“Məqsədimiz Yeni Zelandiyada yaşayan azərilər arasında birliyə nail olmaqdır”

QALİB MAHMUDOV: “MÜNASİBƏTLƏRİN DAHA DA İNKİŞAFI ÜÇÜN İKİ ÖLKƏ ARASINDA İQTİSADİ, TURİZM SAHƏSİNDƏ İNKİŞAF VACİBDİR”

Bu gün Yeni Zelandiyada 2 minə yaxın azərbaycanlı yaşayır. Onların əksəriyyətini Cənubi Azərbaycandan olanlar təşkil edir. “Azəri” Yeni Zelandiya- Azərbaycan Dostluq Cəmiyyəti isə bu ölkədə soydaşlarımızı bir araya gətirən diaspora təşkilatıdır. Qurumun sədri Qalib Mahmudov bu ölkəyə işləmək üçün gəlsə də, diaspora sahəsində də uğurla fəaliyyət göstərməyə başlayıb. O, “525”ə müsahibəsində əvvəlcə özü barədə danışıb:

–Mən artıq on ildir ki, Yeni Zelandiyada yaşayıram. Buraya gəlişimdə məqsəd iki ölkə arasında iş əlaqələri qurmaq olub. Hələ Bakıda ikən Azərbaycanla Yeni Zelandiya arasında geniş ticarət əməkdaşlığı yaratmaq arzusu ilə yaşayırdım. Odur ki, 2001-ci ilin fevralında 1 ay müddətinə Okland şəhərinə gəldim. Lakin arzularımın həyata keçməsi üçün daha çox zaman lazım idi. Bir il sonra Yeni Zelandiyanın miqrasiya xidmətinə müraciət edərək burada daimi yaşamaq imkanı əldə etdim və ailəmi gətirdim. Bir məlumat kimi qeyd edim ki, Yeni Zelandiya ali savadı və iş təcrübəsi olan, bununla yanaşı ingilis dilini bilənlərə daimi yaşamaq vizası verir. Elə mən də bu kateqoriya ilə viza almışam. Eyni zamanda Okland şəhərinin Massey Universitetində təhsil almışam.

–Bəs Yeni Zelandiyada Azərbaycan haqqında bilgilər varmı?

–Ölkələr arasında dostluq və əməkdaşlığın təməlini müəyyən faktorlar və ya tarixi hadisələr təyin edir. Misal üçün, yeni zelandiyalıların türklərlə dostluğunu belə yüksək səviyəyə qaldıran səbəblərdən biri 1915-ci ildə Çanaqqalada baş verən döyüşlər olub. Adətən, müharibə edən tərəflər uzun illər nifrət hissi ilə yaşayırlar. Lakin türklərin mərdliyi və insanpərvərliyi Çanaqqala savaşını tarixə xalqlar arasında dostluq rəmzi kimi yazdı. Buna sübut 1934-cü ildə Mustafa Kamal Atatürkün Çanaqqala döyüşlərində həlak olmuş əsgərlərin analarına ünvanladığı sözləri yada salmaq kifayətdir.

Yeni Zelandiyanın Azərbaycanla daha yaxın münasibətlərdə olması üçün iki ölkə arasında iqtisadi maraqların genişlənməsi, turizmin inkişafı, daha çox mədəni və idman tədbirlərinin keçirilməsi vacibdir. Azərbaycan burada ən yüksək keyfiyyətli nar şirələri istehsal edən bir ölkə kimi tanınıb. Bizim ölkəmizi və onun məhsullarını tanıtmaq uğrunda gördüyümüz işlərdən bunları sadalamaq olar. 20 mindən artıq ailəyə Azərbaycanın nar şirəsi haqqında vərəqə, 200 ml-lik qablarda nar şirəsi paylanması, qəzet və jurnallarda yazılan məqalələr, radioda səslənən reklamlar, bütün Yeni Zelandiya üzrə təşkil olunan sərgilərdə “Azərbaycan malı” şüarı altında iştirakımız. Bunlardan əlavə çoxlu tədbirdə Azərbaycan mətbəxi və musiqisi özünün təkrarolunmaz gözəlliyi ilə yeni zelandiyalıları valeh edib. Buranın ali məktəblərində təhsil alan azərbaycanlı tələbələr, idman yarışlarında iştirak edən idmançılar hamısı vətənimizin tanınmasında vacib rol oynayırlar.

