvetta Ryabova, Arnold Xarçenko, Nelli Məmmədova, Tatyana Xaritonova və başqaları məhz Zəfər Nemətovun rejissor-pedaqoq kimi yetirdiyi istedadlı aktyorlar idi. 1967-ci ildə ilk dəfə təsis olunmuş Respublika Lenin Komsomolu Mükafatı laureatı adına “Komsomol poeması” tamaşasının bir qrup yaradıcı heyəti – quruluşçu rejissor Zəfər Nemətov, rəssam Altay Səidov, aktyorlardan Yusif Vəliyev, Hüseynağa Sadıxov, Süleyman Ələsgərov, Osman Hacıbəyov, bəstəkar Fikrət Əmirov və dramaturq İskəndər Coşğun layiq görüldü. Fəaliyyəti dövründə Gənc Tamaşaçılar Teatrının səhnəsində Azərbaycan, rus və dünya klassiklərinin inciləri özünə layiqli yer tutub. Mirzə Fətəli Axundovun “Xırs quldurbasan”, Əbdürrəhimbəy Haqverdiyevin “Bəxtsiz cavan”, Cəfər Cabbarlının “Yaşar”, Nikolay Qoqolun “Müfəttiş”, Viktor Hüqonun “Qavroş” və başqa pyesləri bütün illərdə teatrın repertuarında mühüm yer tutub. Yarandığı ilk illərdən müasirliyə meyl edən, vacib həyati məsələlərə, cəmiyyətin ağrılı sahələrini qabardan, həmişə bu ənənələri yaşadan teatrda yeni, istedadlı yaradıcı nəsil yetişdi. Öz isti nəfəsini, ağıl və düşüncəsini, məhəbbətini teatrın inkişafına sərf edən yeni gələn hər nəsil ona yeni təravət bəxş etdi. Estafeti qəbul edən istedadlı aktyorlardan Tariyel Qasımov, Gülşən Qurbanova, Yasin Qarayev, Almaz Mustafayeva, Sona Babayeva, Azər Mirzəyev. Mübariz Əlixanoğlu, Ədalət Məmmədov, R. Qəniyev, K.Artyomov, Z.Xarçenko, rejissorlardan A.Nemətov, M.Tağıyev, H.Əbluc, rəssamlardan T.Tahirov, E.Məmmədov kimi istedadlı şəxsiyyətlərin teatrın ümumi yaradıcılıq uğurlarında layiqli yeri var. Azərbaycan Dövlət Gənc Tamaşaçılar Teatrı 1989-cu ildə öz tamaşaçılarını yeni – hazırkı binasında qarşılayıb. Öz ənənəsinə sadiq qalaraq,

YARADICI KOLLEKTİV HƏR MÖVSÜMDƏ YENİ VƏ MARAQLI TAMAŞALARLA DAHA GENİŞ AUDİTORİYANI ƏHATƏ ETMƏYƏ ÇALIŞIB.