Bu ilin yanvar ayında Kraysçörç şəhərində keçirilən paraolimpiya atletlərinin dünya çempionatında idmançılarımız Azərbaycanın himninin 3 dəfə səslənməsinə nail oldular. Azərbaycan komandası 6 idmançı ilə 6 medal qazandı. İdmançılarımızla görüşəndə bizim sevincimizin həddi-hüdudu yox idi. Bir sözlə, Azərbaycan sözü nə qədər çox səslənsə, Azərbaycan yazısına nə qədər çox rast gəlinsə, vətənimiz daha çox tanınar.

– “Azəri”Cəmiyyəti hansı məqsədlə yaradılıb və indiyə kimi hansı işlər görülüb?

– Bura gəldiyim ilk vaxtlardan başlayaraq həmyerlilərimizi axtarmağa başladım. Bəzilərini soraqlaşıb tapmışam, bəzən isə adi təsadüf nəticəsində rast gəlib tanış olmuşam. 2003-cü ilin oktyabrında buranın dövlət televiziyasında xəbərlər bülletenində Azərbaycan barədə xoşagəlməz bir sujet verdilər. Mən dərhal kanala zəng vurub, məlumatların qərəzli və yalan olduğunu söylədim, burada yaşayan azərbaycanlılar adından etirazımı bildirərək sujetin bir daha göstərilməməsini tələb etdim. Səsimi eşitdilər və xəbərlərin növbəti buraxılışında Azərbaycan haqda yalnış məlumatı təkrarlamadılar. Bu hadisə burada Azərbaycan cəmiyyətinin yaradılmasının zəruriliyini ortaya çıxardı. Belə ki, biz bir cəmiyyət şəkilində lazım gələrsə öz sözümüzü deməyə hazır olmalıyıq. Cəmiyyətimizi yaratmaqda ən öndə olan məqsəd isə Yeni Zelandiyada yaşayan azərilər arasında birlik yaratmaqdır.

–Bəs bu birliyə nail ola bilmisinizmi?

–Əlbəttə, biz daim bu istiqamətdə çalışırıq. Soydaşlarımızla birgə tədbirlər təşkil edirik, milli bayramlarımızda, Azərbaycanda qeyd olunan əhəmiyyətli günlərdə bir yerdə oluruq. Xocalı soyqırımını anırıq. Bu il Yeni Zelandiyanın müxtəlif şəhərlərindən gəlmiş həmyerlilərimiz və burada təhsil alan azərbaycanlı tələbələr də anım mərasimində iştirak etdilər. Görüş zamanı ermənilərin xalqımıza qarşı törətdikləri vəhşiliklərin bütün Yeni Zelandiya əhalisinə çatdırmaq uğrunda gördüyümüz işlər və qarşıdan gələn növbəti toplantımıza hazırlıq müzakirə olundu. Ötən ilin martında isə çox maraqlı Novruz bayramı tədbirimiz olmuşdu. Hətta Cənub adadan belə həmyerlilərimiz gəlmişdilər. Cəmiyyətimizin üzvləri Yeni Zelandiyaya yenicə köçmüş həmyerlilərimizə hər tərəfli köməklik göstərirlər. Onlara iş tapmaqda, mənzil axtarmaqda, ümumiyyətlə yeni ölkədə məskunlaşmaqda yardımçı olurlar. Təhsil almağa gələn tələbələrlə əlaqə saxlayır, cəmiyyətimizin tədbirlərində iştirak etməklərinə imkan yaradırlar.

–Bu il Bakıda Dünya Azərbaycanlılarının üçüncü qurultayı keçiriləcək. Gözləntiləriniz nədən ibarətdir?

–Mən istərdim ki qurultayda müxtəlif ölkələrdə fəaliyyət göstərən diaspor təşkilatlarımız arasında koordinasiya mexanizmi qurmaq üçün iş planı hazırlansın. Diaspor təşkilatlarına ölkəmiz haqda lazım olan materialların göndərilməsi mexanizmi qurulsun. Bunlardan başqa vətəndaşlıq haqqında qanuna aydınlıq gətirmək mümkün olsaydı çox yaxşı olardı. Belə ki, bir çox ölkələrdə yaşayan vətəndaşlarımız müəyyən çətinliklərlə üzləşirlər. Bu çətinliklərin aradan qalxmasında müəyyən işləri görməyə ehtiyac var. Həmçinin düşünürəm ki, bu qurultay bizim üçün diaspor qurumları qarşısında duran problemlər, vəzifələr, görülmüş və görüləcək işlərin müzakirəsi baxımından vacib əhəmiyyət kəsb edir.

P.SULTANOVA

525-ci qəzet.- 2011.- 18 mart.- S.4.