Teatr 1989-cu ilin dekabrında Kamal Aslanovun “Yuxulama” tamaşası ilə Moskvada keçirilən beynəlxalq teatr festivalında, 1993-cü ildə isə Daşkənd şəhərində keçirilən “Şərq-Qərb” Teatr festivalında uğurla çıxış etdi. Daha sonrakı illərdə teatr yazıçı-dramaturq Elçinin “Mahmud və Məryəm” romanı əsasında hazırlanan tamaşa ilə 2002-ci ildə Tatarstanın paytaxtı Kazan şəhərində keçirilən turkdilli xalqların VII Beynəlxalq Novruz Festivalında, 2004-cü ildə “Ana qaz” tamaşası ilə Moskvada keçirilən Televiziya-Teatr Beynəlxalq Festivalında uğurlu iştirakı ilə diqqəti çəkdi. İlyas Əfəndiyevin “Məhv olmuş gündəliklər” əsəri əsasında hazırlanan tamaşa ilə Kuznetskdə keçirilən Beynəlxalq Teatr Festivalında, dahi Üzeyir Hacıbəyovun “Arşın mal alan” operettası ilə 2006-cı ilin dekabr ayında Moskva Vilayətinin Podolsk şəhərində keçirilən II Beynəlxalq Teatr Festivalının Qala-konsertində iştirak da uğurlu oldu. 2007-ci ilin aprel ayında Türkiyə Cumhuriyyətinin Alanya şəhərində ənənəvi olaraq keçirilən 23 nisan Uşaq Bayramında N.Gəncəvinin “Xeyir və Şər”,R.Rzanın “Ana Qaz” və İ.Coşqunun “Çal oyna” tamaşaları ilə, 2008-ci ilin aprel ayında ikinci dəfə Türkiyə Cumhuriyyətinin Ankara və İqdır şəhərlərində 23 nisan Uşaq bayramı şənliklərində Ə.Orucoğlunun “Nənənin kələyi”, mart ayının 27-dən aprelin 4-dək Belarusun paytaxtı Minsk şəhərində R.Rzanın “Ana qaz” və S.Marşakın “Pişiyin evi”, may ayında isə Moskva vilayətinin Dmitrov, Taldom və Dubna şəhərlərində İ.Əfəndiyevin “Məhv olmuş gündəliklər” və S.Marşakın “Pişiyin evi” tamaşaları ilə çıxışları da bu teatra uğur gətirdi. Teatr 2009-cu il may ayının 26-dan iyunun 6-dək Kazan şəhərində keçirilən Türkdilli ölkələrin ənənəvi 9-cu Beynəlxalq Teatr festivalında Ə.B.Haqverdiyevin “Pəri Cadu” tamaşası ilə respublikamızı uğurla təmsil etdi. 2008-ci ildə Azərbaycan Dövlət Gənc Tamaşaçılar Teatrının 80 yaşı tamam olub. Bu illər ərzində teatr uşaqlara və yeniyetmələrə səmərəli xidmət göstərib, gənc nəslin mənəvi – əxlaqi, xeyirxahlıq və vətənpərvərlik ruhunda tərbiyə edilməsində mühüm rol oynayıb.

ÖTƏN MÜDDƏT ƏRZİNDƏ TEATRDA 500-dən ARTIQ YENİ TAMAŞA HAZIRLANIB, 33505 tamaşa göstərilib və 8042000 tamaşaçı ondan bəhrələnib.

Demək olar ki, ölkənin bir çox dövlət xadimləri, alimlər, yazıçılar, bəstəkarlar, əmək və müharibə qəhrəmanları məhz bu teatrda hazırlanan tamaşaların təsiri altında böyüyüb, boya-başa çatıb. Bu gün teatr daha geniş kollektivlə və daha zəngin repertuarla fəaliyyət göstərir. Nazirlər Kabinetinin 19 mart 2009-cu il 41 saylı qərarına əsasən Azərbaycan Dövlət Gənclər Teatrı və 30 sentyabr 2009-cu il tarixli qərarına əsasən Bakı Kamera Teatrı Azərbaycan Dövlət Gənc Tamaşaçılar Teatrına birləşdirilib. Teatrda müasir dramaturgiyamızın ən maraqlı nümunələri ilə yanaşı dünya və Azərbaycan klassiklərindən Vilyam Şekspirin, Jan Batist Molyerin, Fridrix Şillerin, Karlo Qoldoninin, Fonvizinin, Aleksandr Puşkinin, Aleksandr Ostrovskinin, Nikolay Qoqolun, Mirzə Fətəli Axundovun, Nəcəf Bəy Vəzirovun, Nəriman Nərimanovun, Cəfər Cabbarlının, Süleyman Sani Axundovun, Abdulla Şaiqin və başqalarının əsərləri də öz əksini tapıb. Azərbaycan Milli teatr sənətinin ayrılmaz qolu olan Dövlət Gənc Tamaşaçılar Teatrı bir sıra müqtədir səhnə xadimləri yetişdirib. Bunlardan bir çoxu sonradan öz yaradıcılıqlarını Azərbaycan Dövlət Akademik Milli Dram Teatrında davam etdiriblər. Xalq artistləri Ağadadaş Qurbanov, Əliağa Ağayev, Süleyman Ələsgərov, Firəngiz Şərifova, Yusif Vəliyev, Hüseynağa Sadıxov, Lütfi Məmmədbəyov, Aleksey Lejnyov, Georqiy Sıqankov, Xuraman Hacıyeva, Gülşən Qurbanova, Solmaz Qurbanova, Tariyel Qasımov, Ağaxan Salmanlı, Yasin Qarayev, Əməkdar Artistlər Məmmədağa Dadaşov, Osman Hacıbəyov, Rəhilə Məlikova, Susanna Məcidova, Məfxurə Yermakova, Firdovsi Naibov, Tamara Razumovskaya, Anatoliy Dobronetskiy, Arnold Xarçenko, Cəvahir İskəndərova, Ruxsarə Ağayeva, Mübariz Paşayev, Rafiq Hüseynov, Ədalət Məmmədov, Azər Mirzəyev, Mübariz Həmidov, Lətifə Əliyeva, Nübar Novruzova, Naibə Allahverdiyeva, Rahib Əliyev, aktyorlardan Elxan Qurbanov, Almaz Mustafayeva, Şəfəq Əliyeva artıq Azərbaycan teatr tarixində özünəməxsus yerə sahibdir. Adları qeyd edilən sənətkarlarla bərabar hazırda Azərbaycan Dövlət Gənc Tamaşaçılar Teatrında Elşən Rüstəmov, Mehriban Abdullayeva, Kəmalə Hüseynova, Kübra Dadaşova, Nicat Kazımov, Eyvaz İbrahimov, Vüsal Mehrəliyev, Qurban İsmayılov, Ayşad Məmmədov, Nəsibə Eldarova, Şövqi Hüseynov, Leyli Vəliyeva, İlqar Cahangirov və onlarla başqa istedadlı aktyordan ibarət nəsil çalışır. Azərbaycan milli teatr sənətinin inkişafında uzun illik səmərəli fəaliyyətinə görə Azərbaycan Dövlət Gənc Tamaşaçılar Teatrında hazırda 6 nəfər prezidentin fərdi təqaüdünə, 7 nəfər isə prezidentin xüsusi mükafatına layiq görülüb. Vaxtilə teatrda maraqlı tamaşalara uğurla quruluş vermiş xalq artistləri Aleksandr Tuqanov, Məhərrəm Haşımov, Tofiq Kazımov, Ağakişi Kazımov, Azərpaşa Nemətov, əməkdar incəsənət xadimləri Zəfər Nemətov, Hüseyn Sultanov, Ulduz Rəfili-Əliyeva, əməkdar artist Kərim Həsənov kimi rejissorları xalq artistləri Cənnət Səlimova, Vaqif Əsədov, Rafiq Əliyev kimi istedadlı sənətkarlar əvəzləyib. Teatr müxtəlif vaxtlarda Moskva, Volqoqrad, Tümen, Krasnodar, Selinoqrad, Tbilisi, İrəvan, Daşkənd, Aşxabad, Kazan və başqa şəhərlərdə beynəlxalq teatr festivallarında və qastrol səfərlərində uğurla çıxış edib. Azərbaycan Dövlət Gənc Tamaşaçılar Teatrının direktoru, əməkdar artist Mübariz Həmidov Azərbaycanın öz zəngin folkloru, muğam sənəti, tətbiqi incəsənəti, zəngin tarixi, mədəniyyəti ilə dünyada məşhur olduğunu deyir: “Heç təsadüfi deyil ki, bizim bir çox milli-mədəni dəyərlərimiz – muğam, aşıq sənəti, Novruz bayramı, xalçaçılıq sənətimiz YUNESKO-nun mədəni irs siyahısına daxil edilib. Bundan başqa, Bakıda Şirvanşahlar sarayı, Naxçıvanda “Mömünəxatun” türbəsi, Şəkidə Xan sarayı, açıq hava altında olan Qobustan qayaları və onların üzərindəki təsvirlər, eləcə də ayrı-ayrı bölgələrimizdəki tarixi abidələri ümumilikdə Azərbaycanın sahib olduğu milli-mənəvi sərvətlərdir. Azərbaycan teatrı da milli- mənəvi və mədəni dəyərlər siyahısına daxil olan sənət növüdür. Yarandığı dövrlərdən bir sıra inkişaf mərhələləri keçən, özünün tərəqqisinin gah pik nöqtəsini, gah da durğunluğunu yaşayan bu sənət Azərbaycana çox böyük ustadlar bəxş edib. Demək olar ki, bütün mədəniyyət sahələri Azərbaycanın korifey sənətkarları sayəsində ilklərə imza atıb. Götürək opera sənətini. Şərqdə ilk opera dahi bəstəkar Üzeyir Hacıbəyli tərəfindən 1908-ci ildə yazılıb. 1972-ci ildə Şərqin ilk opera yazan qadın bəstəkarı Şəfiqə Axundova olub. Akademik Milli Dram Teatrında necə görkəmli korifeylər çalışıblar. Bu mədəniyyyət məbədinin əsasını qoyublar. Amma sırf Gənc Tamaşaçılar Teatrının fəaliyyətinə nəzər yetirsək, 1928-ci ildən, yəni yaranışından bu günə kimi teatr əsasən azyaşlı uşaqlar, yeniyetmələr və daha yuxarı yaş təbəqələrini əhatə edən insanlar üçün tamaşalar hazırlayır. Azərbaycanda elə ziyalı, yüksək vəzifə sahibi ola bilməz ki, yeniyetməlik, tələbəlik illərində yolu bizim teatrdan keçməsin. Bura gələn hər bir kəs göstərilən tamaşalar ilə tərbiyə olunaraq, mənəvi qida alır, mənən təmizlənir və zənginləşir. Mən Göyçay rayonunda orta təhsil alsam da, tətillər zamanı Bakıya və mütləq teatra gəlirdim.

GƏNC TAMAŞAÇILAR TEATRI MƏNİM ƏN ÇOX ZİYARƏT ETDİYİM TEATRLARDANDI.

Və o vaxtlar baxdığım hər bir səhnə əsəri, aktyor ifası mənim yadımdadır. Bu tamaşalara baxan hər bir şagird özü üçün yaxşı mənada nəsə bir müsbət fikir götürür. Hansısa bir ideyanı özü üçün aydınlaşdırır. Teatr canlı orqanizmdir. Bizi əhatə edən gündəlik qayğılar teatrın, səhnə əsərinin mövzusudur. Ətrafımızda baş verən neqativ hallar satiranın dili ilə səhnədə təcəssümünü tapır. Tamaşaçı bu mənfi obraza gülür, lakin eyni zamanda bu obrazın sondakı aqibətini görür. Özündə olan bu mənfi xüsusiyyətləri uzaqlaşdırmağa çalışır”. Direktor teatrda uşaqlar üçün hazırlanan tamaşaların tərbiyəvi əhəmiyyətindən danışıb: “Azərbaycan xalq nağılı “Göyçək Fatma”nı misal gətirək. Bu tamaşanın azyaşlı seyrçilərimiz üçün tərbiyəvi əhəmiyyəti olduqca vacibdir. Burada uşaqlara olunan nəsihətlər nağıl qəhrəmanlarının dili, bədii təsvir vasitələri, səhnənin bizə verdiyi imkanlarla, dekorasiya, kostyum, işıq, musiqi effektləri və ümumilikdə səhnə komponentləri ilə deyilir”. M.Həmidovun sözlərinə görə, müstəqil Azərbaycanın gələcək inkişafında bilavasitə iştirak edən insanlar bizim gələcəyimiz olan gənclərdir. Ali təhsil ocaqlarında təhsil alan, sabahın mütəxəssislərini bu gün biz teatr olaraq düzgün istiqamətləndirməyi bacarsaq, normal repertuar siyasəti müəyyənləşdirə bilsək, gənclərin zövqünə uyğun tamaşalar təqdim etsək bu çox yaxın bir zamanda bəhrəsini verəcək.

BİNANIN ƏSASLI TƏMİRİNDƏN SONRA TEATRIN FƏALİYYƏTİ XEYLİ YAXŞILAŞIB.

Əgər 2006-cı ildə – təmirdən əvvəl yalnız şənbə-bazar günləri gündüz tamaşaları göstərilirdisə, təmirdən sonra şənbə-bazar gündüz və axşam tamaşaları seyrçilərimizə təqdim olunur: “Texnologiyanın bu cür yüksək inkişafında əgər biz yetərincə gəncləri teatrımıza cəlb edə biliriksə, əgər gənclər sosial şəbəkələrdə bizim tamaşalarımız, bəyəndikləri səhnə əsəri və aktyor haqqında fikir mübadiləsi aparırlarsa bu artıq teatr olaraq bizim uğurumuzdur. Bizim bu sahədə hazırlanan tamaşaların bədii səviyyəsi, quruluşu, aktyor ifası, tərtibatı və ümumilikdə bütün komponentləri baxımdan tamaşaçılar tərəfindən rəğbətlə qarşılanır. Tamaşaçıların mütəmadi teatra ziyarəti bunu deməyə əsas verir”. Repertuar siyasətindən danışan direktor bildirib ki, repertuarı müəyyənləşdirərkən isə daha çox milli-mənəvi dəyər kimi qəbul etdiyimiz, Azərbaycanın klassik dramaturgiyası ilə yanaşı, müasir, həm də Avropa və dünya klassiklərinin əsərlərinə müraciət edilir: “Tutaq ki, teatra gələn hər hansı bir seyrçi Knut Hamsunun kim olduğunu bilmir. Teatra gəlməklə tamaşaçı ən azından Hamsunun görkəmli Norveç yazıçısı, Nobel mükafatı laureatı, keçən il bu yazıçının 150 illiyi olduğunu və UNESKO tərəfindən ötən ilin Knut Hamsun ili elan edildiyini biləcək. Tamaşaya baxmaqla isə bu görkəmli yazarın hansı qəbildən, hansı istiqamətdə yazdığı haqqında geniş təəssürat qazanacaq. Tamaşaçı həmçinin teatra gələn zaman tamaşanın proqramı ilə də tanış olmaq imkanı əldə edir. Bununla da tamaşada rol almış aktyorlar haqqında ümumi məlumat əldə etmiş olur. Teatrımızın digər bir missiyası da digər teatrlar üçün tamaşaçı yetişdirməsidir. Biz repertuarda şərti olaraq məktəblilər üçün hazırlanan tamaşaları dörd kateqoriyaya bölmüşük. Hər kateqoriyanın öz auditoriyası var. Bu kateqoriyalardan keçən tamaşaçı daha sonra bütün digər teatrlar üçün potensiallı tamaşaçıya çevrilir”. Direktor qeyd edib ki, müasir Azərbaycanın qurucusu, ümummilli lider Heydər Əliyevin milli-mənəvi sərvətlərimizin və mədəniyyətimizin qorunmasına verdiyi önəm hər zaman ölkə ictimaiyyəti tərəfindən yüksək qiymətləndirilib. Ümummilli liderin yürütdüyü məqsədyönlü siyasət ölkəmizin dünya ölkələri arasında yüksək mövqe sahibi olmasına rəvac verib. Ulu öndərin teatr sənətinə olan sonsuz diqqəti və qayğısı bu sənət haqqında dediyi fikirlərdə aydın nəzərə çarpır: “Teatr müqəddəs yerdir. Tərbiyə ocağıdır, orada çalışanlar fədakardırlar, fədaidirlər. Heç kim bilmir ki, aktyor səhnədə çıxıb rolu tamaşaçı qarşısında oynadığı vaxta kimi nə qədər həyəcan, sevinc keçirir. Mən həmişə teatra yaxın və bağlı olmuşam. Bu ötəri hiss deyil. İçimdən gələn məhəbbətdir”. M.Həmidov deyib ki, heç şübhəsiz, uşaq və yeniyetmələrin , eləcə də gənc nəslin mənəvi-estetik zövqünün formalaşmasında, onların vətənpərvərlik ruhunda tərbiyə edilib böyüməsində bu mövzularda hazırladığımız tamaşaların müstəsna rolu vardır: “Bu gün teatrımızın repertuarı kiçik yaşlı uşaqlar, gənc və yeniyetmələr, böyüklər üçün maraqlı tamaşalarla zəngindir. Bir sözlə, 7-dən 77-yə qədər bütün yaş qrupunu əhatə edən tamaşaçıları teatrımızda hər zaman görməyə məmnunuq. Hazırladığımız tamaşalar arasında bu gün ümumtəhsil məktəblərində tədris olunan bir çox klassik dramaturqların məşhur əsərləri də vardır. Çox arzu edərdik ki, teatrla məktəblərimiz arasındakı əlaqələr daha da genişlənsin, daha da sıx olsun. Çünki, Gənc Tamaşaçılar Teatrı eyni zamanda məktəb təmayüllüdür. Teatrda yeniyetmə və gənclərlə iş üzrə xüsusi pedaqoqlar çalışır. 83 yaşlı Azərbaycan Dövlət Gənc Tamaşaçılar Teatrı bu gün də öz ənənəsinə sadiq qalaraq, bütün yaş təbəqələrini əhatə edən yeni-yeni maraqlı tamaşalarla öz tamaşaçılarını sevindirməkdədir. Tamaşaçı ilə hər bir görüş bizim üçün əsl bayramdır”.

Hüsniyyə İSMƏTQIZI

525-ci qəzet.- 2011.- 18 mart.- S.6.